រាជធានីភ្នំពេញ ៖ អគ្គនាយកដ្ឋានពន្ធដារដែលមានតួនាទីស្នូលក្នុងការប្រមូលចំណូលពន្ធ-អាករគ្រប់ប្រភេទសម្រាប់ផ្គត់ផ្គង់នឹងការចំណាយរបស់ជាតិ ក្នុងរយៈពេល៧ខែដើមឆ្នាំ២០១៨នេះ ប្រមូលចំណូលបានជាង១.៣៥៦ លានដុល្លារអាមេរិក ស្មើជាង៧០%នៃផែនការកំណត់ដោយច្បាប់ ក្នុងរយៈពេល៧ខែឆ្នាំ២០១៨ ។ នេះបើយោងតាមរបាយការណ៍កិច្ចប្រជុំបូកសរុបលទ្ធផលការងារប្រចាំខែរបស់អគ្គនាយកដ្ឋានពន្ធដារ ។
ថ្លែងក្នុងកិច្ចប្រជុំកាលពីថ្ងៃទី១០ សីហា លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានលើកឡើងថា លទ្ធផលប្រមូលចំណូលពន្ធរបស់អគ្គនាយកដ្ឋានពន្ធដារ ទទួលបានចំណូលពន្ធ-អាករគ្រប់ប្រភេទ ដែលប្រមូលបានតាមប្រព័ន្ធគ្រប់គ្រងទិន្នន័យចំណូលអនឡាញ (Online) ក្នុងខែកក្កដា ឆ្នាំ២០១៨នេះ មានចំនួនជាង៦៨៩ពាន់លានរៀល ស្មើប្រមាណជាង១៧២លានដុល្លារ កើនឡើងចំនួន១៨៦ពាន់លានរៀល ធៀបរយៈពេលដូចគ្នាកាលពីឆ្នាំមុន ។
លោកបន្តថា ដោយឡែក ចំណូលដែលទទួលបានក្នុងរយៈពេល៧ខែដើមឆ្នាំ២០១៨ អគ្គនាយកដ្ឋានពន្ធដារប្រមូលចំណូលពន្ធ-អាករបានជាង៥.៤២៥លានរៀល ត្រូវប្រមាណជាង១.៣៥៦លានដុល្លារ ស្មើជាង៧០%នៃផែនការ។ ក្នុងនោះបើធៀបទៅនឹងរយៈពេល៧ខែដើមឆ្នាំ២០១៧ ឃើញថា ការប្រមូលពន្ធ-អាករគ្រប់ប្រភេទ (តាមប្រព័ន្ធអនឡាញ) ក្នុងឆ្នាំ២០១៨ កើនឡើងចំនួនជាង៧០៨ពាន់លានរៀល ត្រូវប្រមាណជាង១៧៧លានដុល្លារអាមេរិក ស្មើជាង១៥% ។
លោក គង់ វិបុល បានបន្តថា ៖« កំណើនចំណូលពន្ធក្នុងខែកក្កដានេះ បើធៀបនឹងរយៈពេលដូចគ្នានៃឆ្នាំកន្លងមក បានឆ្លុះបញ្ចាំងថា សាធារណជន និងអ្នកវិនិយោគជាតិ និងអន្តរជាតិ មានជំនឿទុកចិត្តលើរាជរដ្ឋាភិបាល ក្រោមការដឹកនាំដ៏ឈ្លៀសវៃប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា » ។
ដើម្បីឆ្លើយតបតាមអនុសាសន៍ដ៏ខ្ពង់ខ្ពស់ លោកអគ្គនាយកបានណែនាំដល់មន្ត្រីពន្ធដារទាំងអស់ ត្រូវបំពេញតួនាទីជាអ្នកបម្រើរាស្ត្រ និងជាអ្នកផ្តល់សេវាជូនសាធារណជន មិនមែនជាអ្នកត្រួតត្រានោះឡើយ ហើយត្រូវកាត់បន្ថយជាអតិបរមានូវការរអ៊ូរទាំរបស់អ្នកជាប់ពន្ធ និងផ្តល់កិច្ចសហការល្អក្នុងការបង់ពន្ធ ជូនប្រជាពលរដ្ឋឲ្យបានល្អប្រសើរ ៕
ចែករំលែកព័តមាននេះ