ខេត្តពោធិ៍សាត់ ៖ សេចក្តីរាយការបឋមឱ្យដឹងថា កាលពីវេលាម៉ោងជាង៥ល្ងាចថ្ងៃទី៧ កញ្ញា មានករណី
ហឹង្សាប្តីវាយប្រពន្ធ រហូតដល់ស្លាប់ ដោយគ្រាន់តែប្រពន្ធសុំទៅសុីឈ្នូលដកដំឡូងគេ ហេតុការនេះ បានកើតឡើង នៅចំណុចភូមិអង្គ្រង ឃុំសំរោង ស្រុកភ្នំក្រវាញ ខេត្តពោធិសាត់ ។
ជនសង្ស័យជាប្តីឈ្មោះ ឈន ឆេង ភេទប្រុស អាយុ៥១ឆ្នាំ រីឯស្រី្តជាប្រពន្ធឈ្មោះ ម៉ៃ ហ៊ិន អាយុ៥៤ឆ្នាំ រស់នៅភូមិ-ឃុំខាងលើ ។ ក្រោយពីសម្លាប់ប្រពន្ធរួច ជនសង្ស័យបានព្យាយាមរត់គេចខ្លួន ប៉ុន្តែកន្លះម៉ោងក្រោយមក ក៏ត្រូវសមត្ថកិច្ចចាប់ខ្លួន នៅចំណុចមុខរដ្ឋបាលព្រៃឈើ ក្នុងភូមិដំណាក់ឈើក្រំ ឃុំសំរោង ស្រុកភ្នំក្រវាញ ។
នៅចំពោះមុខសមត្ថកិច្ច ជនសង្ស័យបានសារភាពថា មុនកើតហេតុ ប្រពន្ធបានសុំខ្លួនថា ទៅសុីឈ្នួលដកដំឡូងឱ្យគេ ព្រោះតែក្រុមគ្រួសារមានជីវភាពក្រីក្រ ។ ពេលឮប្រពន្ធនិយាយយ៉ាងដូច្នេះ ខ្លួនមានគំនិតហាមឃាត់មិនឱ្យទៅទេ ទី១-គឺខ្មាស់អ្នកស្រុក និងទី២-មិនចង់ឱ្យប្រពន្ធឃ្លាតឆ្លាយពីខ្លួន ។
តាមសំដីចុងក្រោយនេះ ជនសង្ស័យហាក់ដូចជាមានគំនិតប្រចណ្ឌប្រពន្ធផងដែរ បានជាមិនចង់ឲ្យប្រពន្ធទៅឆ្ងាយពីខ្លួន ។ ចម្លើយជនសង្ស័យបន្តថា នៅពេលខ្លួនបានហាមឃាត់ប្រពន្ធមិនឲ្យចេញ ទៅសុីឈ្នួលដកដំឡូងឲ្យគេ ក៏មានការឈ្លោះប្រកែកគ្នាខ្លាំងៗ ពេលនោះ ខ្លួនបានស្លុះទៅវាយប្រពន្ធជាច្រើនដៃ ចំកណ្តាលមុខ បណ្តាលប្រពន្ធដួលដេកដួលលើដីសន្លប់បាត់ស្មារតី ។ គួបផ្សំមានជំងឺលើសឈាមផង ក៏ដាច់ខ្យល់ស្លាប់បាត់ទៅ ។
នៅពេលដឹងថា ប្រពន្ធស្លាប់ហើយនោះ ជនសង្ស័យជាប្តីបានព្យាយាមរត់គេចខ្លួន តែព្រលឹងប្រពន្ធទាញឲ្យវិលវល់ មិនឲ្យគេចផុតពីសំណាញ់ច្បាប់ ។
ចែករំលែកព័តមាននេះ