រាជធានីភ្នំពេញ ៖ ប្រតិភូសភាសង្គមស៊ីវិលរុស្ស៊ីចំនួន៨នាក់(ស្រីម្នាក់)ដឹកនាំដោយលោក Sergey Ordzhonikidze អនុប្រធាននៃសភាសង្គមស៊ីវិលរុស្ស៊ី កាលពីរសៀលថ្ងៃទី២៧ ខែកក្កដា ឆ្នាំ២០១៨នេះ បានមកដល់កម្ពុជាដើម្បីចូលរួមសង្កេតការណ៍បោះឆ្នោត នាថ្ងៃទី២៩ ខែកក្កដាខាងមុខ និងបានចុះអនុស្សរណៈ ពង្រឹងទំនាក់ទំនងសហប្រតិបត្តិការគ្នា ជាមួយវេទិកាសង្គមស៊ីវិលកម្ពុជា តំណាងដោយលោក គឹមរ័ត្ន ពិសិដ្ឋ នៅសណ្ឋាគារកាំបូឌីយ៉ាណាក្នុងទីក្រុងភ្នំពេញ។
លោក គឹម រ័ត្នពិសិដ្ឋ ប្រធានវេទិកាសម្ព័ន្ធសង្គមស៊ីវិលបានថ្លែងថា នេះជាលើកទី២ដែលតំណាងប្រតិភូ នៃសង្គមស៊ីវិល ទាំងពីរបានជួបគ្នាដែលលើកទី១ នៅទីក្រុងមូស្គូ ប្រទេសរុស្ស៊ី និងលើកទី២នៅទីក្រុងភ្នំពេញ ប្រទេសកម្ពុជា។ ចំពេលដែលកម្ពុជារៀបចំការបោះឆ្នោតជាតិអាណត្តិទី៦ ហើយប្រតិភូរុស្ស៊ីនឹងចូលរួមសង្កេតការណ៍បោះឆ្នោតនៅក្នុងប្រទេសកម្ពុជាជាមួយបណ្តាអ្នកសង្កេតការណ៍មកពីបណ្តាប្រទេសនានា។ លោក គឹមរ័ត្ន ពិសិដ្ឋ បានបញ្ជាក់ថា វេទិកាសម្ព័ន្ធសង្គមស៊ីវិលបានបង្កើត ឡើងកាលពីឆ្នាំ២០១៦ ក្នុងគោលបំណងប្រមូលផ្តុំទស្សនៈ មតិពីយោបល់ពីសំណាក់បញ្ញវ័ន្ត ក្រុមស្រាវជ្រាវ បណ្ឌិតសភាចារ្យ និងសង្គមស៊ិវិលតាមរយៈការសិក្សា និងកាស្រាវជ្រាវតាមបែបវិទ្យាសាស្ត្រ ហើយលទ្ធផលនៃកិច្ចសិក្សា និងការស្រាវជ្រាវនឹងត្រូវបានយកមកប្រើប្រាស់ជាធាតុចូលសម្រាប់គោលនយោបាយថ្មីៗ ដែលបម្រើឲ្យផលប្រយោជន៍សាធារណៈ តាមការស្ម័គ្រចិត្ត។
វេទិកាសម្ព័ន្ធសង្គមស៊ីវិលគឺជាវេទិកា សម្រាប់សម្របសម្រួល និងពង្រឹងកិច្ចសហប្រតិបត្តិការរវាងរាជរដ្ឋាភិបាល ជាមួយបណ្តាអង្គការ សង្គមស៊ីវិលជាតិ និងអន្តរជាតិ ដើម្បីធ្វើការពិភាក្សាលនញ្ហាប្រឈមសំខាន់ៗទាំងបញ្ហាប្រទេស តំបន់និងពិភពលោក។ ប្រធានប្រតិភូលោក Sergey Ordzhonikidze បានលើកឡើងថា លោកចង់ឲ្យមានការផ្លាស់ប្តូរនិស្សិតកម្ពុជាទៅសិក្សានៅរុស្ស៊ី និងនិស្សិតរុស្ស៊ីមកសិក្សានៅកម្ពុជា ដើម្បីសវែងយល់ពីវប្បធម៌នៃប្រទេសទាំងពីរ ដែលមានទំនាក់ទំនង និងកិច្ចសហប្រតិបត្តិការ ជាមួយគ្នាយូរមកហើយ។ សភាសង្គមស៊ីវិលរុស្ស៊ីត្រូវបានបង្កើតឡើងនៅក្នុងឆ្នាំ២០០៥ ក្រោមច្បាប់សហព័ន្ធស្តីពីសភាសង្គមស៊ីវិលនៃសហព័ន្ធរុស្ស៊ី។
គោលបំណងក្នុងការបង្កើតសភាសង្គមស៊ីវិលនេះឡើងដើម្បី៖ ១.ជួយឲ្យប្រជាពលរដ្ឋធ្វើការទំនាក់ទំនងជាមួយមន្ត្រីរដ្ឋាភិបាល និងអាជ្ញាធរមូលដ្ឋាន។ ២.គិតពីតម្រូវការ និងមតិរបស់ប្រជាពលរដ្ឋ។ ៣.ការពារសិទ្ធិសេរីភាពរបស់ពួកគេក្នុងដំណើរការរៀបចំ និងអនុវត្តគោលនយោបាយរបស់រដ្ឋ។ ៤.អនុវត្តការត្រួតពិនិត្យដោយប្រជាពលរដ្ឋលើសកម្មភាពរបស់អាជ្ញាធរប្រតិបត្តិ។ គួរបញ្ជាក់ថា សភាសង្គមស៊ីវិលរុស្ស៊ីមានការចូលរួមពីក្រុមសំខាន់ៗនៃប្រជាពលរដ្ឋរុស្ស៊ី និងតំណាងអង្គការក្រៅរដ្ឋាភិបាលជាតិ ថ្នាក់តំបន់ក៏ដូចជាអន្តរតំបន់។ ការកោះប្រជុំលើកទី៥(២០១៤.២០១៧ រួមមានសមាជិកចំនួន១៦៦នាក់ តំណាងឲ្យក្រុមសំខាន់ៗចំនួនបីគឺ ១.ប្រជាពលរដ្ឋចំនួន៤០រូបតែងតាំងពីប្រធានសហព័ន្ធរុស្ស៊ី ។ ២.អ្នកតំណាង៨៣រូប មកពីសភាសង្គមស៊ីវិលថ្នាក់តំបន់ និង៣.អ្នកតំណាង៤៣រូប មកពីសហគមនជាតិសាធារណៈ៕
ចែករំលែកព័តមាននេះ