ចិន ៖ តាមប្រភពព័ត៌មាន Shanghaiist បានឲ្យដឹងថា បុគ្គលិកធ្វើការនៅស្ថានីយយកថ្លៃផ្លូវបានឃាត់រថយន្តមួយគ្រឿង ក្រោយលឺសម្លេងមនុស្សក្នុងនោះស្រែកឲ្យជួយ កាលពីពេលរសៀល ថ្ងៃទី២៣ ខែកក្កដា ។
បុគ្គលិកធ្វើការនៅស្ថានីយយកថ្លៃផ្លូវក្នុងក្រុង Dezhou បានធ្វើការតតាំងទៅនឹងម្ចាស់រថយន្ត ក្រោយពេលលឺសម្លេងស្រែកឲ្យជួយ។ គាត់បានប្រាប់ម្ចាស់រថយន្តពណ៌ប្រផេះឲ្យបើកកញ្ចក់រថយន្តខាងក្រោយ តែបុរសជាតៃកុងមិនព្រមធ្វើតាម ដែលជាហេតុធ្វើឲ្យមានការសង្ស័យ។
បុគ្គលិកដែលមិនបានបញ្ចេញឈ្មោះ បានរត់ចេញពីក្នុងបន្ទប់ធ្វើការ ហើយឈរនៅពីមុខរថយន្ត ដោយស្រែកហៅប៉ូលីស។ គ្រាន់តែលឺបែបនេះភ្លាម តៃកុងបានរត់ចោលរថយន្ត ហើយទុកបុរសម្នាក់ទៀតជាជនចាប់ជម្រិតនៅខាងក្រោយជាមួយនឹងជនរងគ្រោះ។ បុរសជាបុគ្គលិកក្លាហាន បានកាន់ប្រដាប់ជូតផ្ទះជាប់នឹងដៃ ហើយយកបំពង់ពន្លត់អគ្គិភ័យមកដាក់នៅពីមុខរថយន្ត ដើម្បីការពារមិនឲ្យជនសង្ស័យបើករត់ទៅណារួច។ ភ្លាមៗនោះ ជនសង្ស័យក៏បានចេញពីរថយន្តដោយមានដំបងជាប់នឹងដៃ ប៉ុន្តែគេមិនបានយកដំបងមកវាយលើបុរសជាបុគ្គលិកទេ បែរជាវាយជនរងគ្រោះនៅកៅអីក្រោយទៅវិញ។
ប៉ុន្មាននាទីក្រោយមក ប៉ូលីសក៏បានមកដល់ ហើយធ្វើការចាប់ខ្លួនបានជនសង្ស័យទាំងពីរនាក់ ចំណែកជនរងគ្រោះស្រាតខោ ស្ថិតនៅខាងក្រោយនៅរថយន្តជាមួយនឹងស្នាមជាំបែកឈាមពេញខ្លួន ប៉ុន្តែគេមិនទាន់ដឹងថា ពីរឿងស៊ីជម្រៅនៅឡើយទេ។
សកម្មភាពទាំងអស់ត្រូវបានថតជាប់ក្នុងកាមេរ៉ាសុវត្ថិភាព រីឯមហាជនបានកោតសរសើរចំពោះបុរសជាបុគ្គលិកស្ថានីយយកថ្លៃផ្លូវ ដែលហ៊ានប្រថុយជីវិតជួយជីវិតមនុស្សម្នាក់ទៀត៕ វីដេអូដកស្រង់ចេញពី ៖ CGTN
ចែករំលែកព័តមាននេះ