រាជធានីភ្នំពេញ ៖ ជនសង្ស័យចំនួន២នាក់ត្រូវបានកម្លាំងសមត្ថកិច្ចប៉ុស្តិ៍នគរបាលទំនប់ទឹក ឃាត់ខ្លួនយកទៅសាកសួរ បន្ទាប់ពីឆែកឆេររកឃើញនូវឧបករណ៍សម្រាប់កាច់.កម៉ូតូមួយចំនួន ដែលហេតុការណ៍ឃាត់ខ្លួននេះបានធ្វើឡើងនៅវេលាម៉ោង២និង៣៥នាទីរំលងអធ្រាត្រឈានចូលថ្ងៃទី១៣ ខែកញ្ញា ឆ្នាំ២០១៨ ក្រោយ និងវិទ្យាស្ថានវ៉ានដា ផ្លូវ៤០២ សង្កាត់ទំនប់ទឹក ខណ្ឌចំការមន ។
ជនសង្ស័យដែលត្រូវបានសមត្ថកិច្ចឃាត់ខ្លួនទី១ – មានឈ្មោះ ដា លីន ភេទប្រុស អាយុ៣៥ឆ្នាំ មុខរបររត់ម៉ូតូឌុប មានស្រុកកំណើតនៅភូមិវត្តឃ្លាំង ស្រុកព្រះស្តេច ខេត្តព្រៃវែង ទី២- ឈ្មោះ ធី ម៉ៅ ភេទប្រុស អាយុ១៤ឆ្នាំ ស្នាក់នៅសង្កាត់ស្ទឹងមានជ័យ២ ខណ្ឌមានជ័យ ។ ដែលដកហូតវត្ថុតាងមាន៖ ម៉ូតូម៉ាកឌ្រីមសង់ សេរីឆ្នាំ២០១៥ អត់មានស្លាកលេខមួយគ្រឿង ព្រមទាំងឧបករណ៍សម្រាប់កាច់.កម៉ូតូមួយឈុត ។
តាមសម្តីនាយប៉ុស្តិ៍នគរបាលទំនប់ទឹកបានឲ្យដឹងថា មុន និងឈានទៅដល់ការឃាត់ខ្លួនជនសង្ស័យខាងលើនេះ គឺកម្លាំងសមត្ថកិច្ចប៉ុស្តិ៍នគរបាលទំនប់ទឹករបស់លោកបានធ្វើការល្បាតក្នុងមូលដ្ឋាន ដើម្បីទប់ស្កាត់បទល្មើសផ្សេងៗ និងការពារសុវត្តិភាពជូនប្រជាពលរដ្ឋ ខណៈមកដល់ចំណុចខាងលើក៏ស្រាប់តែប្រទះឃើញបុរស២នាក់ខាងលើ ជិះម៉ូតូហុងដាឌ្រីមមួយគ្រឿង អត់មានស្លាកលេខ និងដឹកឥវ៉ានសំពីងសំពោង ហើយដោយមានការសង្ស័យកម្លាំងសមត្ថកិច្ចបានឃាត់ខ្លួនបុរសទាំង២នាក់នោះ ដើម្បីសុំធ្វើការត្រួតពិនិត្យ និងឆែកឆេរ ស្រាប់តែរកឃើញនូវឧបករណ៍សម្រាប់កាច់.កម៉ូតូមួយឈុតក៏នាំខ្លួនយកទៅធ្វើការសាកសួរនៅប៉ុស្តិ៍នគរបាលទំនប់ទឹកតែម្តង ។ នៅចំពោះមុខសមត្ថកិច្ចជនសង្ស័យទាំង២នាក់នេះបានសារភាពថា ឧបករណ៍សម្រាប់កាច់.កម៉ូតូមួយឈុតនេះ គឺពិតជារបស់ពួកគេពិតប្រាកដមែន ។
ក្រោយពេលកើតហេតុបន្ទាប់ពីសាកសួររួចហើយជនសង្ស័យព្រមទាំងវត្ថុតាំងត្រូវបានសមត្ថកិច្ចកសាងសុំណុំរឿងបញ្ជួនខ្លួនទៅអធិការដ្ឋានខណ្ឌចំការមន ដើម្បីចាត់ការបន្តតាមនីតិវិធី ៕
ចែករំលែកព័តមាននេះ