ខេត្តបន្ទាយមានជ័យ ៖ យុវជនចំនួន៤នាក់ត្រូវជនមិនស្គាល់មុខមួយក្រុមជិះម៉ូតូដេញតាមពីក្រោយកាប់បណ្តាលឲ្យរងរបួស ពេលពួកគេកំពុងជិះម៉ូតូមិនដឹងខ្លួន ។ ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោងជាង៩យប់ថ្ងៃទី១៧ កញ្ញា ឆ្នាំ២០១៨ នៅចំណុចផ្លូវបំបែកជាបួននៃទឹកដីកាស៊ីណូផារ៉ាមែក ក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត។
ជនរងគ្រោះទាំង៣នាក់ខាងលើរួមមាន ១-ឈ្មោះបឺត សុធា ភេទប្រុស អាយុ១៩ឆ្នាំ រងរបួសស្មាស្តាំ ២-ឈ្មោះវ៉ន សម្ភស្ស ភេទប្រុស អាយុ១៨ឆ្នាំ រងរបួសក្បាល និងស្មាស្តាំ និង៣-ឈ្មោះវិច្ចរ៉ា ភេទប្រុស អាយុ២០ឆ្នាំ រងរបួសថ្ពាល់ស្តាំ ។ ជនរងគ្រោះទាំង៣នាក់ស្នាក់នៅចំណុចអគារបុគ្គលិកកាស៊ីណូហ្គោលដិន ក្នុងភូមិកើតហេតុ។
តាមនគរបាលការពារព្រំដែនគោកលេខ៩១១ ប៉ុស្តិ៍បឹងសាគូប្រាប់ឱ្យដឹងថា យោងតាមការសួរនាំ ជនរងគ្រោះបានប្រាប់ថា ពួកខ្លួនទាំង៣នាក់កំពុងជិះម៉ូតូមួយគ្រឿងម៉ាកសង់ ធុនសេ១២៥ស៊េរីឆ្នាំ២០១៧ ពណ៌ខ្មៅ ស្រាប់តែមានក្រុមជនសង្ស័យចំនួន៤នាក់ជិះម៉ូតូ២គ្រឿងម៉ាកសង់ធុនសេ១២៥ ស៊េរីឆ្នាំ២០១៧ ពណ៌ក្រហម និងមួយគ្រឿងទៀតម៉ាកឃ្លីក ពណ៌ខ្មៅ ប្រដាប់ដោយកាំបិតសាម៉ូរ៉ៃតាមកាប់ពីក្រោយដោយមិនដឹងពីមូលហេតុ បណ្តាលឲ្យពួកខ្លួនរងរបួសតែម្តង ។
ក្រោយកើតហេតុ ជនរងគ្រោះត្រូវបានគេបញ្ជូនទៅព្យាបាលនៅគ្លីនិកឯកជនមួយកន្លែងដែលនៅក្បែរនោះ។ ដោយឡែកក្រុមជនសង្ស័យបានគេចខ្លួនបាត់ដោយសុវត្ថិភាព៕
ចែករំលែកព័តមាននេះ