ខេត្តមណ្ឌលគិរី ៖ សកម្មភាពជួញដូរឈើខុសច្បាប់បានកក្រើកឡើងវិញគួរឱ្យកត់សម្គាល់ នៅតាមព្រំប្រទល់ខេត្តមណ្ឌលគិរី និងខេត្តក្រចេះ ក្រោយប្រទេសកម្ពុជាបានបញ្ចប់យុទ្ធនាការបោះឆ្នោតជ្រើសរើសតំណាងរាស្ត្រនីតិកាលទី៦ កាលពីចុងខែកក្កដា ២០១៨ បន្ទាប់ពីមានភាពស្ងប់ស្ងាត់ក្នុងការជួញដូរឈើមួយអន្លើ។ ជាក់ស្តែងនៅល្ងាចថ្ងៃទី៣…
ខេត្តមណ្ឌលគិរី ៖ សកម្មភាពជួញដូរឈើខុសច្បាប់បានកក្រើកឡើងវិញគួរឱ្យកត់សម្គាល់ នៅតាមព្រំប្រទល់ខេត្តមណ្ឌលគិរី និងខេត្តក្រចេះ ក្រោយប្រទេសកម្ពុជាបានបញ្ចប់យុទ្ធនាការបោះឆ្នោតជ្រើសរើសតំណាងរាស្ត្រនីតិកាលទី៦ កាលពីចុងខែកក្កដា ២០១៨ បន្ទាប់ពីមានភាពស្ងប់ស្ងាត់ក្នុងការជួញដូរឈើមួយអន្លើ។
ជាក់ស្តែងនៅល្ងាចថ្ងៃទី៣ សីហា ២០១៨ អាជ្ញាធរខេត្តមណ្ឌលគិរីចាប់ឃាត់រថយន្តធុន រេវ ចំនួន៣គ្រឿងនៅចំណុច០៦៥១៥៧៨,១៣៩២៨៤៩ ស្ថិតនៅភូមិចក់ចា(រណែង)ឃុំស្រែឈូក ស្រុកកែវសីមា ខេត្តមណ្ឌលគិរី ។
មន្ត្រីឧទ្យានុរក្សដែនជម្រកការពារសត្វព្រៃកែវសីមាឱ្យដឹងថា រថយន្តទាំង៣គ្រឿងមានផ្ទុកឈើគ្រឿងផ្ទះ ប្រភេទស្រឡៅ គគី ផ្ចឹក ចំនួន១៧,៨០៣ម៉ែត្រត្រីគុណ នៅលើរថយន្តចំនួន២គ្រឿង និងរថយន្តមួយគ្រឿងទៀតខូចបានទម្លាក់ឈើចេញចម្ងាយប្រហែល១០០ម៉ែត្រ។ ហើយជនសង្ស័យ២នាក់ត្រូវបានចាប់ខ្លួន ១-ឈ្មោះ ឃ្នីន លឿន ភេទប្រុស អាយុ៤៥ឆ្នាំ ទីកន្លែងកំណើតភូមិត្នោត ឃុំថ្មី ស្រុកចិតបូរី ខេត្តក្រចេះ និង២-ឈ្មោះ ហ៊ត លី ភេទប្រុស អាយុ៣២ឆ្នាំ ទីកន្លែងកំណើតភូមិច្រវា ឃុំកន្ទួត ស្រុកចិត្របូរី ខេត្តក្រចេះ។
យោងលើចម្លើយសារភាពរបស់ជនសង្ស័យដែលកោះសន្តិភាពទទួលបានពីប្រភពច្បាស់ការណ៍កាលពីល្ងាចថ្ងៃទី៤ សីហា ឲ្យដឹងថា ឈើដែលដឹកមកនេះ ពួកគេបានប្រើពេលអារជ្រៀកក្នុងព្រៃនៃទឹកដីខេត្តមណ្ឌលគិរី រយៈពេលជាង២០ថ្ងៃ និងបានដឹកមកដល់ចំណុចជាប់ផុងនេះនៅថ្ងៃទី២ សីហា ត្រូវសមត្ថកិច្ចឃាត់តែម្តង។
