ខេត្តបន្ទាយមានជ័យ ៖ នៅឆ្នាំ២០១៨នេះ ខេត្តបន្ទាយមានជ័យមានកសិដ្ឋានចិញ្ចឹមគោ-ក្របីចំនួន៤០កន្លែង និងកសិករចិញ្ចឹមជាលក្ខណៈគ្រួសារ មានចំនួន១១១.៨០៧ក្បាល ។ កាលពីសម័យក្រោយរំដោះ កសិករក្នុងខេត្តនេះចិញ្ចឹមគោ-ក្របីសម្រាប់ប្រើប្រាស់ជាកម្លាំងអូសទាញក្នុងការងារស្រែចម្ការ ។…
ខេត្តបន្ទាយមានជ័យ ៖ នៅឆ្នាំ២០១៨នេះ ខេត្តបន្ទាយមានជ័យមានកសិដ្ឋានចិញ្ចឹមគោ-ក្របីចំនួន៤០កន្លែង និងកសិករចិញ្ចឹមជាលក្ខណៈគ្រួសារ មានចំនួន១១១.៨០៧ក្បាល ។
កាលពីសម័យក្រោយរំដោះ កសិករក្នុងខេត្តនេះចិញ្ចឹមគោ-ក្របីសម្រាប់ប្រើប្រាស់ជាកម្លាំងអូសទាញក្នុងការងារស្រែចម្ការ ។ ប៉ុន្តែក្រោយពីប្រទេសរីកចម្រើន ការងារកសិកម្មត្រូវបានប្រើប្រាស់គ្រឿងយន្ត ហើយកសិករបានលក់គោ-ក្របីនាំចេញទៅប្រទេសថៃ និងនាំចូលមកវិញនូវគ្រឿងយន្តកសិកម្ម ។
កសិករនៅក្នុងខេត្តនេះនិយាយថា សព្វថ្ងៃនេះ ក្រៅពីការងារបង្កបង្កើនផល ពួកគាត់បានចិញ្ចឹមពូជគោ-ក្របីនាំចូលពីបរទេស ។ ការចិញ្ចឹមនេះ ពួកគាត់យកស្មៅធម្មជាតិធ្វើជាចំណី និងទិញចំបើងពីប្រទេសថៃផងដែរ គឺតម្លៃ៩.០០០រៀលក្នុង១ដុំ និង១ការ៉ុងតម្លៃ១៥.០០០រៀល។ ក្រោយពីចិញ្ចឹមរយៈពេល៣ខែ គោ១ក្បាល (កាត់ថ្លៃចំណីរួច) គឺទទួលបានប្រាក់ចំណេញ៥០ម៉ឺនរៀល ។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាល បានប្រាប់ថា នៅខេត្តបន្ទាយមានជ័យ កសិករដែលចិញ្ចឹមគោ-ក្របី ជាលក្ខណៈគ្រួសារមានចំនួន១១១.៨០៧ក្បាល ក្នុងនោះការចិញ្ចឹមសម្រាប់ជាកម្លាំងអូសទាញមានចំនួន៥៦៦ក្បាល ។ ចំពោះស្រុកដែលចិញ្ចឹមច្រើនជាងគេ រួមមាន ស្រុកព្រះនេត្រព្រះ ចំនួន២៩.៧៧៥ក្បាល, ស្រុកភ្នំស្រុក ចំនួន១៧.៩១៧ក្បាល, ក្រុងសិរីសោភ័ណ ចំនួន១១.៦៣៤ក្បាល, ស្រុកម៉ាឡៃ ចំនួន១០.៥៥៩ក្បាល និងស្រុកស្វាយចេក ចំនួន១០.៣៩៣ក្បាល ។
លោកមានប្រសាសន៍ថា ៖« កសិករបានចិញ្ចឹមគោ-ក្របី ដែលយកពូជនាំចូលពីបរទេស មានប្រភេទពូជអុិនដូប្រាមាណ និងប្រាមាណ។ ការចិញ្ចឹម គឺឲ្យស៊ីស្មៅធម្មជាតិ និងស្មៅនាំចូលពីប្រទេសថៃ ។ ការចិញ្ចឹមមានរយៈពេល៣ខែ ហើយ១ក្បាលអាចបានកម្រៃ៥០ម៉ឺនរៀល ក្រោយកាត់ថ្លៃការទិញចំណីរួចរាល់ ។ គោ-ក្របីទាំងនេះ ឈ្មួញនាំចេញទៅប្រទេសថៃ និងវៀតណាម ព្រមទាំងលក់លើទីផ្សារក្នុងស្រុក គឺ១គីឡូក្រាមតម្លៃ១ម៉ឺនរៀល និងនាំចេញតម្លៃ៩.០០០រៀល » ។
លោក ហ៊ុយ ទូច បានបញ្ជាក់ថា មន្ត្រីជំនាញកំពុងយកចិត្តទុកដាក់ជំរុញឲ្យកសិករចិញ្ចឹមគោ-ក្របីសម្រាប់លក់ក្នុងស្រុក និងនាំចេញ ដោយមានមន្ត្រីជំនាញចុះពិនិត្យ និងថែទាំសុខភាពសត្វជូនកសិករផងដែរ ៕
ចែករំលែកព័តមាននេះ