ទីក្រុងណៃពិដោ ៖ ដើម្បីជួយជំរុញដល់វិស័យទេសចរណ៍ រដ្ឋាភិបាលបច្ចុប្បន្នរបស់ប្រទេសមីយ៉ាន់ម៉ាចង់ទាក់ទាញការវិនិយោគពីបរទេសបន្ថែម ។ ប្រទេសនេះពិតជាត្រូវការជំនួយណាស់ ខណៈចំនួនភ្ញៀវបរទេសកើនឡើងយ៉ាងខ្លាំង ដោយឆ្នាំមុនកើនដល់១៨% ហើយដាក់សម្ពាធលើហេដ្ឋារចនាសម្ព័ន្ធបច្ចុប្បន្ន ។
យោងតាមលោក Ohn Muang រដ្ឋមន្ត្រីសណ្ឋាគារ និងទេសចរណ៍ បានឲ្យដឹងថា ប្រទេសមីយ៉ាន់ម៉ាមានសក្តានុពលខ្ពស់ក្នុងការទាក់ទាញវិនិយោគិន និងភ្ញៀវទេសចរ ។
លោកបាននិយាយក្នុងវេទិកាមួយនៅទីក្រុងបាងកក ប្រទេសថៃ កាលពីខែមុនថា ៖«ពួកយើងនឹងព្យាយាមបង្ហាញពួកគេពីអ្វីគ្រប់យ៉ាង និងពន្យល់ពីកន្លែង និងវិធីក្នុងការវិនិយោគ ។ ច្បាប់វិនិយោគថ្មីរបស់ពួកយើងបានបន្ធូរបន្ថយយ៉ាងច្រើនផងដែរ » ។
រដ្ឋាភិបាលក៏បានផ្តល់ការអនុគ្រោះលើទិដ្ឋាការសម្រាប់ទីផ្សារប្រទេសធំៗ៣ រួមមាន ចិន ជប៉ុន និងកូរ៉េខាងត្បូងថែមទៀត ដើម្បីទាក់ទាញភ្ញៀវទេសចរបន្ថែម ។ ភ្ញៀវទេសចរអាស៊ីស្មើនឹង៧០%នៃចំនួនភ្ញៀវទេសចរសរុបរបស់ប្រទេសនេះ ។
ភ្ញៀវទេសចរជប៉ុន និងកូរ៉េខាងត្បូង អាចចូលមកកាន់ប្រទេសមីយ៉ាន់ម៉ាតាមផ្លូវគោក និងអាកាសដោយមិនចាំបាច់មានទិដ្ឋាការ ខណៈភ្ញៀវទេសចរចិនអាចចូលប្រទេសនេះបានដោយបង់ប្រាក់តែ៥០ដុល្លារប៉ុណ្ណោះនៅតាមអាកាសយានដ្ឋាន Yangon, Mandalay និង Nay Pyi Taw ។
លោក Thet Lwin Toh ប្រធានសមាគមសហភាពទេសចរណ៍មីយ៉ាន់ម៉ា បានឲ្យដឹងថា ប្រទេសនេះនឹងមើលឃើញចំនួនភ្ញៀវទេសចរអន្តរជាតិកើនឡើង២២%ក្នុងឆ្នាំនេះ ពី៣,៤លាននាក់កាលពីឆ្នាំមុន ៕
ចែករំលែកព័តមាននេះ