ក្នុងសំនេរសារភាពដដែលបន្តថា ពេលចូលទៅដឹកឈើក្រុមខ្លួនបានបង់ប្រាក់ជូនដល់ទាហាន និងប៉េអឹមនៅអន្ទ្រងទឹកដីខេត្តមណ្ឌលគិរី ដោយក្នុងម៉ាស៊ីនយន្តមួយគ្រឿងត្រូវបង់អស់តម្លៃ៥០ម៉ឺនរៀល ចំណែករថយន្ត១គ្រឿងត្រូវបង់៣០០ដុល្លារក្នុង១ខែ។
ក្នុងចម្លើយបញ្ជាក់ថា សមត្ថកិច្ចទាំងនោះថា ចាំមេមកសិន ចាំសម្រួលគ្នា លុះនៅម៉ោងប្រមាណ០៨យប់ថ្ងៃដដែល(ថ្ងៃទី២ សីហា) មេក៏មកដល់បានប្រាប់ឲ្យពួកគេទៅសម្រួលគ្នាក៏ទារប្រាក់បីពាន់ដុល្លារ នឹងព្រមយក១០លានរៀល ដោយសារតែតថ្លៃគ្នា ចំណែកក្រុមមួយទៀតទាមទារចំនួន៤ពាន់ដុល្លារ តែតថ្លៃសល់ត្រឹម៣ពាន់ដុល្លារ។ ហើយមួយក្រុមផ្សេងទៀតទាមទារក្រោយគេដោយរថយន្ត១គ្រឿងតម្លៃ២ពាន់ដុល្លារ សរុប៣គ្រឿងចំនួន៦ពាន់ដុល្លារ។ ក្រោយចរចាក៏ព្រមយកត្រឹម៥ពាន់ដុល្លារ ក្នុងចំណោមរថយន្តទាំង៣គ្រឿង។
ក្រោយបញ្ចប់ការចចាម្ចាស់រថយន្តដឹកឈើបានទៅរកប្រាក់ តែចៃដន្យក៏មានអ្នកកាសែតមួយក្រុមចុះទៅយកព័ត៌មាននៅចំណុចរថយន្តដឹកឈើជាប់ផុង។ ឃើញសភាពការណ៍មិនស្រួលបែបនេះ សមត្ថកិច្ចទាំងនោះខ្សឹបឲ្យជនសង្ស័យរត់គេចខ្លួន ព្រោះពួកគេឈប់ទទួលប្រាក់ហើយ ប្រយ័ត្នពួកគេចាប់។ និយាយរួចក៏មានមន្ត្រីបរិស្ថានចុះទៅឃាត់ខ្លួនមនុស្ស២នាក់យកទៅសាកសួរនៅល្ងាចថ្ងៃទី៤ សីហា តែម្តង គឺចប់ត្រឹមមន្ត្រីបរិស្ថានចាប់ទាំងដុលតែម្តង។ បើកុំចាប់ទាន់ ឈើនេះនឹងធ្លាយទៅដល់ទីតាំងឧកញ៉ាឈ្មួញឈើនៅស្រុកស្នួលដែលគាត់អត់ទាន់ឈប់ទេ។
គិតត្រឹមវេលាម៉ោង១០និង៣០នាទីព្រឹក ថ្ងៃទី៥ សីហា ២០១៨ លោក ឌិន ប៊ុនធឿន នាយកដែនជម្រកសត្វព្រៃកែវសីមាឲ្យដឹងថា រថយន្តដឹកឈើទាំង៣គ្រឿងបាននាំយកទៅរក្សាទុកនៅស្នាក់ដែនជម្រក ចំណែកមនុស្សទាំងពីរនាក់នឹងត្រូវបញ្ជូនទៅសាលាដំបូងខេត្ត នារសៀលថ្ងៃទី៥ សីហា ក្រោមបទចោទប្រកាន់ដឹកជញ្ជូនផលអនុផលព្រៃឈើដោយគ្មានការអនុញ្ញាត។
ចែករំលែកព័តមាននេះ