រាជធានីភ្នំពេញ ៖ ក្រុមអ្នកគាំទ្រលោកសម រង្ស៊ី គ្រប់បណ្តារាជធានីខេត្តធ្វើញត្តិគាំទ្រឲ្យលោកសម រង្ស៊ី វិលមកដឹកនាំគណបក្សសង្គ្រោះជាតិឡើងវិញ ខណៈដែលលោក កឹម សុខា កំពុងជាប់ពន្ធនាគារ១ឆ្នាំ គិតត្រឹមថ្ងៃទី0៣ ខែកញ្ញានេះ ។
អ្វីដែលសំខាន់ការធ្វើញត្តិរបស់ក្រុមអ្នកគាំទ្រលោក សម រង្ស៊ី នេះបានបង្ហាញពីការបែកបាក់ផ្ទៃក្នុងរបស់ក្រុមអ្នកគាំទ្រលោក កឹម សុខា និងលោក សម រង្ស៊ី តែម្តង ។ យោងតាមខ្លឹមសារញត្តិដែលចេញផ្សាយនៅយប់ថ្ងៃទី0៣ កញ្ញានេះ ដោយមានការចុះហត្ថលេខាពីតំណាងប្រធានក្រុមការងារថ្នាក់ខេត្តអតីតគណបក្សសង្គ្រោះជាតិ បានលើកឡើងយ៉ាងដូច្នេះថា យើងខ្ញុំទាំងអស់គ្នា ជាតំណាងក្រុមការងារ និងសមាជិក គណបក្សសង្គ្រោះជាតិនៅតាមខេត្តរាជធានីនានានៃប្រទេសកម្ពុជា សូមប្រកាសគាំទ្រយ៉ាងពេញទំហឹង ចំពោះលោក សម រង្ស៊ី ដែលសម្រេចចិត្តវិលត្រឡប់មកដឹកនាំគណបក្សសង្គ្រោះជាតិឡើងវិញ តាមរយៈលិខិតចំហរជូនជនរួមជាតិខ្មែរ កាលពីថ្ងៃទី០១ ខែកញ្ញា ឆ្នាំ២០១៨ កន្លងទៅនេះ ។
ញត្តិបានលើកឡើងទៀតថា ការវិលត្រឡប់របស់លោក សម រង្ស៊ី នេះ គឺជាការបញ្ចប់ ទាំងស្រុងនូវការគ្រប់គ្រងគណបក្សបែបគ្រួសារនិយម និងបក្ខពួកនិយម ដែលគណបក្សនេះ បានរងគ្រោះចាប់ពីតាំងពីលោកប្រធាន (សម រង្ស៊ី) សម្រេចលះបង់តំណែងជាប្រធានគណ បក្ស កាលពីខែកុម្ភៈ ឆ្នាំ២០១៧កន្លងមកនេះ ។ ក្រុមអ្នកគាំទ្របានគូសបញ្ជាក់ក្នុងលិខិតយ៉ាងដូច្នេះថា «យើងខ្ញុំពិតជាពេញចិត្ត ស្វាគមន៍លោកប្រធាន សម រង្ស៊ី ដឹកនាំបន្តទៀត ។ គណបក្សសង្គ្រោះជាតិក្រោក ការដឹកនាំនាពេលកន្លងទៅ ស្ថិតក្រោមតែមនុស្សប៉ុន្មានប៉ុណ្ណោះ និងសម្រេចធ្វើឡើង ដោយប្រកាន់បក្ខពួក និងនិន្នកានយោបាយរវាងក្រុម សម រង្ស៊ី និងកឹម សុខា និយម» ។
