ខេត្តបាត់ដំបង ៖ សមត្ថកិច្ចបានរាយការណ៍ថា បុរសម្នាក់ទំនងជាស្រវឹង បានជិះម៉ូតូធ្លាក់ប្រឡាយទឹកស្អុយ ឈ្លក់ស្លាប់ រហូតដល់ព្រឹកថ្ងៃទី០៤ សីហា ទើបអ្នកភូមិប្រទះឃើញ ។…
ខេត្តបាត់ដំបង ៖ សមត្ថកិច្ចបានរាយការណ៍ថា បុរសម្នាក់ទំនងជាស្រវឹង បានជិះម៉ូតូធ្លាក់ប្រឡាយទឹកស្អុយ ឈ្លក់ស្លាប់ រហូតដល់ព្រឹកថ្ងៃទី០៤ សីហា ទើបអ្នកភូមិប្រទះឃើញ ។ បើតាមសាក្សីនានានិយាយថា ហេតុ ការណ៍នោះ ទំនងបានកើតឡើងនៅវេលារំលងអធ្រាត្រ ឈានចូលថ្ងៃទី០៤ សីហា នេះ នៅចំណុចភូមិចំការសំរោង២ សង្កាត់ចំការសំរោង ក្រុងបាត់ដំបង ។
ស្ថិតនៅកន្លែងកើតហេតុ មិនមានអ្នកស្គាល់បុរសនោះទេ តែគាត់មានភ្ជាប់ជាមួយនូវអត្តសញ្ញាណប័ណ្ណជាប់នឹងខ្លួន ។ មិនទាន់មានអ្នកស្គាល់ថា ជនរងគ្រោះស្នាក់នៅទីណាទេ តែបើតាមអត្តសញ្ញាណប័ណ្ណបុរសនេះឈ្មោះជឿត យាត អាយុ៣០ឆ្នាំ រស់នៅភូមិប៉ោយស្នួល ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ជិះម៉ូតូម៉ាកWave ពណ៌ក្រហមសេរីចាស់ ។ កម្លាំងសមត្ថកិច្ចបានចុះទៅពិនិត្យសាកសពនៅកន្លែងកើតហេតុភ្លាមៗដែរ ក្រោយពីពលរដ្ឋបានរាយការណ៍ ។
សមត្ថកិច្ចបានសន្និដ្ឋានជាបឋមដំបូងថា ជនរងគ្រោះទំនងជាស្រវឹងទើបជិះម៉ូតូធ្លាក់ប្រឡាយទឹកស្អុយឈ្លក់ទឹកស្លាប់បែបនេះ ។ សមត្ថកិច្ចបានដឹកសាកសពទៅតម្កល់ទុកនៅវត្តពោធិវង្សជាបណ្ដោះអាសន្ន ដើម្បីរង់ចាំក្រុមគ្រួសារ ។
ចែករំលែកព័តមាននេះ