រាជធានីភ្នំពេញ ៖ រថយន្ត Lexus 450 បើកឡើងស្ពានព្រះមុន្នីវង្សថ្មីក្នុងល្បឿនលឿនជ្រុលទៅបុករទេះលក់ពងទាកូន និងរថយន្ត២គ្រឿងទៀត បណ្តាលឲ្យខូចខាតបង្កឲ្យបុរសចំណាស់ម្នាក់ជាអ្នកបើកម៉ូតូសណ្តោងរទេះលក់ពងទាកូនរងរបួសធ្ងន់ កាលពីវេលាម៉ោង១០និង១០នាទីយប់ថ្ងៃទី០៩ ខែសីហានេះ នៅលើស្ពានអាកាសព្រះមុន្នីវង្សថ្មី សង្កាត់ច្បារអំពៅ២ ខណ្ឌច្បារអំពៅ ។
ប្រភពពីអ្នកឃើញហេតុការណ៍បានប្រាប់ឲ្យដឹងថា មុនកើតហេតុការណ៍នេះកើតឡើងគេឃើញមានរថយន្តម៉ាកឡិចស៊ីស៤៥០មួយគ្រឿង ពណ៌ខ្មៅ ពាក់ស្លាកលេខនគរបាល2 :2114 បើកបរដោយបុរសដែលរួមដំណើរជាមួយស្ត្រីម្នាក់ធ្វើដំណើរឡើងស្ពានអាកាសព្រះមុនីវង្ស ក្នុងល្បឿនលឿន មកកន្លែងកើតហេតុបានបុកអូសរទេះលក់ពងទាកូនមួយគ្រឿង បណ្តាលឲ្យពងទាកូនធ្លាក់បែកពេញផ្លូវ និងបុរសចំណាស់ជាអ្នកបើកម៉ូតូសណ្តោងរទេះលក់ពងទាកូនរងរបួសធ្ងន់ ហើយត្រូវរថយន្តមិនទាន់អស់ល្បឿនក៏រុញរទេះលក់ពងទាកូនទៅបុកនឹងរថយន្តមួយគ្រឿងទៀតម៉ាកកាមរីបាឡែន ពណ៌ទឹកប្រាក់ ពាក់ស្លាកលេខនគរបាល 2:2836 បើកបរដោយបុរសម្នាក់បណ្តាលឲ្យរថយន្តក្រពឹតមួយកំណាត់ក្រោយ ហើយរថយន្តរងគ្រោះជ្រុលទៅបុកនឹងរថយន្តកុងតឺន័រមួយគ្រឿងទៀត ដែលធ្វើដំណើរពីមុខខ្លួន បណ្តាលឲ្យខូចខាតក្រពឹតមួយកំណាត់មុខថែមទៀត ចំណែករថយន្តកុងតឺន័រខូចខាតតិចតួច ។
បន្ទាប់ពីបង្កគ្រោះថ្នាក់ម្ចាស់រថយន្តបង្កបានចុះពីរថយន្តមកសុំទោស និងជួយមើលអ្នករបួស ហើយទទួលខុសត្រូវគ្រប់យ៉ាង តែដោយសារមានអ្នកសារព័ត៌មានតាមថតគាត់ច្រើនពេក ហើយហាមដែរតែគេមិនស្តាប់ អ្នកបើករថយន្តបង្កបានគេចខ្លួនបាត់ទៅបន្សល់ទុកតែរថយន្តនៅនឹងកន្លែងកើតហេតុ ។
ក្រោយកើតហេតុជនរងគ្រោះត្រូវបានរថយន្តសង្គ្រោះដឹកយកទៅសង្គ្រោះនៅមន្ទីរពេទ្យភ្លាមៗ ចំណែករថយន្តកុងតឺន័រមិនបាននៅទាមទារសំណងអ្វីទេ ហើយបានបើកចេញទៅបាត់ទៅ នៅសល់តែរថយន្តបង្ក និងរថយន្តរងគ្រោះព្រមទាំងរទេះលក់ពងទាកូនត្រូវសមត្ថកិច្ចជំនាញចរាចរណ៍ធ្វើការវាស់វែង និងយកទៅរក្សាទុកការិយាល័យនគបាលចរាចរណ៍ជើងគោករាជធានីភ្នំពេញរង់ចាំដោះស្រាយគ្នានៅពេលក្រោយ ៕
ចែករំលែកព័តមាននេះ