ខេត្តក្រចេះ ៖ តាមសេចក្តីរាយការណ៍ព័ត៌មានបឋមបានឱ្យដឹងថា បុរសពីរនាក់បងប្អូនត្រូវជនមិនស្គាល់មុខប្រើពូថៅកាប់យ៉ាងសុសសាច់ បណ្តាលឱ្យស្លាប់នៅលើអង្រឹងរៀងៗខ្លួននៅផ្ទះចម្ការមួយកន្លែង ស្ថិតនៅតំបន់ដាច់ស្រយាលចំណុចព្រៃចម្ការ ក្នុងឃុំវឌ្ឍនៈ ស្រុកសំបូរ។
ជនរងគ្រោះទាំងពីរនាក់បងប្អូនដែលស្លាប់ខាងលើ ម្នាក់ឈ្មោះ ភឿន ផាន ភេទប្រុស អាយុ២២ឆ្នាំ និងម្នាក់ទៀតឈ្មោះ ភឿន ជា ភេទប្រុស អាយុ១៩ឆ្នាំ ។ ជនរងគ្រោះទាំងពីរនាក់ជាបងប្អូនបង្កើត រស់នៅខេត្តត្បូងឃ្មុំ និងបានមកស្នាក់នៅធ្វើចម្ការនៅចំណុចខាងលើនេះ។
អធិការរងនគរបាលព្រហ្មទណ្ឌស្រុកសំបូរ លោក នួន សារិន បានឲ្យដឹងថា សពជនរងគ្រោះទាំងពីរនាក់ត្រូវបានជនដៃដល់មិនស្គាល់មុខកាប់ បណ្តាលឱ្យស្លាប់កាលពីថ្ងៃទី៨ សីហា មកម៉្លេះ។ សពត្រូវបានគេកាប់នឹងពូថៅចំក្បាល.ក ពោះ និងនៅលើដងខ្លួន។
ជាមួយគ្នានេះដោយសារតែកន្លែងកើតហេតុដែលជនរងគ្រោះស្នាក់នៅជាផ្ទះចម្ការនៅដាច់ស្រយាល ធ្វើឲ្យនគរបាលទទួលបានព័ត៌មានលើករណីនេះមានភាពយឺតយ៉ាវបន្តិច។ ទោះបីយ៉ាងណា ករណីនេះត្រូវបានលោកអធិការរងអះអាងថា នគរបាលបានកំណត់លើមុខសញ្ញាបានហើយ ក្រោយពីបានចុះពិនិត្យដល់កន្លែងកើតហេតុ និងសាកសួរព័ត៌មានជុំវិញកន្លែងកើតហេតុរួច មកនោះ។
លោកអធិការរងបញ្ជាក់ទៀតថា ករណីនេះអាចផ្តើមចេញដោយសាររឿងគំនុំ ព្រោះបើតាមការសាកសួរ បានឱ្យដឹងថា មុនពេលកើតហេតុ គឺជនរងគ្រោះទាំងពីរនាក់បងប្អូនបានផឹកស៊ីជាមួយមិត្តភក្តិក្នុងភូមិក៏កើតមានទំនាស់ពាក្យសម្តី ហើយក៏ត្រូវបានគេប្រទះឃើញបងប្អូនទាំងពីរនាក់ខាងលើដេកស្លាប់នៅលើអង្រឹងរៀងៗខ្លួនបែបនេះតែម្តង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