រាជធានីភ្នំពេញ ៖ បុរសម្នាក់ស្រវឹងស្រាជោគជាំ បើករថយន្តលឿនដូចហោះទៅបុកនឹងម៉ូតូរ៉ឺម៉កកង់៣ មួយគ្រឿង ដឹកផ្លែឈើពេញរទេះពីក្រោយ បណ្តាលឲ្យប៉ើងខ្ទាតទៅលើសួនក្រឡាប់ផ្ងារជើងចាក់ផ្លែឈើពេញសួន និងបណ្តាលឲ្យម្ចាស់កងបីរងរបួសធ្ងន់ ដែលហេតុការណ៍នេះបានកើតឡើង កាលពីវេលាម៉ោង២រំលងអធ្រាត្រឈានចូលថ្ងៃទី២៤ ខែសីហា នៅតាមបណ្ដោយផ្លូវ២១៧ ទល់មុខមុខវត្តស្ទឹងមានជ័យ សង្កាត់ស្ទឹងមានជ័យ១ ខណ្ឌមានជ័យ ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនកើតហេតុ គឺគេឃើញមានបុរសចំណាស់ម្នាក់ បើកម៉ូតូរ៉ឺម៉កកង់បីមួយគ្រឿងនៅក្នុងនោះមានដឹកផ្លែឈើចម្រុះពេញរ៉ឺម៉កធ្វើដំណើរ តាមបណ្តោយផ្លូវ២១៧ ក្នុងទិសដៅពីជើងទៅត្បងលុះមកដល់កន្លែងកើតហេតុស្រាប់តែមានរថយន្តបង្កមួយគ្រឿង ម៉ាកកាមរីបាឡែន ពណ៌ស្ករ ពាក់ស្លាកលេខ ភ្នំពេញ2Y- 8597 បើកបរដោយបុរសម្នាក់ក្នុងស្ថានភាពស្រវឹងស្រាជោគជាំ ធ្វើដំណើរស្របទិសគ្នា ក្នុងល្បឿនលឿនដូចហោះមកបុកពីក្រោយរ៉ឺម៉កពេញទំហឹង បណ្តាលឲ្យម៉ូតូកង់នោះប៉ើងហោះទៅលើក្រឡាប់ផ្ងារជើងលើសួនចាក់ផ្លែឈើពេញលើសួនច្បារមុខវត្តស្ទឹងមានជ័យ និងបណ្តាលឲ្យអ្នកបើកម៉ូតូកង់បីប៉ើងផ្ងារក្រោយបោកនឹងកង់បី រងរបួសចុកអួលត្រង់ចង្កេះនិងខ្នងនិយាយមិនចេញរងរបួសធ្ងន់ត្រូវបានប្រជាពលរដ្ធទូរស័ព្ទហៅរថយន្តសង្គ្រោះដឹកទៅសង្គ្រោះនៅមន្ទីពេទ្យភ្លាមៗ ។
ភ្លាមៗបន្ទាប់ពីបុកម៉ូតូកង់បីនោះដែររថយន្តបង្កបានព្យាយាមបើករត់បន្តទៅមុខ ដល់មុខផ្សារស្ទឹងមានជ័យចាស់ ក៏ត្រូវប្រជាពលរដ្ឋដែលឃើញហេតុការណ៍ជិះម៉ូតូដេញតាមឃាត់ជាប់ទាំងអ្នកបើកបរ និងរថយន្តប្រគល់ឲ្យសមត្ថកិច្ចជំនាញចាត់ការបន្តតាមនីតិវីធី ។
បន្ទាប់ពីឃាត់រថយន្តជាប់ក៏មានវត្តមានសមត្ថកិច្ចមូលដ្ឋានចុះមកកន្លែងកើតហេតុភ្លាមៗ ហើយក៏មានសាច់ញាតិខាងជនបង្កដែលត្រូវជាបងស្រីចេញមុខជួយអន្តរាគមន៍និងដោះស្រាយជំនួសប្អូនដែរ ហើយបម្រុងនឹងឲ្យប្អូនប្រុសខ្លួនគេចខ្លួនចេញពីកន្លែងកើតហេតុ តែសមត្ថកិច្ចហាមឃាត់មិនឲ្យជនបង្កចេញឆ្ងាយពីកន្លែងកើតហេតុក៏ត្រូវខាងបងស្រីស្រែកឡូឡា និងឈ្លោះប្រកែករករឿងដាក់សមត្ថកិច្ចបង្កជាភ្ញាក់ផ្អើលពេញដងផ្លូវ ។
ក្រោយកើតហេតុបុរសចំណាស់ជាម្ចាស់កង់បីត្រូវបានរថយន្តសង្គ្រោះគ្លីនិកឯកជនដឹកយកទៅសង្គ្រោះនៅមន្ទីរពេទ្យភ្លាមៗ ចំណែកម៉ូតូកង់បី និងរថយន្តបង្ករួមទាំងអ្នកបើកបរត្រូវបានសមត្ថកិច្ចមូលដ្ឋានប្រគល់ឲ្យទៅសមត្ថកិច្ចជំនាញចរាចរណ៍ក្រុងយកទៅរក្សាទុកនៅអធិកាដ្ឋាននគរបាលចរាចរណ៍ ស្នងការដ្ឋាននគរបាលជាតិរង់ចាំជនរងគ្រោះជាសះស្បើយពីរបួសចូលខ្លួនមកដោះស្រាយគ្នានៅពេលក្រោយ ៕
ចែករំលែកព័តមាននេះ