រាជធានីភ្នំពេញ ៖ ការប្រកាសផលទ្ធផលប្រឡងសញ្ញបត្រទុតិយភូមិ (បាក់ឌុប) សម្រាប់ឆ្នាំ២០១៨នេះ បានធ្វើឡើងមុនការគ្រោងទុក នៅរសៀលថ្ងៃទី៩ ខែកញ្ញា ឆ្នាំ២០១៨នេះ។ លទ្ធផលនេះបានធ្វើឲ្យសិស្ស…
រាជធានីភ្នំពេញ ៖ ការប្រកាសផលទ្ធផលប្រឡងសញ្ញបត្រទុតិយភូមិ (បាក់ឌុប) សម្រាប់ឆ្នាំ២០១៨នេះ បានធ្វើឡើងមុនការគ្រោងទុក នៅរសៀលថ្ងៃទី៩ ខែកញ្ញា ឆ្នាំ២០១៨នេះ។ លទ្ធផលនេះបានធ្វើឲ្យសិស្ស ដែលប្រឡងជាប់បានត្រេកអរលោតចុះឡើង ហើយសិស្សដែលធ្លាក់បានសម្រក់ទឹកភ្លែកឱនមុខចុះ ពេលមិនបានឮឈ្មោះរបស់ខ្លួនតាមសំឡេងមីក្រូ។ សិស្សចំនួន៧៥.០៥៩នាក់បានប្រឡងជាប់ ក្នុងចំណោមសិស្សជាង១១ម៉ឺននាក់ ក្នុងនិទ្ទេសA=២៩០នាក់ ដែលបានចុះឈ្មោះសម្រាប់ការប្រឡង សញ្ញបត្រមធ្យមសិក្សាទុតិយភូមិ នាសម័យប្រឡងថ្ងៃទី២០-២១ សីហា ២០១៨ នៅមណ្ឌល១៩៦ ចែកជា៤៦៥៥បន្ទប់។
តាមលទ្ធផលដែលប្រកាសដោយក្រសួងអប់រំយុវជន និងកីឡាបានបញ្ជាក់ថា បេក្ខជនប្រឡងជាប់មានចំនួន៧៥.០៥៩នាក់ស្មើនឹង៦៦.២១%(បើប្រៀបធៀបឆ្នាំ២០១៧ មាន៦៣.៨៤%) ក្នុងនោះបេក្ខជនទទួលបាននិទ្ទេស(A) មានចំនួន២៩០នាក់ (ឆ្នាំ២០១៧ និទ្ទេសA=៤២៤នាក់) និទ្ទេស(B)មានចំនួន១៥៣២នាក់ (ឆ្នាំ២០១៧និទ្ទេស(B)មានចំនួន២៤៦៤នាក់) និទ្ទេស(C)មានចំនួន៤.៦៣១នាក់ (ឆ្នាំ២០១៧និទ្ទេស(C)មានចំនួន៥.០០០នាក់) និទ្ទេស(D)មាន ចំនួន៤.៦៣១នាក់ (ឆ្នាំ២០១៧និទ្ទេសCមានចំនួន៩.១២៣នាក់) និងនិទ្ទេស(E) មានចំនួន៥.៤៦០៧នាក់ (ឆ្នាំ២០១៧និទ្ទេសEមានចំនួន៤៦.៦៥៧នាក់)។
ក្រសួងអប់រំបានបញ្ជាក់ថា មូលហេតុនៃការទទួលបាននិទ្ទេសA,B និងCឆ្នាំ២០១៨នេះធ្លាក់ចុះ បើប្រៀបធៀបនឹងឆ្នាំ២០១៧ គឺដោយសារក្រសួងអប់រំបានបង្កើនស្តង់ដាប្រធានវិញ្ញាសាឲ្យខ្លាំងជាងមុនក្នុងគោលដៅពង្រឹងគុណភាពអប់រំ និងជំរុញបេក្ខជនឲ្យខិតខំរៀនសូត្រឲ្យកាន់តែមានចំណេះដឹងជ្រៅជ្រះថែមទៀត។ ការប្រឡងសញ្ញាបត្រ មធ្យមសិក្សាទុតិយភូមិឆ្នាំនេះ មានបេក្ខជន១១៥.២៨៤នាក់ បានចុះឈ្មោះ(ក្នុងនោះ៩០.១២០ជាបេក្ខជនចំណេះទូទៅ ,បេក្ខជនស្វ័យរិន១៧.០៣១នាក់, បេក្ខជនបំពេញវិជ្ជា៤.៤២៥នាក់ និងបក្ខជនស្វ័យរិនបំពេញវិជ្ជា៣.៦៩២នាក់)។
