ខេត្តបាត់ដំបង ៖ អ្នកបើករថយន្តដឹកទឹកកកលក់ម្នាក់ ត្រូវខ្មាន់កាំភ្លើងបើករថយន្តតាមស្ទាក់បាញ់ប្រហារយ៉ាង ឃោរឃៅត្រូវជាច្រើនគ្រាប់បណ្ដាលឱ្យស្លាប់ កាលពីវេលាម៉ោង១០យប់ថ្ងៃទី៥ សីហា នៅលើកំណាត់ផ្លូវមួយកន្លែង ត្រង់ចំណុចវាលអន្ទង់.ស ស្ថិតក្នុងភូមិក្រពើខាងជើង ឃុំភ្នំសំពៅ ស្រុកបាណន់ ដែលគេសង្ស័យផ្ដើមចេញពីរឿងគំនុំ ។
សមត្ថកិច្ចស្រុកបាណន់បានឲ្យដឹងថា ជនរងគ្រោះឈ្មោះ ពេជ្រ ភីសា អាយុ២៥ឆ្នាំ រស់នៅភូមិតាង៉ែន ឃុំតាគ្រាម ស្រុកបាណន់ ។ ជនរងគ្រោះត្រូវខ្មាន់កាំភ្លើងបាញ់ចំក្បាលនិងខ្លួនចំនួន៥គ្រាប់ ហើយពេលបញ្ជូនដល់មន្ទីរពេទ្យក៏បានស្លាប់។ មន្ត្រីដដែលបានប្រាប់ថា ជនរងគ្រោះជាអ្នកបើករថយន្តដឹកទឹកកកលក់ មានអ្នករួមដំណើរ២នាក់ទៀត គឺឈ្មោះហេង ចិត្រា ហៅឡិច អាយុ២០ឆ្នាំ និងឈ្មោះ ប៊ូ ចន្ធី ហៅប៉ោង អាយុ២៧ឆ្នាំ មិនមានរបួសទេ ។ ពួកគេរស់នៅក្នុងភូមិ ឃុំជាមួយគ្នាខាងលើ និងជិះរថយន្តដឹកទឹកកក ពាក់ស្លាកលេខ បាត់ដំបង 3A-3095 ។ បើតាមព័ត៌មានដែលទទូលបានពីអ្នករួមដំណើរបានឲ្យដឹងថា ជនដៃដល់មានបក្សពួក២នាក់ជិះរថយន្តម៉ាកហាយឡិនឌ័រ ដែលធ្វើដំណើរស្របទិសគ្នាពីបាត់ដំបងទៅកំពីងពួយ ។
សាក្សីនេះត្រូវសមត្ថកិច្ចដកស្រង់សម្តីថា ពួកគេមិនបានស្គាល់ក្រុមជនដៃដល់ទេ តែក្រុមនោះបានបើករថយន្តដេញតាមរថយន្តខ្លួនពីក្រោយ លុះមកដល់ចំណុចកើតហេតុ ក្រុមនោះបានបើកឡើងជែងទៅឈប់ពាំងពីខាងមុខរថយន្តខ្លួន។ សាក្សីដដែលនេះបានប្រាប់ទៀតថា ពេលនោះជនមិនស្គាល់មុខ២នាក់ បានចុះពីរថយន្តដើរមកសួរ ជនរងគ្រោះ(ពេជ្រ ភីសា) បែបចោទប្រកាន់ថា ហេតុអ្វីបានបើករថយន្តប៉ះរថយន្តខ្លួន(រថយន្តជនដៃដល់)ហើយមិនឈប់និយាយគ្នា ? ពេលនោះជនរងគ្រោះបានឆ្លើយតបថា «ខ្ញុំមិនបានដឹងទេ…ហើយក៏មិនបានបើកប៉ះដែរ» ។
គ្រាន់តែប៉ុណ្ណឹង ស្រាប់តែភ្លាមនោះជនម្នាក់បានដកកាំភ្លើងខ្លីបាញ់ជាច្រើនគ្រាប់ស្រោចទៅលើជនរងគ្រោះនៅក្នុងរថយន្តតែម្ដង ។ ក្រោយពីបាញ់ជនរងគ្រោះឲ្យរបួស ខ្មាន់កាំភ្លើងទាំង២នាក់បានរត់ឡើងរថយន្តបើកត្រឡប់ទៅក្រោយវិញបាត់ស្រមោលទាំងយប់ភ្លាមៗដែរ ។ ដោយឡែកពួកខ្លួនក៏បើករថយន្តដឹកជនរងគ្រោះហូសទៅផ្ទះ ដើម្បីឲ្យក្រុមគ្រួសារជួយបញ្ជូនទៅពេទ្យ តែអកុសលពេលដល់មន្ទីរពេទ្យជនរងគ្រោះក៏បានស្លាប់ទៅហើយ ។
