ខេត្តមណ្ឌលគិរី ៖ ដំរីស្រុកមួយក្បាលត្រូវបានអ្នកបច្ចេកទេសមួយក្រុមធ្វើការដឹកជញ្ជូនពីខេត្តមណ្ឌលគិរីឆ្ពោះទៅកាន់ខេត្តសៀមរាបដើម្បីចិញ្ចឹមក្នុងរីស៊តមួយកន្លែង ដើម្បីបម្រើដល់វិស័យទេសចរណ៏ដែលសកម្មភាពនេះបានធ្វើឡើង កាលពីព្រឹកថ្ងៃទី១៥ ខែសីហា ឆ្នាំ២០១៨ នៅចំណុចផ្លូវវាងក្រុងជិតចម្ការកាហ្វេ ក្នុងភូមិចំការតែ សង្កាត់ស្ពានមានជ័យ ក្រុងសែនមនោរម្យ ។
លោក សារិ ដែលជាក្រុមការងារដឹកជញ្ជូនសត្វដំរីឲ្យដឹងថា ៖«ដំរីដែលត្រូវដឹកទៅខេត្តសៀមរាប ជាដំរីឈ្មោល មានឈ្មោះ រាំងបាយ អាយុ៣៥ឆ្នាំ ដោយសព្វថ្ងៃវារស់នៅភូមិទួល ឃុំមេម៉ង់ ស្រុកកែវសីមា ហើយត្រូវបានលោក Hasewgawa Tamotsu ម្ចាស់ Resort ជួលពីហ្មរបស់វាក្នុងរយៈពេល១០ឆ្នាំ ដោយក្នុងមួយខែទទួលបានប្រាក់ចំនួន៤លានរៀល» ។
លោក សារិ បន្តថា ៖«សត្វដំរីឈ្មោលខាងលើនឹងត្រូវគេយកទៅថែរក្សាក្នុងព្រៃដែលត្រូវបានម្ចាស់ Resort រៀបចំទុកជាស្រាច់សម្រាប់វា ដោយមានហ្ម និងមន្ត្រីពេទ្យសត្វ ដែលជំនាញលើការគាំពារសត្វដំរីនៅមើលថែ» ។
លោកបានបញ្ជាក់ថា ៖«ដំរីនេះគេមិនយកទៅឲ្យដឹកភ្ញៀវទេសចរណ៏នោះទេ ពោលគឺគេគ្រាន់តែយកវាទៅព្រលែងនៅព្រៃ Resort ដើម្បីឲ្យអ្នកទេសចរណ៏បរទេសថតរូបកម្សាន្តប៉ុណ្ណោះ» ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលលគិរីឲ្យថា សព្វថ្ងៃនៅទូទាំងព្រៃខេត្តមណ្ឌលគិរីផ្អែកទៅតាមការសិក្សារបស់អ្នកជំនាញមានដំរីជាង២០០ក្បាល ។
លោកបន្តថា ចាប់ពីខែមិថុនា ២០១៨ មន្ទីរបរិស្ថាននឹងសហការជាមួយអង្គការ WWF សិក្សាជាថ្មីលើរបាយការណ៍ចំនួនសត្វដំរីក្នុងខេត្តមណ្ឌលគិរីឡើងវិញ ៕
ចែករំលែកព័តមាននេះ