ញត្តិគូសបញ្ជាក់បន្ថែមថា ៖«យើងខ្ញុំក៏សូមទាត់ចោលផងដែរ នូវការតែងតាំងកញ្ញា កឹម មនោវិទ្យា ជាតំណាងស្របច្បាប់របស់លោកប្រធាន កឹម សុខា ព្រោះការតែងតែងនេះ មិនស្រប តាមលក្ខន្តិកបក្ស និងជាការប្រមាថចំពោះអ្នកគាំទ្រគណបក្សសង្គ្រោះជាតិយ៉ាងធ្ងន់ធ្ងរបំផុត ។ យើងខ្ញុំមិនគាំទ្រសមាសភាពអាក្រក់បំផ្លាញបក្សទៀតឡើយ និងសូមទទួលស្គាល់នូវតម្លៃ នាំការលះបង់របស់លោកប្រធាន សម រង្ស៊ី ក្នុងការស្វែងរកអន្តរាគមន៍នានា ដើម្បីជួយសង្គ្រោះបក្សឲ្យរស់ឡើងវិញ នៅក្នុងពេលឆាប់ៗខាងមុខនេះ» ។
សូមជម្រាបការធ្វើញត្តិរបស់ក្រុមអ្នកគាំទ្រលោក សម រង្ស៊ី បន្ទាប់ពីតុលាការរាជធានីភ្នំពេញសម្រេចបន្តឃុំខ្លួន លោក កឹម សុខា បណ្តោះអាសន្នចំនួន៦ខែ បន្តទៀត ដើម្បីធ្វើការស៊ើប អង្កេតក្នុងសំណុំរឿងក្បត់ជាតិ ឬសិន្និដ្ឋិភាពជាមួយបរទេស ហើយរហូតមកដល់ពេលនេះ លោក កឹម សុខា បានជាប់ពន្ធនាគារ១ឆ្នាំហើយ ។ ជាងនេះទៅទៀតការធ្វើញត្តិនេះ បន្ទាប់ពីលោក សម រង្ស៊ី បានប្រកាសពីក្រៅប្រទេសថា លោកនឹងធ្វើការដឹកនាំគណបក្សសង្គ្រោះជាតិឡើងវិញទោះបីមិនមានការចូលរួមពីអ្នកគាំទ្រលោក កឹម សុខា ក៏ដោយ ។ ជាមួយគ្នានោះដែរអតីតមន្ត្រីជាន់ខ្ពស់គណបក្សសង្គ្រោះជាតិ លោក ហុង លីម ធ្លាប់លើកឡើងឲ្យលោក សម រង្ស៊ី លាឈប់ពីឆាកនយោបាយ ព្រោះលោក សម រង្ស៊ី ធ្វើនយោបាយមិនដែលឈ្នះម្តងណាឡើយ ដោយទុក្ខឲ្យកូនស្រីលោក កឹម សុខា ដឹកនាំគណបក្សវិញ ។
លោក កឹម សុខា ត្រូវបានសមត្ថកិច្ចចាប់ខ្លួននៅយប់រំលងអធ្រាត្រឈានចូលថ្ងៃទី០៣ ខែកញ្ញា ឆ្នាំ២០១៧ បន្ទាប់ពីមានការបែកធ្លាយវីដេអូមួយបង្ហាញថា លោកបានសារភាពអំពីការអនុវត្តតាមការបង្គាប់បញ្ជារបស់បរទេសក្នុងគោលបំណងផ្តួលរំលំរាជរដ្ឋាភិបាលកម្ពុជាជាយូរណាស់មកហើយ ។ លោក កឹម សុខា ត្រូវបានតុលាការឃុំខ្លួនដាក់ពន្ធនាគារបណ្តោះអាសន្ន កាល ពីថ្ងៃទី០៦ ខែកញ្ញា ឆ្នាំ២០១៧ ដោយចោទប្រកាន់ពីបទល្មើស «ក្បត់ជាតិ» ដែលអាចប្រឈមមុខនឹងការជាប់ពន្ធនាគារពី១៥ឆ្នាំទៅ៣០ឆ្នាំ ។
អយ្យការអមសាលាដំបូងរាជធានីភ្នំពេញបានបង្ហាញថា លោក កឹម សុខា ជាប់ចោទប្រកាន់ពីបទ «សន្និដ្ឋិភាពជាមួយបរទេស» តាមមាត្រា៤៤៣ នៃក្រមព្រហ្មទណ្ឌ ៕
ចែករំលែកព័តមាននេះ