ខេត្តមណ្ឌលគិរី ៖ ពិតជាអាសូរចំពោះកុមារីម្នាក់ដែលត្រូវបាត់បង់ជីវិតដោយសារតែជំនឿ ខណៈរូបនាងរងនូវការឈឺចាប់អស់រយៈពេល៣ថ្ងៃតាំងពីល្ងាចថ្ងៃទី១ សីហា ក្រោយជួបហេតុការណ៍សត្វពស់មានពិសចឹក រហូតដល់នាងទ្រាំលែងបានក៏ស្លាប់ ហេតុការណ៍នេះកើតឡើងនៅថ្ងៃទី៣ ខែសីហា ឆ្នាំ២០១៨…
ខេត្តមណ្ឌលគិរី ៖ ពិតជាអាសូរចំពោះកុមារីម្នាក់ដែលត្រូវបាត់បង់ជីវិតដោយសារតែជំនឿ ខណៈរូបនាងរងនូវការឈឺចាប់អស់រយៈពេល៣ថ្ងៃតាំងពីល្ងាចថ្ងៃទី១ សីហា ក្រោយជួបហេតុការណ៍សត្វពស់មានពិសចឹក រហូតដល់នាងទ្រាំលែងបានក៏ស្លាប់ ហេតុការណ៍នេះកើតឡើងនៅថ្ងៃទី៣ ខែសីហា ឆ្នាំ២០១៨ ស្ថិតនៅផ្ទះក្នុងភូមិស្រែជ្រៃ ឃុំណងឃីលឹក ស្រុកកោះញែក ខេត្តមណ្ឌលគិរី ។
ប្រភពបានឲ្យដឹងថា កុមារីដែលរងគ្រោះរហូតស្លាប់ខាងលើបានលេងនៅជិតផ្ទះដែលមានដុះស្មៅស៊ុបទ្រុប ខណៈនាងកំពុងលេងស្រាប់តែស្រែយំជាខ្លាំងបង្កឱ្យភ្ញាក់ផ្អើលដល់ក្រុមគ្រួសាររត់ទៅមើល ទើបដឹងថា នាងត្រូវពស់ចឹកចំម្រាមជើងឆ្វេង ប៉ុន្តែរកពស់មិនឃើញហើយមិនដឹងថា ជាពស់ប្រភេទអ្វី។
ភ្លាមៗនោះក្រោយដឹកថា សត្វពស់ចឹកឪពុកម្តាយបាននាំយកទៅផ្ទះគ្រូខ្មែរឱ្យជួយស្តោះផ្លុំ តែកន្លងហួសជាច្រើនថ្ងៃរបួសកុមារីមិនបានធូរស្រាលឡើយ រឹតតែបន្ថែមការឈឺចាប់លើមុខរបួសរបស់កុមារីកំសត់ រហូតដល់ផុតដង្ហើមក្រោមការសោកស្តាយក្រៃលែងពីអាណាព្យាបាល ដែលមិនព្រមនាំទៅមន្ទីរពេទ្យទើបបណ្តាលឲ្យកូនស្រីជាទីស្រឡាញ់បាត់បង់ជីវិតបែបនេះ។
បើតាមនគរបាលនៅឃុំណងឃី បានរំលឹកឲ្យដឹងថា ក្មេងស្រីរងគ្រោះខាងលើឈ្មោះ ខុំ កែវ មានអាយុ៩ឆ្នាំ ចំណែកឪពុកឈ្មោះ ចាន់ ខុំ និងម្តាយឈ្មោះ ខាំ ភីហិប ។ ហើយចំពោះករណីនេះមាតាបិតាក៏ដូចជាប្រជាពលរដ្ឋទូទៅកុំឱ្យមានការធ្វេសប្រហែសនៅពេលជួបហេតុការណ៍បែបនេះ ត្រូវរូតរះទៅរកគ្រូពេទ្យជំនាញដែលនៅជិតបំផុត ដើម្បីសង្គ្រោះជីវិត ព្រោះមានតែគ្រូពេទ្យទេ ទើបមានវិធីជួយបន្សាបពិសពស់បាន៕
ចែករំលែកព័តមាននេះ