ខេត្តបន្ទាយមានជ័យ ៖ តាមសេចក្តីរាយការណ៍បឋមបានឱ្យដឹងថា មានហេតុការណ៍គ្រោះថ្នាក់ចរាចរណ៍មួយបានកើតឡើងគួរឲ្យរន្ធត់ រវាងរថយន្តធុនតូចបើកទៅបុករថយន្តធុនធំក្នុងទិសដៅផ្ទុយគ្នា។ ករណីនេះបង្កឲ្យមានការភ្ញាក់ផ្អើលនេះបានកើតឡើងកាលពីវេលាម៉ោង៥និង៣០ព្រឹក ថ្ងៃទី៦ កញ្ញា ២០១៨ ក្នុងទីប្រជុំជន លើផ្លូវជាតិលេខ៥ ត្រង់ចំណុចខាងកើតផ្លូវចូលភូមិអញ្ចាញ ប្រហែល១០០ម៉ែត្រ ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ទោ សួន នីប៉ូ នាយរងការិយាល័យ ចរាចរណ៍ជើងគោកបានឲ្យដឹងថា អ្នកបើកបររថយន្តធុនតូចឈ្មោះ សឹម សុភ័ណ្ឌណារិទ្ធិ ភេទប្រុស អាយុ២៥ឆ្នាំ ភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ រីឯអ្នករួមដំណើរចំនួន៣នាក់ក្នុងនោះរួមមាន ១-ឈ្មោះ ស៊ុត ប៊ុនធឿន ភេទប្រុស អាយុ២៩ឆ្នាំ ភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ២-ឈ្មោះ នួន រិទ្ធី ភេទប្រុស អាយុ២៥ឆ្នាំ ភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ និង៣-ឈ្មោះស្រី ភេទស្រី អាយុ១៨ឆ្នាំ ទាំងអ្នកបើកបរនិងអ្នករួមទាំងដំណើររបួសធ្ងន់ចំនួន៤នាក់ ក្នុងនោះស្រី១នាក់ ។ ចំណែកអ្នកបើកបររថយន្តធុនធំឈ្មោះប៉ោ សុផុន អាយុ៣៨ឆ្នាំ នៅភូមិសន្សំកុសល១ សង្កាត់ បឹងទំពុន ខ័ណ្ឌមានជ័យ រាជធានីភ្នំពេញ។
លោកនាយរងការិយាល័យ បានបញ្ជាក់ថា មុនពេលកើតហេតុ រថយន្តធុនតូចម៉ាកវីហ្គោ ពណ៌ខ្មៅគ្មានស្លាកលេខ បានបើកបរពីទិសខាងលិចទៅកើត ចំណែករថយន្តធុនធំមានដឹកទំនិញ បានបើកបរពីកើតទៅលិច លុះមកដល់ចំណុចកើតហេតុ សង្ស័យអ្នកបើករថយន្តធុនតូចងងុយដេក បានរេចង្កូតទៅបុកនឹងរថយន្តធំ ធ្វើឱ្យរថយន្តទាំង២គ្រឿងធ្លាក់ចេញពីលើផ្លូវជាតិ បណ្តាលឲ្យអ្នកបើកបរ និងអ្នករួមដំណើររងរបួសធ្ងន់ ត្រូវបានបញ្ជូនទៅកាន់មន្ទីរពេទ្យ។
ចំណែករថយន្តធុនតូចបានរងការខូចខាតធ្ងន់ផ្នែកមួយកំណាត់មុខ ចំពោះរថយន្តធុនធំបានរងការខូចខាតស្រាល ។ បច្ចុប្បន្នរថយន្តទាំង២គ្រឿងត្រូវបានសមត្ថកិច្ចយកមករក្សាទុកនៅការិយាល័យចរាចរណ៍ រង់ចាំធ្វើការដោះស្រាយនៅពេលក្រោយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