ប្រទេសឥណ្ឌូណេស៊ី ៖ បើតាមអាជ្ញាធរបានរាយការណ៍នាថ្ងៃទី៦ សីហា ២០១៨ថា មនុស្សយ៉ាងតិច៨២នាក់ស្លាប់ ហើយជាច្រើនរយនាក់ទៀតរងរបួសដោយសារការរញ្ជួយដីយ៉ាងខ្លាំងមួយដែលមានកម្លាំង៦,៩រីស្ទ័រ ហេតុការណ៍នេះដែលកើតមានកាលពីថ្ងៃទី៥ ខែសីហា នៅលើកោះទេសចរណ៍…
ប្រទេសឥណ្ឌូណេស៊ី ៖ បើតាមអាជ្ញាធរបានរាយការណ៍នាថ្ងៃទី៦ សីហា ២០១៨ថា មនុស្សយ៉ាងតិច៨២នាក់ស្លាប់ ហើយជាច្រើនរយនាក់ទៀតរងរបួសដោយសារការរញ្ជួយដីយ៉ាងខ្លាំងមួយដែលមានកម្លាំង៦,៩រីស្ទ័រ ហេតុការណ៍នេះដែលកើតមានកាលពីថ្ងៃទី៥ ខែសីហា នៅលើកោះទេសចរណ៍ LOMBOK ភាគខាងត្បូងឥណ្ឌូណេស៊ី។
បើតាមវិទ្យាសា្ថនភូគ្ភសាស្ត្រអាមេរិក USGS ពីដំបូងបានវាយតម្លៃថា ការរញ្ជួយដីនោះមានកម្លាំងដល់ទៅ៧រីស្ទ័រមុនពេលកែឡើងវិញថា ត្រឹម៦,៩រីស្ទ័រ។ ប៉ុន្តែបើយោងតាមលោក SOTOPO PURWO NUGROHO អ្នកនាំពាក្យនៃទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ីថា ការរញ្ជួយដីនេះដែល បណ្ដាលឲ្យអគារច្រើនពាន់រងការខូចខាត ក៏ញ័ររង្គើដល់កោះបាលីផងដែរ។ ហើយការប្រកាសអាសន្នស៊ូណាមីដែលលុបចោលវិញភ្លាមៗបានញ៉ាំងឲ្យប្រជាជនជ្រួលច្របល់រត់រកកន្លែងមានសន្តិសុខ។
អនុស្សាវរីយ៍នៃស៊ូណាមីកាលពីឆ្នាំ២០០៤ ដែលបណ្ដាលឲ្យមនុស្សស្លាប់ ១៦៨.០០០នាក់នៅឥណ្ឌូណេស៊ី គឺនៅដិតដាមជាប់ក្នុងអារម្មណ៍ប្រជាជននៅឡើយ។ ហើយមនុស្សជាច្រើនពាន់នាក់ ត្រូវបានជម្លៀសចេញកាលពីថ្ងៃទី៥ សីហា នៅកោះ LOMBOK ទៅរកកន្លែងគត់មត់។ ហើយមនុស្សស្លាប់ភាគច្រើនគឺក្នុងតំបន់ភ្នំស្ថិតនៅភាគខាងជើងកោះ LOMBOK ឆ្ងាយពីបណ្ដាទីតាំងទេសចរណ៍សំខាន់ៗនាភាគខាងត្បូង និងភាគខាងលិចកោះ។
ការរញ្ជួយដីលើកនេះកើតមានមួយសប្ដាហ៍ បន្ទាប់ពីការរញ្ជួយដីដំបូងមួយបណ្ដាលឲ្យមនុស្សស្លាប់១៧នាក់ លើកោះដដែលនេះ ស្ថិតនៅភាគខាងកើតកោះបាលី ដោយបំផ្លាញផ្ទះ និងអគារជាច្រើន។ ហើយការរញ្ជួយដីថ្ងៃទី៥ សីហា កើតមានក្នុងជម្រៅ១០គីឡូម៉ែត្រ។ ចំណែគចំណុចកណ្ដាលរបស់វា ស្ថិតក្នុងសមុទ្រចម្ងាយ១៨គីឡូម៉ែត្រភាគពាយ័ព្យកោះ LOMBOK។
អ្នកនាំពាក្យនៃទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ី បានគូសបញ្ជាក់ថា អគារជាច្រើនរងការខូចខាតនៅទីក្រុងម៉ាតារ៉ាម ជាទីក្រុងសំខាន់នៃកោះនេះ។ ហើយប្រជាជនក្រុងម៉ាតារ៉ាម មានការភ័យជ្រួលច្របល់បាននាំគ្នារត់ចេញពីផ្ទះមកកាន់ដងវិថីទាំងឡាយ។
រដ្ឋមន្ត្រីមហាផ្ទៃសិង្ហបុរីលោកសានមូហ្គាម ដែលស្ថិតនៅកោះ LOMBOK ចូលរួមក្នុងសន្និសីទមួយពេលកើតមានការរញ្ជួយដីសរសេរតាម FACEBOOK ថា បន្ទប់សណ្ឋាគារដែលលោកស្នាក់ស្ថិតនៅជាន់ទី១០ ញ័ររង្គើយ៉ាងខ្លាំង។ រីឯជញ្ជាំងត្រូវប្រេះការរញ្ជួយពុំអាចឈរនឹងបានឡើយ។ ទោះជាពុំមានស៊ូណាមីក៏ទឹកសមុទ្របានរាតត្បាតភូមិ២ដែរ៕
ចែករំលែកព័តមាននេះ