រាជធានីភ្នំពេញ ៖ ប្រធានគណបក្សយុវជនកម្ពុជាលោក ពេជ្រ ស្រស់ ប្រកាសជំហរថា លោកមិនចាយថវិកាដែលបានមកពីការធ្វើជាទីប្រឹក្សារាជរដ្ឋាភិបាលនោះទេ ប៉ុន្តែយកទៅបរិច្ចាគផ្នែកសប្បុរសធម៌វិញ។ ការប្រកាន់ជំហរនេះ បន្ទាប់បីប្រមុខរាជរដ្ឋាភិបាលកម្ពុជា…
រាជធានីភ្នំពេញ ៖ ប្រធានគណបក្សយុវជនកម្ពុជាលោក ពេជ្រ ស្រស់ ប្រកាសជំហរថា លោកមិនចាយថវិកាដែលបានមកពីការធ្វើជាទីប្រឹក្សារាជរដ្ឋាភិបាលនោះទេ ប៉ុន្តែយកទៅបរិច្ចាគផ្នែកសប្បុរសធម៌វិញ។
ការប្រកាន់ជំហរនេះ បន្ទាប់បីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែនបាន ប្រកាសផ្តល់តួនាទីដល់គណបក្សនយោបាយចំនួន១៦ ដែលមិនជាប់ឆ្នោតធ្វើជាទីប្រឹក្សា ដោយបានបង្កើតជា «ឧត្តមក្រុមប្រឹក្សាពិគ្រោះ និងផ្តល់យោបល់» កាលពីថ្ងៃទី២១ ខែសីហា កន្លងមកនេះ ។
លោក ពេជ្រ ស្រស់ បានបញ្ជាក់ថា ឲ្យដឹងនៅថ្ងៃទី២២ សីហា យ៉ាងដូច្នេះថា «ខ្ញុំពេជ្រ ស្រស់សូមប្រកាសជាសាធារណៈថា បើសិនជាខ្ញុំទទួលបានប្រាក់ខែតាមមុខងារជាស្ថាពរនោះ ខ្ញុំនឹងយកប្រាក់ខែនៃខ្ញុំផ្ទាល់នេះ ទៅបែងចែកជូនដល់ដូចជា ១- ប្រាក់ខែ៣០% លើចំនួនសរុបនឹងជូនដល់កីឡាករគុនខែ្មរ ដែលពួកគាត់ជួបនូវទុក្ខ និងរងរបួសធ្ងន់ពីការប្រកួត ២- ប្រាក់ខែ ៣៥% លើចំនួនសរុបនឹងជូនមន្ទីរពេទ្យគន្ធបុប្ផា ៣- ប្រាក់ខែ៣៥% លើចំនួនសរុបនឹងជូនដល់ ចាស់ៗជរាដែលគ្មានទីពឹង និងមានជីវភាពក្រីក្រលំបាកនៅតាមទីជនបទ ។
ទោះបីជាមិនដឹងថា ចំនួនប្រាក់ខែដែលបានមកតួនាទីប្រឹក្សារដ្ឋាភិបាលប៉ុន្មានក្តីលោក ពេជ្រ ស្រស់ បានអះអាងថា ប្រាក់ខែទាំងនោះនឹងផ្តល់ជូនពេញ៥ឆ្នាំតែម្តង ដូច្នេះលោកមិនបាន យកប្រាក់ខែដែលនឹងបានពីមុខតំណែងក្នុងពេលខាងមុខនេះ ធ្វើជាទ្រព្យសម្បត្តិផ្ទាល់ខ្លួនខ្ញុំនោះទេ ពីព្រោះថា ថវិកាទាំងនេះ គឺជារបស់បងប្អូន ។
