រាជធានីភ្នំពេញ ៖ បុរសជាជាងសំណង់ដែលអះអាងថា មានអាការមិនសូវស្រួលខ្លួន ក៏បបួលមិត្តភក្តិឲ្យជូនទៅម៉ាស្សាកោសជប់ស្រាប់តែពេលចេញមកវិញក៏បាត់លុយ ដែលនៅក្នុងកាបូបជាង៤០ម៉ឺនរៀល ក៏កើតមានការឈ្លោះប្រកែកគ្នាផ្អើល ដល់សមត្ថកិច្ចចុះមកអន្តរាគមន៍ កាលពីវេលាម៉ោង១ និង១០នាទីរំលងអធ្រាត្រឈានចូលថ្ងៃទី២៣ សីហា ត្រង់ចំណុចហាងម៉ាស្សាកោស-ជប់យីហោហេងហេង នៅទល់មុខស្ថានីយប្រេងឥន្ធនៈលីមឡុង តាមបណ្តោយផ្លូវ២០០៤ ស្ថិតក្នុងសង្កាត់អូរបែកក្អម ខណ្ឌសែនសុខ ។
ជនរងគ្រោះមានឈ្មោះ ម៉េង ធី ភេទប្រុស អាយុ៣៥ឆ្នាំ ជាជាងសំណង់ ស្នាក់នៅក្នុងការដ្ឋានសំណង់មួយកន្លែងក្បែរកន្លែងកើតហេតុ ។ បើតាមសម្តីពីបុរសដែលអះអាងថាបាត់ប្រាក់បានរៀបរាប់ប្រាប់ឲ្យដឹងថា នៅមុនពេលកើតហេតុរូបគាត់បានបបួលមិត្តភក្តិដែលធ្វើការជាមួយគ្នាពីរនាក់ទៀតឲ្យជូនទៅរកកន្លែងម៉ាស្សាកោស-ជប់ព្រោះគាត់មានអាការមិនសូវស្រួលខ្លួន ។
ខណៈពេលពួកគាត់នាំគ្នាទៅហាងកោស-ជប់ តែខណៈពេលទៅដល់គាត់ក៏បានចូលទៅខាងក្នុងហាងតែម្នាក់ឯង ដោយឡែកមិត្តភក្តិពីរនាក់ទៀតនៅអង្គុយចាំខាងក្រៅ ។ បុរសរូបនេះបន្តថា ពេលចូលទៅក្នុងបន្ទប់មួយ មាននារីម្នាក់ចូលទៅជាមួយផងដែរ បន្ទាប់មកនារីម្នាក់នោះក៏បានឲ្យគាត់ដោះខោអាវចេញពីខ្លួន ហើយដេកផ្កាប់មុខទៅលើពូក ដើម្បីកោស-ខ្យល់ឱ្យ ។ ពេលកោស-ខ្យល់រួចរាល់ហើយ គាត់ក៏បានដកកាបូបលុយចេញពីក្នុងហោប៉ៅខោយកលុយចំនួនមួយម៉ឺនរៀលឲ្យទៅនារីខាងលើក៏ឃើញលុយក្រដាស៥ម៉ឺនរៀលរបស់គាត់មកនៅថតខាងក្រៅកាបូបលុយ ។
ពេលនោះគាត់ក៏ចាប់ផ្តើមមានការងឿងឆ្ងល់ ព្រោះនៅមុនពេលដែលគាត់ចូលទៅកោស-ជប់ គាត់មានលុយក្នុងកាបូបទាំងអស់ចំនួនជាង៦០ម៉ឺនរៀល ហើយលុយក្រដាសប្រាំម៉ឺនទាំងអស់ ។ តែពេលចេញពីកោស-ជប់វិញស្រាប់តែឃើញលុយក្រដាស់ប្រាំម៉ឺននៅថតខាងក្រៅកាបូបទៅវិញដែលខុសពីគាត់ដាក់ក្នុងរ៉ូតទាំងអស់ ។ ពេលនោះគាត់ក៏បានរាប់លុយក្នុងកាបូបឃើញនៅសល់លុយតែជិតដប់ម៉ឺនរៀល ទើបដឹងថាបាត់លុយអស់ជាង៤០ម៉ឺនរៀល ។
ប្រភពដដែលបន្តថា ភ្លាមៗនោះគាត់ក៏បានទៅសួរនាំនារីដែលកោសខ្យល់ឱ្យរូបខ្លួន តែនារីម្នាក់នោះបានប្រកែកថា នាងមិនដឹងនិងមិនបានលួចលុយគាត់នោះទេ ។ ប៉ុន្តែគាត់នៅតែប្រាកដថាលុយរបស់គាត់ដែលបាត់នោះ គឺត្រូវនារីខាងលើជាអ្នកលួច ទើបបង្កឲ្យមានការឈ្លោះប្រកែកគ្នាតឹងសរសៃក ហើយបន្ទាប់មកក៏មានបុរសម្នាក់ដែលជាតំណាងខាងហាងម៉ាស្សាបានចេញមកដោះស្រាយ ដោយព្រមចេញសំណងចំនួន២០ម៉ឺនរៀលឱ្យគាត់ដើម្បីបញ្ចប់រឿង តែគាត់មិនព្រមនោះទេ គឺចង់បានលុយគ្រប់ចំនួនដែលបាត់ត្រលប់មកវិញ ។ ដោយដោះស្រាយគ្នាមិនចេញក៏បានរាយការណ៍ជូនសមត្ថកិច្ចមូលដ្ឋានឲ្យចុះជួយអន្តរាគមន៍ ។
ក្រោយពេលកើតហេតុសមត្ថកិច្ចមូលដ្ឋានក៏បានចុះមកធ្វើការសម្របសម្រួល ភាគីទាំងពីរហើយបុរសដែលជាតំណាងភាគីខាងហាងម៉ាស្សាបានយកលុយចំនួន១០០ដុល្លារឱ្យទៅបុរសម្ចាស់លុយ ដោយមិនចង់មានរឿងវែងឆ្ងាយក៏ព្រមទទួលយកទាំងមិនអស់មិនហើយក្នុងចិត្ត ៕
ចែករំលែកព័តមាននេះ