ខេត្តកំពង់ចាម ៖ រថយន្តដឹកអ្នកដំណើរ១គ្រឿង ម៉ាកហ្វដចំណុះ១២កៅអី ពាក់ស្លាកលេខភ្នំពេញ ២Q-៣០៧៧ បានឆាបឆេះដោយសារតែឆ្លងចរន្តអាគុយ ។ ហេតុការណ៍នេះ កើតឡើងកាលពីវេលាម៉ោង០៨និង២០នាទីព្រឹកថ្ងៃទី៣០…
ខេត្តកំពង់ចាម ៖ រថយន្តដឹកអ្នកដំណើរ១គ្រឿង ម៉ាកហ្វដចំណុះ១២កៅអី ពាក់ស្លាកលេខភ្នំពេញ ២Q-៣០៧៧ បានឆាបឆេះដោយសារតែឆ្លងចរន្តអាគុយ ។ ហេតុការណ៍នេះ កើតឡើងកាលពីវេលាម៉ោង០៨និង២០នាទីព្រឹកថ្ងៃទី៣០ កក្កដា ស្ថិតនៅចំណុចវាលយន្តហោះចាស់ ក្នុងភូមិរមូល ឃុំរអាង ស្រុកកំពង់សៀម បណ្តាលឲ្យរថយន្តឆេះខ្ទេចសល់តែគ្រោងឆ្អឹង ។
មន្ត្រីនគរបាលស្រុកកំពង់សៀមប្រាប់ឲ្យដឹងថា រថយន្តនេះ ធ្វើដំណើរពីខាងលិចទៅខាងកើត លុះទៅដល់ចំណុចខាងលើ ស្រាប់តែឆេះតែម្តង ។ ម្ចាស់រថយន្តឈ្មោះ សួរ ថេង ភេទប្រុស អាយុ៣៨ឆ្នាំ នៅភូមិអំពិលលើ ឃុំអំពិល ស្រុកកំពង់សៀម ទិញពីគេមកក្នុងតម្លៃជិត២ម៉ឺនដុល្លារ ។
ប្រភពដដែលឱ្យដឹងទៀតថា ក្នុងពេលរថយន្តត្រូវភ្លើងឆេះនោះ លោកនាយប៉ុស្តិ៍បានទូរស័ព្ទរាយការណ៍មកលោកអធិការនគរបាលស្រុកកំពង់សៀម និងបានសុំឲ្យរថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត១គ្រឿង ទៅជួយបាញ់ទឹកពន្លត់ ។ ប៉ុន្តែទម្រាំរថយន្តពន្លត់អគ្គិភ័យទៅដល់ រថយន្តហ្វដនេះបានឆេះស្ទើរសុសសាច់អស់ទៅហើយ តែមិនបណ្តាលឲ្យរងគ្រោះអ្នកដល់អ្នកបើកបរទេ ។
ក្នុងការពន្លត់ភ្លើងឆេះរថយន្តនេះ សមត្ថកិច្ចប្រើប្រាស់ទឹកអស់២រថយន្ត ។ ក្នុងពេលរថយន្តត្រូវភ្លើងឆេះដំបូង ម្ចាស់រថយន្តបានដោះអាវរត់ទៅជ្រលក់ទឹកយកមកគ្របពន្លត់ ប៉ុន្តែគ្រាន់តែម្ចាស់បើកទ្វាររថយន្តអណ្តាតភ្លើងបានឆេះខ្លាំងពេញបន្ទុកទៅហើយ គឺមិនមានមធ្យោបាយណាពន្លត់បានទេ ។
នាយប៉ុស្តិ៍នគរបាលឃុំរអាង និយាយថា ប្រសិនណាបើរថយន្តនេះ បើកមកដល់ឆេះនៅមុខប៉ុស្តិ៍នោះ នគរបាលអាចនឹងជួយអន្តរាគមន៍បាញ់ទឹកពន្លត់បាន ព្រោះតែអាងទឹកនៅក្បែរងាយទាញទុយយោដោត
ម៉ូទ័រ ។ ប៉ុន្តែនេះ នៅចម្ងាយពីប៉ុស្តិ៍ប្រមាណ៥០០ម៉ែត្រ ហើយបើម្ចាស់រថយន្តមានបំពង់ពន្លត់អគ្គិភ័យដាក់តាមរថយន្តអាចនឹងបាញ់ពន្លត់បានទាន់ពេល ហើយភ្លើងមិនឆេះរាលដាលរហូតសល់តែគ្រោងឆ្អឹងនោះទេ។
រថយន្តនេះ ទើបតែទិញមកដឹកអ្នកដំណើរបានប៉ុន្មានខែប៉ុណ្ណោះ ក៏ជួបនឹងហេតុការណ៍អកុសលបែបនេះ ប៉ុន្តែក្នុងពេលដែលរថយន្តត្រូវភ្លើងឆេះមិនមានអ្នកដំណើរជិះក្នុងនោះទេ គឺមានតែម្ចាស់រថយន្តម្នាក់ប៉ុណ្ណោះ ៕
ចែករំលែកព័តមាននេះ