រាជធានីភ្នមពេញ ៖ បុរសម្នាក់មិនដឹងថា មានបំណងទៅណានោះទេ គឺបានជិះម៉ូតូហុងដាឌ្រីម ក្នុងល្បឿនលឿនក៏បានជ្រុលទៅបុក និងរថយន្តមិនចាំម៉ាក ដែលចតស្ងៀមពីក្រោយ បណ្តាលឲ្យបុរសរូបនោះដួលបោកក្បាលហូរឈាមស្លាប់កៀបជាប់នឹងម៉ូតូ គួរឲ្យអាណោចអាធម៌ នៅនឹងកន្លែង ។ ហេតុការណ៍នេះដែរបានកើតឡើងនៅវេលាម៉ោង១១និង៣០នាទីយប់ថ្ងៃទី២៦ ខែកក្កដា ឆ្នាំ២០១៨ ជិតច្រកចូលទៅវត្តហារ ផ្លូវ៥០ម៉ែត្រ ភូមិពាម សង្កាត់ព្រៃស ខណ្ឌដង្កោ ។
សពជនរងគ្រោះមានឈ្មោះ សាមុន សាមាត ភេទប្រុស អាយុ២៧ឆ្នាំ មុខរបរកម្មករសំណង់ ស្នាក់នៅផ្ទះជួលភូមិព្រៃទា សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិអង្គរព្រះ ឃុំច្រេះ ស្រុកមេសាង ខេត្តព្រៃវែង ជិះម៉ូតូម៉ាកហុងដាឌ្រីម សេរីឆ្នាំ២០១៨ ពណ៌ខ្មៅ ពាក់ស្លាកលេខព្រៃវែង 1M – 8460 ។
តាមប្រភព័ត៌មានពីកន្លែងកើតហេតុបានឲ្យដឹងថា គេបានឃើញបុរសខាងលើមិនដឹងថា គោលបំណងទៅណានោះទេ គឺបានជិះម៉ូតូម៉ាកហុងដាឌ្រីមសេរីឆ្នាំ២០១៨ ពណ៌ខ្មៅបានធ្វើដំណើរតាមផ្លូវ៥០ម៉ែត្រក្នុងទិសដៅពីកើតទៅលិចក្នុងល្បឿនលឿនដូចហោះ ខណៈមកដល់ចំណុចកើតហេតុក៏ស្រាប់តែម៉ូតូរបស់ជនរងគ្រោះបានជ្រុលទៅបុក និងរថយន្តមិនចាំម៉ាកមួយគ្រឿងដែលចតស្ងៀមចំពីក្រោយពេញទំហឹង បណ្តាលឲ្យម៉ូតូស្រុញ.កខ្ទេចផ្នែកខាងមុខ ព្រមទាំងធ្វើឲ្យអ្នកបើកម៉ូតូដួលបោកក្បាលផ្កាប់មុខហូរឈាមស្លាប់ កៀបជាប់នឹងម៉ូតូគួរឲ្យអា ណោចអាធម៌បំផុត ។ ដោយឡែកខាងរថយន្តវិញដោយឃើញហេតុការណ៍បែបនេះបានបើករត់គេចខ្លួនបាត់ស្រមោលតែម្តង ។
ក្រោយពេលកើតហេតុសមត្ថកិច្ចមូលដ្ឋានបានចុះទៅដល់កន្លែងកើតហេតុ រួចហើយបានធ្វើកំណត់ហេតុប្រគល់សពជនរងគ្រោះឲ្យសាច់ញាតិយកទៅធ្វើបុណ្យនៅស្រុកកំណើតខេត្តព្រៃវែង ចំណែកម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌដង្កោ ដើម្បីរង់ចាំប្រគល់ឲ្យសាច់ញាតិជនរងគ្រោះវិញ ៕
ចែករំលែកព័តមាននេះ