រាជធានីភ្នំពេញ ៖ បុរសម្នាក់បានស្លាប់ភ្លាមៗនៅកន្លែងកើតហេតុ ពេលកំពុងតែជិះម៉ូតូត្រូវរថយន្តបើកជែងគ្នារេចង្កូតទៅបុកម៉ូតូជនរងគ្រោះពេញទំហឹង កាលពីវេលាម៉ោង៧និង៣០នាទីយប់ថ្ងៃទី១២ ខែកញ្ញា ឆ្នាំ២០១៨ នៅតាមបណ្ដោយផ្លូវជាតិលេខ៣ ទល់មុខបញ្ជាការដ្ឋានកងពលតូចលេខ៧០ ស្ថិតនៅភូមិព្រៃព្រីងត្បូង…
រាជធានីភ្នំពេញ ៖ បុរសម្នាក់បានស្លាប់ភ្លាមៗនៅកន្លែងកើតហេតុ ពេលកំពុងតែជិះម៉ូតូត្រូវរថយន្តបើកជែងគ្នារេចង្កូតទៅបុកម៉ូតូជនរងគ្រោះពេញទំហឹង កាលពីវេលាម៉ោង៧និង៣០នាទីយប់ថ្ងៃទី១២ ខែកញ្ញា ឆ្នាំ២០១៨ នៅតាមបណ្ដោយផ្លូវជាតិលេខ៣ ទល់មុខបញ្ជាការដ្ឋានកងពលតូចលេខ៧០ ស្ថិតនៅភូមិព្រៃព្រីងត្បូង សង្កាត់ចោមចៅ២ ខណ្ឌពោធិសែនជ័យ ។
ដោយសំអាងលើអត្តសញ្ញាណប័ណ្ណនៅជាប់នឹងខ្លួន ជនរងគ្រោះដែលស្លាប់ឈ្មោះ ប្រាក់ បូរី ភេទប្រុស អាយុ៣៧ឆ្នាំ មានទីលំនៅភូមិព្រែកតាអុង ឃុំពាមឧកញ៉ាអុង ស្រុកល្វាឯម ខេត្តកណ្តាល ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញជនរងគ្រោះជិះម៉ូតូមួយគ្រឿងម៉ាកស្មាស ពណ៌ខ្មៅ ពាក់ស្លាកលេខ ភ្នំពេញ ១AI-៩៥០២ បើកក្នុងទិសដៅពីត្បូងទៅជើងជិះតែម្នាក់ឯងក្នុងល្បឿនមធ្យម លុះធ្វើដំណើរមកដល់ចំណុចកើតហេតុ ស្រាប់តែមានរថយន្តកុងតឺន័រមួយគ្រឿងបានបើកជែងជាមួយរថយន្តមួយគ្រឿងផ្សេងទៀត ហើយបានបុកម៉ូតូជនរងគ្រោះពេញទំហឹង ក្នុងទិសដៅបញ្ច្រាសគ្នា បណ្ដាលឲ្យជនរងគ្រោះរមូរជាប់នឹងម៉ូតូបាក់ជើង និងដៃជាច្រើនកំណាត់ស្លាប់ភ្លាមៗនៅនឹងកន្លែងកើតហេតុ។
ប្រភពព័ត៌មានបានបន្តទៀតថា បន្ទាប់ពីកើតហេតុ ភ្លាមៗនោះរថយន្តកុងតឺន័របានបន្ថែមល្បឿនបើករត់គេចខ្លួនបាត់ស្រមោល បន្សល់ទុកតែម៉ូតូ និងសពជនរងគ្រោះនៅកន្លែងកើតហេតុ ។ ស្របពេលនោះដែរ ក៏មានក្មេងជំទង់ជិះម៉ូតូមួយគ្រឿងមកដល់ចំណុចកើតហេតុខាងលើ ហើយបានដួលដោយខ្លួនឯងបណ្តាលឱ្យរងរបួសស្រាលផងដែរ បន្ទាប់មកក្មេងជំទង់ម្នាក់នោះត្រូវបានរថយន្តសង្គ្រោះរបស់អង្គភាព៧១១បានជួយសង្គ្រោះបឋមភ្លាមៗផងដែរ បន្ទាប់ពីជួយសង្គ្រោះរួច ក្មេងជំទង់ម្នាក់នោះបានលើកម៉ូតូជិះចេញទៅបាត់ផងដែរ។
ក្រោយពេលកើតហេតុ កម្លាំងនគរបាលចរាចរខណ្ឌពោធិ៍សែនជ័យបានមកដល់កន្លែងកើតហេតុហើយបានពិនិត្យមើលគ្រោះថ្នាក់ចរាចរណ៍ខាងលើ រកឃើញថា អ្នកបើកបររថយន្តជាអ្នកបង្កបានបើករថយន្តគេចបាត់ទៅហើយ ចំណែកសពពុំមានសាច់ញាតិបងប្អូនណាម្នាក់ដឹងនៅឡើយ បន្ទាប់មកកម្លាំងនគរបាលចរាចរណ៍ខណ្ឌពោធិ៍សែនជ័យបានឲ្យរថយន្តដឹកសព ទៅរក្សាទុកនៅវត្តទឹកថ្លាដើម្បីរង់ចាំបងប្អូនមកទទួលយកទៅធ្វើបុណ្យតាមប្រពៃណី ចំណែកម៉ូតូត្រូវបានសមត្ថកិច្ចយកទៅរក្សាទុកនៅចរាចរណ៍ខណ្ឌពោធិ៍សែនជ័យ ៕
ចែករំលែកព័តមាននេះ