អតិថិជនចិនសម្រុកឥតឈប់ឈរ គ្រប់គ្រងទីផ្សារអចលនទ្រព្យក្រុងបាងកក
ទីក្រុងបាងកក ៖ សមាគមខុនដូប្រទេសថៃបាននិយាយថា អតិថិជនចិនកំពុងតែគ្រប់គ្រងទីផ្សារអចលនទ្រព្យទីក្រុងបាងកក ប្រទេសថៃ មិនឈប់ឈរ ។ លោក Prasert Taedullayasatit…
ទីក្រុងបាងកក ៖ សមាគមខុនដូប្រទេសថៃបាននិយាយថា អតិថិជនចិនកំពុងតែគ្រប់គ្រងទីផ្សារអចលនទ្រព្យទីក្រុងបាងកក ប្រទេសថៃ មិនឈប់ឈរ ។
លោក Prasert Taedullayasatit ប្រធានកិត្តិយសនៃសមាគមខុនដូប្រទេសថៃ បានឲ្យដឹងថា អតិថិជនចិនជាច្រើនបានចូលក្នុងទីផ្សារខុនដូនៅទីក្រុងបាងកកកាលពីប៉ុន្មានឆ្នាំថ្មីៗនេះ ហើយនិន្នាការនេះនឹងបន្តកើតមានឡើង ។
លោកមានប្រសាសន៍ថា ៖« ជនជាតិចិនបានទិញខុនដូដោយប្រាក់សុទ្ធ ។ ជាក់ស្តែង គម្រោងខុនដូមួយនៅជិតស្ថានីយរថភ្លើង ដែលបានសម្រេចការសាងសង់កាលពីឆ្នាំមុន គេមើលឃើញមានអតិថិជនចិនច្រើនជាងគេ ។ ពួកគេទិញខុនដូក្នុងតម្លៃខ្ពស់ជាងអតិថិជនថៃ ដល់ទៅ១០%ទៅ២០% ឯណោះ » ។
កាលពីឆ្នាំមុន ការទិញ-លក់ខុនដូដោយអតិថិជនបរទេស សរុបស្មើប្រមាណ២,១៤ប៊ីលានដុល្លារ ឬស្មើនឹង២៧%នៃការទិញដូរខុនដូសរុបនៅទីក្រុងបាងកក ។ ក្នុងនោះ១ភាគ៣ ឬស្មើនឹង៧១០លានដុល្លារ គឺជាការទិញ-លក់ដោយជនជាតិចិន និងហុងកុង ដែលច្រើនជាងកាលពីឆ្នាំ២០១៦ ដែលចំនួននេះស្មើតែប្រមាណ៣៩០លានដុល្លារប៉ុណ្ណោះ ។
លោក Prasert Taedullayasatit បាននិយាយក្នុងសន្និសីទមួយកាលពីថ្ងៃអង្គារថា ៖«បញ្ហាមួយទាក់ទងនឹងកម្មសិទ្ធិខុនដូជនជាតិចិន គឺម្ចាស់ខុនដូភាគច្រើនមិនស្នាក់នៅក្នុងខុនដូទាំងនោះទេ ប៉ុន្តែពួកគេជួលទៅឲ្យភ្នាក់ងារទេសចរណ៍ » ។
លោកបន្តទៀតថា ការវិនិយោគរបស់ចិនក្នុងការអភិវឌ្ឍអចលនទ្រព្យប្រទេសថៃ តាមរយៈក្រុមហ៊ុនរួមនៅឆ្នាំ២០១៨នេះ គឺនាំមុខគេក្នុងចំណោមវិនិយោគិនបរទេសទាំងអស់ រួមមាន ជប៉ុនផងដែរ ដែលជាវិនិយោគិនសកម្មជាងគេក្នុងរយៈពេល៣ឆ្នាំកន្លងមក ៕
ចែករំលែកព័តមាននេះ