ខេត្តកំពង់ឆ្នាំង ៖ គ្រោះថ្នាក់ចរាចរណ៍រវាងម៉ូតូបុកជាមួយម៉ូតូ បណ្តាលឱ្យបុរសម្នាក់រងរបួសធ្ងន់ និង២នាក់ទៀតរងរបួសស្រាល បានកើតឡើងកាលពីវេលាម៉ោង១០ព្រឹកថ្ងៃទី១៦ ខែកញ្ញា ឆ្នាំ២០១៨ នៅលើកំណាត់ផ្លូវជាតិលេខ៥ ត្រង់ចំណុចភូមិកណ្ដាល សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចនគរបាលក្រុងកំពង់ឆ្នាំងបាននិយាយឲ្យដឹងថា ម៉ូតូមួយគ្រឿងម៉ាកហុងដា ធុនសេ១២៥ ស៊េរីឆ្នាំ២០១៨ ពាក់ស្លាកលេខ ភ្នំពេញ ១GV-៩២៤៦ បើកបរដោយបុរសឈ្មោះតេង ទីម អាយុ៤៨ឆ្នាំ មានទីលំនៅភូមិតាឡាត ឃុំស្វាយរំពារ ស្រុកកំពង់លែង បានរងរបួសធ្ងន់ ចំណែកម៉ូតូ១គ្រឿងទៀតម៉ាកហុងដា ធុនសេ១២៥ ពាក់ស្លាកលេខ ភ្នំពេញ ១-GN៨៨៨៥ បើកបរដោយបុរសម្នាក់ឈ្មោះ អ៊ុន វីរៈ អាយុ៣០ឆ្នាំ មានទីលំនៅភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង និងបុរសម្នាក់ទៀតជាអ្នករួមដំណើរ ទាំងពីរនាក់បានរងរបួសស្រាល ។
ប្រភពព័ត៌មានបានឱ្យដឹងថា មុនពេលកើតហេតុមានម៉ូតូមួយគ្រឿងម៉ាកហុងដា ពាក់ស្លាកលេខ ភ្នំពេញ ១GV-៩២៤៦ បើកបរដោយបុរសម្នាក់ លុះមកដល់ចំណុចកើតហេតុបានជ្រុលទៅបុកពីក្រោយម៉ូតូ១គ្រឿងទៀតម៉ាកហុងដា ពាក់ស្លាកលេខ ភ្នំពេញ ១-GN៨៨៨៥ បើកបរដោយបុរសម្នាក់ និងបុរសម្នាក់ទៀតជារួមអ្នកដំណើរម្នាក់ ក្នុងទិសដៅស្របគ្នា បណ្ដាលឲ្យអ្នកជិះម៉ូតូពាក់ស្លាកលេខភ្នំពេញ ១GV-៩២៤៦ រងរបួសធ្ងន់ ចំណែកភាគីជិះម៉ូតូពាក់ស្លាកលេខ ភ្នំពេញ ១-GN៨៨៨៥ រងរបួសស្រាលទាំង២នាក់ ។
ក្រោយពេលកើតហេតុ សមត្ថកិច្ចបានចុះទៅធ្វើការវាស់វែង និងយកម៉ូតូទាំង២គ្រឿងទៅរក្សាទុកនៅអធិការក្រុងកំពង់ឆ្នាំងដើម្បីចាត់ការតាមផ្លូវច្បាប់។ ដោយឡែកអ្នកបើកបរម៉ូតូពាក់ស្លាកលេខ ១GV-៩២៤៦ ដែលរងរបួសធ្ងន់ ត្រូវបានដឹកទៅសង្គ្រោះនៅមន្ទីរពេទ្យខេត្តកំពង់ឆ្នាំង ប៉ុន្តែដោយសាររបួសធ្ងន់ធ្ងរពេក គ្រូពេទ្យបានបញ្ជូនជនរងគ្រោះទៅសង្គ្រោះបន្តនៅមន្ទីរពេទ្យក្រុងភ្នំពេញតែម្តង ៕
ចែករំលែកព័តមាននេះ