ខេត្តកែប ៖ បុរសម្នាក់ត្រូវបានគេប្រទះឃើញដេកស្លាប់នៅលើផ្លូវលេខ៣៣A ចំណុចផ្លូវចូលសាលាក្រុងកែប ស្ថិតក្នុងភូមិកំពង់ត្រឡាច សង្កាត់ព្រៃធំ ក្រុង-ខេត្តកែប កាលពីវេលាម៉ោង ១១និង៣០នាទីយប់ថ្ងៃទី១១ខែសីហា ឆ្នាំ២០១៨…
ខេត្តកែប ៖ បុរសម្នាក់ត្រូវបានគេប្រទះឃើញដេកស្លាប់នៅលើផ្លូវលេខ៣៣A ចំណុចផ្លូវចូលសាលាក្រុងកែប ស្ថិតក្នុងភូមិកំពង់ត្រឡាច សង្កាត់ព្រៃធំ ក្រុង-ខេត្តកែប កាលពីវេលាម៉ោង ១១និង៣០នាទីយប់ថ្ងៃទី១១ខែសីហា ឆ្នាំ២០១៨ ។ ចំពោះការប្រទះឃើញសពបុរសម្នាក់ខាងលើ ត្រូវបានមជ្ឈដ្ឋានមួយចំនួនសង្ស័យថា គឺជាករណីឃាតកម្មកាប់ ឬវាយសម្លាប់គ្នា ប៉ុន្តែសមត្ថកិច្ចបានសន្និដ្ឋានជាបឋមថា ករណីនេះកើតឡើងដោយសារគ្រោះថ្នាក់ចរាចរណ៍។
ជនរងគ្រោះដែលស្លាប់ឈ្មោះ ញឹម អ៊ើង ភេទប្រុស អាយុ៣០ឆ្នាំ មុខរបរអ្នកនេសាទសមុទ្រ រស់នៅភូមិអំពេង ឃុំអង្កោល ស្រុកដំណាក់ចង្អើរ ខេត្តកែប ។
ទាក់ទិននឹងករណីប្រទះសពបុរសម្នាក់ដេកស្លាប់នៅលើថ្នល់នាពាក់កណ្តាលយប់ខាងលើ ត្រូវបានលោកវរសេនីយ៍ឯក សូង ស៊ិន អធិការនគរបាលក្រុងកែបបានបញ្ជាក់ប្រាប់ឱ្យដឹងថានៅព្រឹកថ្ងៃទី១២ ខែសីហា ឆ្នាំ២០១៨ នេះថា ក្រោយពីមានសេចក្តីរាយការណ៍ថាមានករណីប្រទះឃើញសព សមត្ថកិច្ចក៏បានចុះទៅពិនិត្យនៅកន្លែងកើតហេតុ ដើម្បីស្រាវជ្រាវ ។
លោកអធិការបានបញ្ជាក់ទៀតថា បន្ទាប់ពីពិនិត្យឃើញនៅកន្លែងកើតហេតុមានកម្ទេចកម្ទី និងបំណែកម៉ូតូនៅទីនោះ ទើបសមត្ថកិច្ចបានសន្និដ្ឋានជាបឋមថា ជាករណីគ្រោះថ្នាក់ចរាចរណ៍ផ្តើមដោយសារម៉ូតូបុកអ្នកថ្មើរជើងនៅពេលយប់ ហើយជនបង្កបានជិះម៉ូតូគេចខ្លួនបាត់ ។
ជាមួយនេះដែរ បើតាមការលើកឡើងពីសំណាក់ប្រជាពលរដ្ឋជាច្រើនបានអះអាងថា បុរសរងគ្រោះអាចមានទំនាស់ជាមួយអ្នកណាម្នាក់ ហើយត្រូវបានក្រុមដៃដល់ដេញវាយប្រហារ និងមានការប្រទាញប្រទង់គ្នា ដោយភាគីម្ខាងមានប្រើកាំបិត ឬពូថៅកាប់ទៅលើជនរងគ្រោះបណ្តាលឲ្យដេកដួលស្លាប់នៅនឹងកន្លែងកើតហេតុតែម្តង ព្រោះនៅលើសពមានស្នាមគួរឲ្យសង្ស័យជាច្រើនកន្លែង ដូចជា ក និងក្បាលជនរងគ្រោះមានស្នាមវាយប្រហារដោយវត្ថុរឹងអាចថាជាស្នាមដាវ ឬកាំបិតជាដើម។
ប្រភពមិនផ្លូវការមួយទៀតបានឲ្យដឹងថា មុនពេលកើតហេតុ ជនរងគ្រោះបានចូលផឹកស៊ីនៅក្នុងហាងមួយកន្លែង ម្ចាស់ហាងជានគរបាល ហើយអាចមានទំនាស់ពាក្យសំដីជាមួយអ្នកផឹកស៊ីនៅខ្យូសជិតគ្នា ហើយក្រោយពេលឈប់ផឹកចេញមក ជនរងគ្រោះអាចជិះម៉ូតូជាមួយមិត្តភក្តិ ហើយអាចត្រូវភាគីម្ខាងទៀតជិះម៉ូតូដេញកាប់ប្រហារ ពេលដែលជនរងគ្រោះត្រូវរបួស ទំនងជាមិត្តភក្តិដែលដឹកជនរងគ្រោះមិនហ៊ានឈប់នៅកន្លែងកើតហេតុ ដោយខ្លាចជនដៃដល់កាប់ប្រហារទៀត ហើយមិនហ៊ានរាយការណ៍ប្រាប់សមត្ថកិច្ចទៀត ដោយខ្លាចជាប់ពាក់ពន្ឋ័ក្នុងហេតុការណ៍មួយនេះ។
ទោះបីជាយ៉ាងណា សមត្ថកិច្ចខេត្តកែបកំពុងដុតដៃ ដុតជើងបន្តស្រាវជ្រាវករណីមួួយនេះយ៉ាងយកចិត្តទុកដាក់បំផុត ដើម្បីស្វែងរកមុខសញ្ញាជនបង្កក្នុងហេតុការណ៍ខាងលើនេះ ដើម្បីកំណត់ហេតុការណ៍នេះឲ្យបានច្បាស់លាស់ សម្រាប់ដោះស្រាយចម្ងល់ជូនពលរដ្ឋនៅពេលក្រោយ ហើយបើករណីខាងលើពិតជាករណីឃាតកម្មមែននោះ ជនដៃដល់ក៏មិនអាចគេចផុតពីសំណាញ់ច្បាប់នោះឡើយ ។
បច្ចុប្បន្ន សពត្រូវបានរថយន្តសាមុយរបស់មន្ទីរពេទ្យបង្អែកខេត្តកែបដឹកបញ្ជូនទៅប្រគល់ឱ្យក្រុមគ្រួសារនៅឯលំនៅដ្ឋាននៅភូមិអំពេង ឃុំអង្កោល ដើម្បីរៀបចំចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