សិស្សដែលប្រឡងជាប់និទ្ទេសD នៅមណ្ឌលវិទ្យាល័យជាស៊ីមបឹងកេងកងបាននិយាយថា ពួកគេត្រេកអណាស់ដែលប្រឡងជាប់សញ្ញបត្រទុតិយភូមិនៅឆ្នាំនេះ ខណៈពេលដែលក្រសួងអប់រំពង្រឹងគុណភាពសិក្សា។ សិស្សនារីមកខណ្ឌចម្ការមនម្នាក់ បានលើកដៃឡើងលើលោតចុះឡើងពេលដែលនាងឮឈ្មោះថាប្រឡងជាប់។ នាងនិយាយថា ”ខ្ញុំជាប់ដោយសមត្ថភាពមែន។ ជោគជ័យបានមកពីការខិតខំណាស់ទើបជាប់”។ ចំណែកសិស្សធ្លាក់មិនឮឈ្មោះបានសម្រក់ទឹកភ្នែកឱនមុខមិននិយាយជាមួយអ្នកសារព័ត៌មានព្រោះខកចិត្តមិននឹកថាមិនជាប់ធ្វើសំណេរបានច្រើនដែរនេះដោយសារមិនបានធ្វើចប់គ្រប់វិញ្ញាសា។
ទោះបីយ៉ាងណាលោកនាយកសាលាបានប្រកាសថា លទ្ធផលទាំងនេះជាការខិតខំរបស់សិស្ស ពេញមួយឆ្នាំសិក្សា អ្នកធ្លាក់អាចរៀន១ឆ្នាំទៀត ហើយអ្នកជាប់បន្តការសិក្សាទៅមុខ។ ជាការកត់សម្គាល់លទ្ធផលប្រឡងត្រូវបានក្រសួងប្រកាសនៅតាមមណ្ឌលសំណេរទាំង២៥មណ្ឌលនៅរាជធានីភ្នំពេញ និងខេត្តកណ្តាល នៅរសៀលថ្ងៃទី៩កញ្ញា និងខេត្តនានានៅថ្ងៃទី១០ កញ្ញា។ ផ្ទុយពីការអះអាងរបស់រដ្ឋមន្ត្រីដែលថានិទ្ទេស(A) អាចជាប់ច្រើនជាងឆ្នាំមុន។ សិស្សជាប់មានតិចនៅក្នុងបន្ទប់ប្រឡងដែលមាន២៥នាក់ មាន៥ឬ៦នាក់ ជាប់ ធ្លាក់ច្រើនជាងជាប់។
ក្រសួងអប់រំបានលើកឡើងថា សិស្សនៅរាជធានីភ្នំពេញជាប់និន្ទេសA=១៣៥នាក់ ខេត្តសៀមរាបA=២១នាក់ ខេត្តកណ្ទាលA=១៦នាក់ ខេត្តបាត់ដំបង១៥នាក់ ខេត្តតាកែវ A=១៥នាក់ ខេត្តកំពង់ចាមA=១៣នាក់ ខេត្តកំពតA=១១នាក់ ខេត្តត្បូងឃ្មុំA=៩នាក់ ខេត្តកំពង់ធំ៩នាក់ ខេត្តកំពង់ឆ្នាំA=៩នាក់ ខេត្តបន្ទាយមានជ័យ៩នាក់ ខេត្តព្រៃវែងA=៨នាក់ ខេត្តក្រចេះA=៦នាក់ ខេត្តពោធិ៍សាត់A=៤នាក់ ខេត្តស្វាយរៀងA=៣នាក់ ខេត្តកំពង់ស្ពឺA=៣នាក់ ខេត្តព្រះសីហនុA=៣នាក់ និងខេត្តមណ្ឌលគិរីA=១នាក់៕
ចែករំលែកព័តមាននេះ