ខេត្តប៉ៃលិន ៖ រហូតមកដល់ពេលនេះនៅក្នុងចម្ការដំណាំសាវម៉ាវមួយកន្លែង ស្ថិតនៅក្បែររមណីយដ្ឋានអាងជីងចក់ ក្រុងប៉ៃលិន ចាប់ផ្តើមទុំជាបណ្តើរៗហើយ ដែលជាហេតុធ្វើឱ្យមេការនៅក្នុងចម្ការម្នាក់ ធ្វើការអំពាវនាវដល់ប្រជាពលរដ្ឋ និងភ្ញៀវទេសចរដែលចូលទៅលេងកម្សាន្តសប្បាយនាថ្ងៃឈប់សម្រាកនៅចុងសប្តាហ៍ឱ្យឈាងចូលទៅទិញផ្លែឈើមួយនេះ ដើម្បីយកមកទទួលទានព្រោះ វាមានរសជាតិផ្អែមឆ្ងាញ់ដូចគេលាយស្ករអញ្ចឹង ។
ប្រភពព័ត៌មានពីស្ត្រីម្នាក់ឈ្មោះ រ័ត្ន រ៉ាត់ អាយុ៤០ឆ្នាំ ជាមេការចម្ការខាងលើដែលមានប្តីឈ្មោះ សុខ វិន អាយុ៤៥ឆ្នាំ រស់នៅភូមិកូនភ្នំ សង្កាត់អូរតាវ៉ៅ ក្រុងប៉ៃលិនបានឱ្យដឹងថា គាត់ស៊ីឈ្នួលចាំចម្ការឱ្យថៅកែម្នាក់ឈ្មោះ ណូ រស់នៅក្នុងទីក្រុងភ្នំពេញ ។
ប្រភពបន្តទៀតថា នៅក្នុងចម្ការដ៏ធំល្វឹងល្វើយនេះ ម្ចាស់ចម្ការបានដាំដំណាំជាច្រើនប្រភេទដូចជា អំពិលផ្អែម តាង៉ែន ហៅមៀនប៉ៃលិន ស្វាយកែវរមៀត និងដំណាំសាវម៉ាវជិត២០០ដើម ដែលកំពុងទុំស្ទើរតែអស់ទៅហើយ ។ រហូតមកដល់រសៀលថ្ងៃទី១៣ ខែសីហា ឆ្នាំ២០១៨នេះគាត់ក៏បេះលក់ជាបណ្តើរៗដោយជួនកាលមានប្រជាពលរដ្ឋរស់នៅក្នុងក្រុងប៉ៃលិនកុម្ម៉ង់ទិញយកទៅទទួលទានជួបជុំក្រុមគ្រួសារក៏មានភ្ញៀវទេសចរមួយចំនួនដែលបើកបររថយន្តទៅលេងរមណីយដ្ឋានអាងជីងចក់ចូលទៅទិញរហូតដល់ក្នុងចម្ការផងដែរ ។
គាត់បញ្ជាក់ទៀតថា សាវម៉ាវខាងលើមិនមានការប្រើជីគីមីដែលប៉ះពាល់ដល់សុខភាពប្រជាពលរដ្ឋនោះទេ ដោយគាត់គ្រាន់តែប្រើជីលាមកសត្វគោ សត្វមាន់ និងសត្វទាតែប៉ុណ្ណោះ ។ លើសពីនេះផ្លែសាវម៉ាវនេះ មានរសជាតិផ្អែមឈ្ងុយឆ្ងាញ់មិនចាញ់សាវម៉ាវថៃប៉ុន្មាននោះទេ ហើយថែមទាំងមានលក្ខណៈធម្មជាតិសុទ្ធសាធទៀតផង ។
ដូច្នេះគាត់ក៏សូមអំពាវនាវដល់អតិថិជនដែលចូលចិត្តទទួលទានផ្លែសាវម៉ាវសូមធ្វើដំណើរឆ្ពោះទៅតំបន់ទេសចរណ៍អាងជីងចក់ទិញហូបជាលក្ខណៈគ្រួសារ ឬទិញយកទៅលក់បន្តក៏បានដែរ ដោយទិញរាយ១គីឡូក្រាម៦០០០រៀល ហើយបើទិញលើកដុំ១គីឡូក្រាម៥០០០រៀលប៉ុណ្ណោះ ។ មិនពិបាករកកន្លែងនោះទេ បើគេធ្វើដំណើរតាមម៉ូតូ ឬរថយន្តចេញពីក្រុងប៉ៃលិនឆ្ពោះទៅទិសខាងត្បូងឈាងខាងលិចត្រឹមតែ៣ទៅ៤គីឡូម៉ែត្រប៉ុណ្ណោះអាចនឹងទៅដល់រមណីយដ្ឋានកែច្នៃមួយនេះក៏មានទឹកអូរហូរធ្លាក់មកពីលើភ្នំឥតដាច់គួរឱ្យចង់គយគន់ផងដែរ ៕
ចែករំលែកព័តមាននេះ