ប្រទេសកុងហ្គោ ៖ បើតាមតុល្យការនៃការឆ្លងរាលដាលជំងឺ EBOLA នៅភាគខាងកើតសាធារណរដ្ឋប្រជាធិបតេយ្យកុងហ្គោ ចំនួនអ្នកស្លាប់ឡើងដល់៤៩នាក់ ហើយមនុស្សជាង២០០០នាក់កំពុងតាមដានចាប់តាំងពី១៨ថ្ងៃកន្លងមកនេះ។
ការឆ្លងរាលដាលជំងឺដ៏កាចសាហាវនោះមានចាប់ពីថ្ងៃទី១ សីហា មក នៅខេត្ត NORD KIVU បណ្ដាលឲ្យមនុស្សស្លាប់៤៩នាក់ ក្នុងចំណោមអ្នកឆ្លង៩០នាក់ដែលរកឃើញ។នេះបើយោងតាមព្រឹត្តិប័ត្រចុងក្រោយនៃសភាពការណ៍ឆ្លងរបស់ក្រសួងសុខាភិបាលកុងហ្គោចុះថ្ងៃទី១៨សីហា។
អង្គការសុខភាពពិភពលោកយល់ថា ចំនួនអ្នកឆ្លងជំងឺនោះនឹងមានការកើនឡើងទៀត។ អ្នកស្លាប់ភាគច្រើនដល់ទៅ៣៩នាក់កត់សម្គាល់ឃើញនៅភូមិកសិកម្មMANGINA ចម្ងាយ៣០គីឡូម៉ែត្រភាគនិរតី ក្រុងបេនី ជាប្រភពឆ្លងដំបូង។ អ្នកស្លាប់៣នាក់កត់សម្គាល់ឃើញនៅខេត្ត ITURI ជិតខាង។
ការចាក់វ៉ាក់សាំងការពារក៏ត្រូវបានធ្វើដូចការឆ្លងជំងឺនោះលើកមុននៅខេត្ត EQUATEUR ភាគពាយ័ព្យប្រទេស ដែលការបញ្ចប់ការឆ្លងនៅទីនោះត្រូវបានប្រកាសនាថ្ងៃទី២៤ កក្កដា ក្រោយការស្លាប់មនុស្ស៣៣នាក់ ក្នុងចំណោមអ្នកឆ្លង៥៤នាក់មក៕
ចែករំលែកព័តមាននេះ