ខេត្តព្រះសីហនុ ៖ នគរបាលប្រឆាំងគ្រឿងញៀនខេត្តព្រះសីហនុ ដោយមានការសម្របសម្រួលពីព្រះរាជអាជ្ញាអមសាលាដំបូងខេត្ត បានបើកយុទ្ធនាការបង្ក្រាបទីតាំងចែកចាយប្រើប្រាស់ថ្នាំញៀនទ្រង់ទ្រាយធំមួយកន្លែង ក្នុងរង្គសាលស្កាយឡាញ (បារឌីស្កូ)នៅវេលាម៉ោង១ និង៤៥នាទីរំលងអធ្រាត្រដែលប្រតិ បត្តិការនេះ បន្តធ្វើរហូតដល់ម៉ោង៥ទៀបភ្លឺ…
ខេត្តព្រះសីហនុ ៖ នគរបាលប្រឆាំងគ្រឿងញៀនខេត្តព្រះសីហនុ ដោយមានការសម្របសម្រួលពីព្រះរាជអាជ្ញាអមសាលាដំបូងខេត្ត បានបើកយុទ្ធនាការបង្ក្រាបទីតាំងចែកចាយប្រើប្រាស់ថ្នាំញៀនទ្រង់ទ្រាយធំមួយកន្លែង ក្នុងរង្គសាលស្កាយឡាញ (បារឌីស្កូ)នៅវេលាម៉ោង១ និង៤៥នាទីរំលងអធ្រាត្រដែលប្រតិ បត្តិការនេះ បន្តធ្វើរហូតដល់ម៉ោង៥ទៀបភ្លឺ ថ្ងៃទី១៦ សីហា ទើបបញ្ចប់ដោយជោគជ័យ ។
ក្នុងនោះ សមត្ថកិច្ចបានឃាត់ខ្លូនមនុស្ស៥៣នាក់ ស្រី៧នាក់ ដែលក្នុងនោះ មានជនជាតិចិន១០នាក់ ឥណ្ឌូនេស៊ី១៧នាក់ កូរ៉េ២នាក់ និងភាគច្រើនជាបុគ្គលិកបម្រើការងារ ក្នុងកាស៊ីណូហ្គោលដិនស៊ី ។ ជាមួយនេះ ក៏មានខ្មែរចំនួន២៤នាក់ និងបានរឹបអូសថ្នាំញៀន ខេតាមីន និងអិចស្តាស៊ីចំនួន២៦កញ្ចប់ ដបថ្នាំញៀនសម្រាប់លាយជាមួយទឹក៤ដប ។
លោកឧត្តមសេនីយ៍ត្រី ស៊ុន សុផាត ស្នងការរងទទួលផែនប្រឆាំងបទល្មើស និងលោកវរសេនីយ៍ទោ សួស សីលា នាយការិយាល័យប្រឆាំងគ្រឿងញៀន ដែលបានដឹកនាំកំលាំងចុះប្រតិបត្តិការផ្ទាល់បានឱ្យដឹងថា ពេលឆ្មក់ចូលឆែកឆេរនោះ គឺពួកគេកំពុងប្រេីប្រាស់ជាក់ស្តែងតែម្តង ។ លោកថា ថ្នាំញៀនទាំងនោះ បាន
រកឃើញនៅលើតុនិងគៀនៗសាឡុងអង្គុយ ក្នុងបន្ទប់ទឹកនិងទីកន្លែងផ្សេងគ្នា ក្នុងរង្គសាលដែលជាការប្រើប្រាស់ថ្នាំញៀនយ៉ាងអនាធិបតេយ្យសប្បាយអស្ចារ្យបំផុត ។ ក្រោយពេលធ្វើតេស្ដអ្នកទាំងអស់នោះសុទ្ធតែមានផ្ទុកសារធាតុញៀន គ្មានប្រកែកបានឡើយ ។ បុរសម្នាក់ក្នុងចំណោមមនុស្ស៥៣នាក់ បានសារភាពប្រាប់សមត្ថកិច្ចថា ថ្នាំញៀនទាំងនោះគឺបានទិញក្នុងរង្គសាលនេះតែម្តង ។
លោកឧត្តមសេនីយ៍ត្រី ស៊ុន សុផាត ស្នងការ រងទទួលការងារការិយាល័យកណ្តាលប្រឆាំងបទល្មើសនៃស្នងការដ្ឋាននៅព្រឹកថ្ងៃដដែល បានធ្វើសន្និសីទសារព័ត៌មានបញ្ជាក់ឱ្យដឹងថា រង្គសាលស្កាយឡាញដែលមានទីតាំងស្ថិតនៅតាមបណ្តោយវិថីឯករាជ្យក្នុងក្រុម១៨ ភូមិ៣ សង្កាត់លេខ៤ ក្រុងព្រះសីហនុ មានម្ចាស់ឈ្មោះ គ្រុយ ផាន់ណា ហៅភឿក អាយុ៣៨ឆ្នាំ ។
លោកឧត្តមសេនីយីត្រីបានឱ្យដឹងថា ដោយអនុវត្តទៅតាមគោលនយោបាយភូមិឃុំមានសុវត្ថិភាពរបស់ប្រមុខរាជរដ្ឋាភិបាល ក៏ដូចជាក្រសួងមហាផ្ទៃ និងអនុវត្តន៍ទៅតាមបទបញ្ជារបស់លោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ក្រោមការចង្អុលបង្ហាញរបស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត សមត្ថកិច្ចនគរបាល បានឆ្មក់ចូលបង្ក្រាបទីតាំងចែកចាយប្រេីប្រាស់ថ្នាំញៀនទ្រង់ទ្រាយធំមួយកន្លែងនេះ ក្នុងរង្គសាលស្កាយឡាញ(បារឌីស្កូ)នៅវេលារំលងអធ្រាត្រ ដោយបានឃាត់ខ្លួនម្ចាស់រង្គសាលខាងលើនិងជនសង្ស័យសរុបទាំងអស់៥៣នាក់ ក្នុងនោះមានស្រី្ត៧នាក់ ។
មន្ត្រីនគរបាលដែលកំពុងអនុវត្តច្បាប់បង្ក្រាបករណីនេះបានឱ្យដឹងថា បន្ទាប់ពីធ្វើការសាកសួររួច ពួកគេនិងត្រូវបញ្ជូនទៅតុលាការ ។ សមត្ថកិច្ចមិនទាន់ឱ្យដឹងទេថា តើរង្គសាលដែលមានការប្រើប្រាស់ថ្នាំញៀនយ៉ាងអនាធិបតេយ្យនេះ បានបំពាននឹងច្បាប់ដ៏ធ្ងន់ធ្ងរនេះតាំងពីពេលណាមកនោះទេ ហើយអត្តសញ្ញាណម្ចាស់រង្គសាលក៏មិនទាន់បានទម្លាយឱ្យបានច្បាស់លាស់នៅឡើយដែរ ៕
ចែករំលែកព័តមាននេះ