មន្ត្រីបច្ចេកទេសបាននិយាយថា ជនរងគ្រោះមានស្នាមត្រូវគ្រាប់កាំភ្លើងចំនួន៥កន្លែង គឺត្រូវក្រោមត្រចៀកខាងឆ្វេង១គ្រាប់ ត្រូវគល់កខាងក្រោយ១គ្រាប់ ត្រូវចំក្បាល១គ្រាប់ និងត្រូវចំស្មាខាងឆ្វេវចំនួន២គ្រាប់ ។ ជាមួយនឹងការត្រូតពិនិត្យនៅកន្លែងកើតហេតុសមត្ថកិច្ចជំនាញបានរកឃើញគ្រាប់កាំភ្លើងខ្លី២គ្រាប់ដែលមិនទាន់បាញ់ និងសំបកគ្រាប់១គ្រាប់ទៀតដែលបាញ់រួចបានធ្លាក់នៅលើថ្នល់ ។ សមត្ថកិច្ចបានអះអាងថា គ្រាប់កាំភ្លើងខ្លីដែលខ្មាន់កាំភ្លើងបានប្រើនេះ អាចជាប្រភេទកាំភ្លើងម៉ាក «ប៉េអាម៉ាប់» ។
ជុំវិញការបាញ់សម្លាប់មនុស្សដូចបាញ់សម្លាប់សត្វខាងលើនេះ គេមិនទាន់ដឹងពីមូលហេតុឲ្យជាក់លាក់ទេ ដោយគ្រាន់តែទទូលបានចម្លើយបំភ្លឺពីសាក្សីដែលជិះរថយន្តជាមួយជនរងគ្រោះថា ផ្ដើមចេញពីបើកបរប៉ះទង្កិចគ្នាតាមការចោទប្រកាន់ពីក្រុមជនដៃដល់មិនស្គាល់មុខនោះតែប៉ុណ្ណោះ ។ ប៉ុន្តែបើតាមប្រភពនានាដែលបំភ្លឺក្រៅផ្លូវការ បានបង្ហើបឲ្យដឹងអំពីប្រវត្តិខ្លះៗពាក់ព័ន្ធនឹងជនរងគ្រោះថា ជនរងគ្រោះឈ្មោះ ពេជ្រ ភីសា ទើបរៀបការរួចថ្មីៗជាមួយនឹងភរិយាដ៏ចម្រូងចម្រាស ។ ដូច្នេះគេសង្ស័យការតាមបាញ់ប្រហារយ៉ាងសាហាវព្រៃផ្សៃនេះ អាចជាប់ពាក់ព័ន្ធនឹងករណីនេះ មិនមែនផ្ដើមចេញពីករណីបើកបរប៉ះទង្កិចគ្នាទេ ។ យ៉ាងណាក៏ដោយនេះគ្រាន់តែជាការសន្និដ្ឋានក្រៅផ្លូវការប៉ុណ្ណោះ រីឯសាច់ញាតិឬភរិយាថ្មីថ្មោងរបស់ជនរងគ្រោះក៏មិនទាន់សុំការបំភ្លឺឬបកស្រាយត្រង់ចំណុចនេះបានដែរ ។
លោកឧត្តមសេនីយត្រី ជេត វណ្ណនី ស្នងការរងខេត្ត ក៏បាននិយាយដែរថា បើតាមការពិនិត្យលើរថយន្តរបស់ជនរងគ្រោះ និងសួរនាំសាក្សី ឬការផ្ដល់ព័ត៌មានខ្លះៗ ពីក្រុមគ្រួសារមួយជំហ៊ានដំបូងនេះ លោកសង្ស័យផ្ដើមចេញពីរឿង «គំនុំផ្ទាល់ខ្លួនច្រើនជាងការចោទប្រកាន់អំពីបើករថយន្តប៉ះគ្នា» ។ លោកស្នងការរងបានបញ្ជាក់ថា ក្រោយពីមន្ត្រីជំនាញសួរនាំមួយជំហ៊ានដំបូងទៅលើសាច់ញាតិ គឺយើងទទូលបានព័ត៌មានខ្លះៗដែលគួរឲ្យមានការសង្ស័យទៅលើរឿងគំនុំ ។ ជាពិសេសរឿង ជនរងគ្រោះដែលទើបរៀបការដែលមានទាំងភាពចម្រូងចម្រាសផង ។
លោក ជេត វណ្ណនី បានបញ្ជាក់ថា បើគ្រាន់តែរឿងបើករថយន្តប៉ះគ្នាបន្តិចបន្ទូចប៉ុណ្ណឹងមិនអាចឈានដល់ការដកកាំភ្លើងបាញ់ស្រោចទៅលើជនរងគ្រោះដល់ម្លឹងនោះទេ តែវាអាចផ្ដើមចេញពីគំនុំផ្ទាល់ខ្លួនអ្វីមួយរវាងជនដៃដល់និងជនរងគ្រោះ ។ ប៉ុន្តែយ៉ាងនេះក្ដី លោកថាបើយោងតាមការបំភ្លឺនានា យើងអាចមានតម្រុយពីមុខសញ្ញាជនដៃដល់ខ្លះៗហើយ ៕
ចែករំលែកព័តមាននេះ