ប្រធានគណបក្សយុវជនរូបនេះបានលើកឡើងថា មានអ្នកនយោបាយមួយចំនួននោះ គឺមិនស្គាល់អ្វីទៅហៅថា ពិគ្រោះយោបល់ផងនឹង ហើយមកតាំងខ្លួនឯងជាក្រុមស្អាតស្អំជាងគេ ធ្វើ ទៅដល់ប្រធានគណបក្សមួយទាំងមូល ល្ងង់សូម្បីតែពាក្យពិគ្រោះយោបល់យល់មិនបានផង ហើយបើនិយាយពីថាអួតវិញ គឺនៅអាស៊ីគ្មានពីរ ប៉ុន្តែលទ្ធផលវិញ៣អាណត្តិ រកតែជើងម៉ាមួយគ្មាន ។ លោកគូសបញ្ជាក់ថា «ហឹម ! ឱអ្នកនយោបាយស្រុកខ្មែរខ្ញុំអើយអីក៏កើតជំងឺតួរឯកច្រើនម្ល៉េះហ្ន៎…បើមេដឹកនាំនយោបាយល្ងង់ ហើយកុំសង្ឃឹមថា អ្នកគាំទ្រឆ្លាតឲ្យសោះ គឺថាល្ងង់ តាមខ្សែតែម្តង» ។ លោកបន្ថែមថា ចរិតនយោបាយលាបពណ៌របស់អ្នកនយោបាយខ្មែរនៅតែមាន បើសិនជាអ្នកនយោបាយនោះមានផ្ទុកជំងឺតួរឯកនៅក្នុងខ្លួន ដោយមិនព្រមព្យាបាល ។
សូមជម្រាបថា ការលើកឡើងរបស់ប្រធានគណបក្សយុវជនកម្ពុជានេះ បន្ទាប់ពីសម្តេច តេជោ ហ៊ុន សែន កាលពីថ្ងៃទី២១ សីហា បានសម្រេចផ្តល់តួនាទី ប្រធានគណបក្សនយោបាយចំនួន១៦ ក្នុងចំណោមគណបក្សនយោបាយ២០ ដែលចួលរួមប្រកួតប្រជែងការបោះឆ្នោត កាលពីថ្ងៃទី២៩ កក្កដា ឆ្នាំ២០១៨កន្លងមក ហើយមិនបានទទួលបានអាសនៈក្នុងរដ្ឋសភាធ្វើជាទីប្រឹក្សា ។
គណបក្សដែលចួលរួមមាន ១- គណបក្សខ្មែររួបរួមជាតិ ២-គណបក្សពន្លឺថ្មី ៣-គណ បក្សស ញ្ជាតិកម្ពុជា ៤-គណបក្សខ្មែរក្រោក ៥-គណបក្សសំបុកឃ្មុំសង្គមប្រជាធិបតេយ្យ ៦-គណបក្សសាធារណរដ្ឋប្រជាធិបតេយ្យ ៧-គណបក្សសាធារណរដ្ឋខ្មែរ ៨-គណបក្សរស្មីខេមរា ៩- គណបក្សហ្វ៊ុនស៊ិនប៉ិច ១០-គណបក្សខ្មែរអភិវឌ្ឍសេដ្ឋកិច្ច ១១-គណបក្សយុវជនកម្ពុជា ១២- គណបក្សធម្មាធិបតេយ្យ ១៣- គណបក្សឆន្ទៈខ្មែរ ១៤-គណបក្សជនជាតិដើមប្រជាធិបតេយ្យកម្ពុជា ១៥-គណបក្សខ្មែរតែមួយ ១៦- គណបក្សប្រជាជនកម្ពុជា ។ ចំណែកណបក្សនយោបាយដែលមិនប្រកាសមិនចូលរួម ហើយមិនបានតួនាទីមានចំនួន៤គឺ ១.គណបក្សមាតុភូមិយើង ២.គណបក្សប្រជាធិបតេយ្យមូលដ្ឋាន ៣. គណបក្សសម្ព័ន្ធ ដើម្បី ប្រជាធិបតេយ្យ និង៤.គណបក្សខ្មែរឈប់ក្រ ៕
ចែករំលែកព័តមាននេះ