ខេត្តព្រៃវែង ៖ សេចក្តីរាយការណ៍ឱ្យដឹងថា រថយន្តនិងម៉ូតូរាប់ពាន់គ្រឿងបានកកស្ទះជាបន្តកន្ទុយគ្នាជាង
២គីឡូម៉ែត្រ ស្ថិតនៅលើកំណាត់ផ្លូវជាតិលេខ១ ចាប់ពីគល់ស្ពានអ្នកលឿងត្រើយខាងកើត រហូតដល់ខាងមុខសាខាគយ និងរដ្ឋាករខេត្តព្រៃវែង ដោយសារតែបងប្អូនប្រជាពលរដ្ឋសម្រុកនាំគ្នាធ្វើដំណើរត្រឡប់ទៅស្រុកកំណើត ដើម្បីចូលរួមបោះឆ្នោតថ្នាក់ជាតិ នៅថ្ងៃទី២៩ កក្កដា ។
ការកកស្ទះនេះ បានចាប់កើតមានឡើងតាំងពីរសៀលថ្ងៃទី២៧ កក្កដា រហូតដល់ម៉ោង៣ទៀបភ្លឺថ្ងៃទី២៨
កក្កដា ទើបចរាចរណ៍មានការធូរស្រាលឡើងវិញ ប៉ុន្តែបានតែប៉ុន្មានម៉ោងប៉ុណ្ណោះ គឺរហូតដល់ម៉ោង៧ព្រឹក គឺចរាចរណ៍ក៏បានចាប់ផ្តើមកកស្ទះសារជាថ្មី បើទោះបីជាកំលាំងកងរាជអាវុធហត្ថ និងនគរបាលស្រុកពាមរក៍ ខិតខំជួយសម្រួលចរាចរណ៍យ៉ាងណាក៏ដោយ។
កំលាំងសមត្ថកិច្ចដែលធ្វើចរាចរណ៌ នៅលើកំណាត់ផ្លូវនេះ បានអោយដឹងថា បើទោះបីជាកំណាត់ផ្លូវនេះ បានកកស្ទះខ្លាំងក៏ពិតមែន ប៉ុន្តែការកកស្ទះនេះ មិនបាននៅហ្នឹងថ្កល់នោះទេ គឺទាំងរថយន្តនិងម៉ូតូ អាចរំកិលទៅមុខបានបន្តិចម្តងៗ រហូតទៅផុតលែងស្ទះនៅចំណុចមុខសាខាគយ និងរដ្ឋាករខេត្ត ដោយចំណាយពេលកកស្ទះយ៉ាងយូរត្រឹមតែជិត១ម៉ោងប៉ុណ្ណោះ។
សមត្ថកិច្ចដដែលនេះបានបញ្ជាក់ថា មូលហេតុដែលធ្វើអោយមានការកកស្ទះខ្លាំងបែបនេះ គឺដោយសារតែបងប្អូនប្រជាពលរដ្ឋ សំរុកចាកចេញពីរាជធានីភ្នំពេញ វិលត្រឡប់ទៅស្រុកកំណើតវិញ ដើម្បីចូលរួមបោះឆ្នោត ។ ហើយការកកស្ទះនេះ អាចកើតឡើងម្តងទៀត នៅថ្ងៃទី៣០ កក្កដា ពេលដែលបងប្អូនទាំងអស់ នាំគ្នាវិលត្រឡប់ទៅរាជធានីភ្នំពេញវិញ ។
ជាមួយគ្នានោះដែរ ខាងសមត្ថកិច្ចបានសំណូមពរឱ្យបងប្អូនប្រជាពលរដ្ឋទាំងអស់ ត្រូវមានការប្រុងប្រយត្ន័ឱ្យបានខ្ពស់ ក្នុងការធ្វើដំណើរទាំងទៅទាំងមក ដើម្បីកុំឱ្យមានគ្រោះថ្នាក់ចរាចរណ៍កើតឡើង ដែលនាំអោយខាតបង់ទាំងពេលវេលា ថវិកា និងជាពិសេស គឺបាត់បង់ទាំងអាយុជីវិតតែម្តង ។
ចែករំលែកព័តមាននេះ