រាជធានីភ្នំពេញ៖ អាជ្ញាធររាជធានីភ្នំពេញបានអះអាងថា ផ្លូវទំនប់កប់ស្រូវ ឬមហាវិថីឈ្នះឈ្នះ ចាប់ផ្តើមមានភ្លើងបំភ្លឺនៅពេលយប់ជាបណ្តើរៗហើយ ហើយក្រុមការងារបាននិងកំពុងខិតខំដំឡើងបង្គោល និងអំ
ពូលភ្លើងឲ្យបានចំនួន២៨៥ដើម និងឲ្យរួចរាល់ទាំងស្រុងនៅដើមខែវិច្ឆិកាឆាប់ៗនេះ ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា ដោយសារកំណើននៃការធ្វើចរាចរណ៍របស់ប្រជាពលរដ្ឋកាន់តែច្រើនឡើង និងក្នុងគោលបំណងលើកកំពស់សោភ័ណ្ឌភាព កាត់បន្ថយបានគ្រោះថ្នាក់ចរាចរណ៍ និងបទល្មើសផ្សេងៗផងនោះ រដ្ឋបាលរាជធានីភ្នំពេញបានសម្រេចដាក់បង្គោលភ្លើងបំភ្លឺសាធារណៈ តាមបណ្តោយមហាវិថីឈ្នះឈ្នះ ឬផ្លូវកប់ស្រូវ ចាប់ពីផ្លូវរទេះភ្លើងបាត់ដំបងទៅដល់ផ្លូវភ្នំពេញ ហាណូយ ប្រមាណជិត៣០០បង្គោល ដើម្បីបង្កលក្ខណៈងាយស្រួលដល់ការធ្វើដំណើររបស់ប្រជាពលរដ្ឋ ។
លោកសាំ ពិសិដ្ឋ បានឲ្យដឹងទៀតថា រដ្ឋបាលរាជធានីភ្នំពេញ បាននឹងកំពុងដាក់បង្គោលភ្លើងបំភ្លឺនៅពេលយប់តាមបណ្តោយមហាវិថីឈ្នះឈ្នះ ឬផ្លូវកប់ស្រូវ ក្នុងប្រវែង១២,៦គីឡូម៉ែត្រ ចាប់ពីផ្លូវរទេះភ្លើងបាត់ដំបង ដល់ផ្លូវភ្នំពេញហាណូយ ដែលត្រូវដាក់បង្គោល និងអំពូលភ្លើងចំនួន២៨៥ដើម ។
លោកបញ្ជាក់ថា គម្រោងនេះបានចាប់ផ្តើមដាក់តាំងពីដើមខែកញ្ញា ឆ្នាំ២០១៨មកដល់ពេលនេះ បាននឹងកំពុងដាក់អោយដំណើរបំភ្លឺជូនប្រជាពលរដ្ឋ បានចំនួន៥២បង្គោលជាបណ្តើរៗសិន និងគ្រោងបញ្ចប់ទាំងស្រុងនៅដើមខែវិច្ឆិកានេះ ៕
ចែករំលែកព័តមាននេះ