រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានស្នើឲ្យមានការស៊ើបអង្កេតចំពោះអ្នកដើរខ្សឹបខ្សៀវរឿងម្រាមដៃស្អាតនៅសម្រាប់ថ្ងៃទី២៨ កក្កដា ២០១៨ ដើម្បីចាត់វិធានការតាមផ្លូវច្បាប់។ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារប្រចាំខេត្តព្រៃវែង និងខេត្តបាត់ដំបង បានលើកឡើងក្នុងពិធីសំណេះសំណាលជាមួយសមាជិក សមាជិកា គណបក្សប្រជាជនកម្ពុជា ស្រុកគាស់ក្រឡ ខេត្តបាត់ដំបង នៅព្រឹកថ្ងៃទី២៤ ខែកក្កដា ឆ្នាំ២០១៨ថា ថ្ងៃ២៨ កក្កដា យើងកុំធ្វើឲ្យអ្វីដែលច្បាប់ហាមឃាត់ ប៉ុន្តែយើងត្រូវត្រួតពិនិត្យកុំមានការដើរខ្សឹបខ្សៀវរឿងម្រាមដៃស្អាត។
សម្តេចបញ្ជាក់ថា៖« ថ្ងៃ២៨នឹង ជាថ្ងៃស្ងាត់ស្ងៀម ប៉ុន្តែយើងត្រូវពិនិត្យកុំឲ្យក្រពើឡើងលើគោក។ ថ្ងៃនេះជាថ្ងៃស្ងាត់ស្ងៀមពិតមែន តែពួកគេមិនស្ងាត់ស្ងៀមទេ គេមិនធ្វើអ្វីទេ តែគេដើរខ្សឹបប្រាប់ពលរដ្ឋឲ្យម្រាមដៃស្អាត។ យើងកុំធ្វើបាបគាត់អី ប៉ុន្តែត្រូវរារាំងព្រោះថា សកម្មភាពដែលអ្នកឯងគឺដើរខ្សឹបមិនឲ្យគេទៅ បោះឆ្នោត ហើយការដើរប្រាប់គេមិនឲ្យទៅបោះឆ្នោត គឺខុសច្បាប់»។ ជាមួយគ្នានោះដែរ សម្តេចក្រឡាហោមក៏បានអះអាងថា ដំណើរការឃោសនាបោះឆ្នោត ប៉ុន្មានថ្ងៃមកនេះ មានភាពល្អប្រសើរ ដោយគ្មានបាតុភាព ឬហិង្សាណាមួយកើតឡើងនោះទេ។
ដែលករណីនេះបានបង្ហាញឲ្យអន្តរជាតិឃើញថា កម្ពុជាមានភាពចាស់ទុំខាងផ្នែកនយោបាយ ដោយប្រកាន់តាមលទ្ធិប្រជាធិបតេយ្យ។ សម្តេចក្រឡាហោម ស ខេង ក៏បានគូសបញ្ជាក់ថា គណបក្សប្រជាជនកម្ពុជាត្រូវតែឈ្នះ គឺការជ្រើសតាំងបោះឆ្នោតឲ្យប្រព្រឹត្តទៅដោយសេរី ត្រឹមត្រូវ យុត្តិធម៌ ដើម្បីបង្ហាញអន្តរជាតិថា កម្ពុជាបានប្រកាន់ខ្ជាប់ខ្ជួនតាមលទ្ធិប្រជាធិបតេយ្យ។ ជាងនេះ ទៅទៀតបង្ហាញថា កម្ពុជាបោះឆ្នោតសេរី និងត្រឹមត្រូវយុត្តិធម៌។ លោកសង្កត់ធ្ងន់ថា« យើងមិនអាចកាន់កាំភ្លើងទៅភ្ជង់អុ្នកនេះអុ្នកនោះឲ្យបោះឆ្នោតឲ្យនោះទេ គឺការបោះឆ្នោត ត្រូវធ្វើឡើង ដោយត្រឹមត្រូវ សម្ងាត់ និងធ្វើតាមនីតិវិធីច្បាប់»។
ក្នុងពិធីសំណេះសំណាលនោះដែរ សម្តេចក៏បង្ហាញ និងចង់ឃើញគណបក្សប្រជាជនកម្ពុជាឈ្នះឆ្នោត ដើម្បីបន្តដឹកនាំប្រទេស ទៅមុខបន្តទៀតផងដែរ។ គួររំលឹកថា ការលើកឡើងរបស់សម្តេចក្រឡាហោម ស ខេង ខណៈដែលក្រុមប្រឆាំង ទាំងក្នុង និងនៅក្រៅប្រទេសបានកំពុងធ្វើយុទ្ធនាការកុំឲ្យពលរដ្ឋទៅបោះឆ្នោតនៅថ្ងៃទី២៩ ខែកក្កដាឆ្នាំ២០១៨ខាងមុខនេះ ដោយរក្សាម្រាមដៃស្អាត ឬដេកនៅផ្ទះជាដើម។ លោក អ៊ុក គឹមហាន មន្ត្រីជាន់ខ្ពស់គណបក្សប្រជាជនកម្ពុជាបានឲ្យដឹងថា ការអំពាវនាវប្រជាពលរដ្ឋឲ្យប្រើប្រាស់ សិទ្ធិទៅបោះឆ្នោតមិនមែនជាការគំរាមកំហែងទេ គឺស្របតាមរដ្ឋធម្មនុញ្ញ តែការរារាំងឆន្ទៈ ប្រជាពលរដ្ឋដែលចង់ទៅបោះឆ្នោតមិនឲ្យទៅបោះឆ្នោត គឺខុសនឹងមាត្រា១៤២នៃច្បាប់ស្ដីពីការ បោះឆ្នោតជ្រើសតាំងតំណាងរាស្ត្រ ដែលត្រូវពិន័យជាប្រាក់ពី៥លាន ទៅ២០លានរៀល ដោយ គ.ជ.ប។
លោកបន្តថា វាយតម្លៃ ការរារាំងប្រជាពលរដ្ឋមិនឲ្យទៅបោះឆ្នោត សម រង្ស៊ី បានរារាំង ប្រជាពលរដ្ឋមិនឲ្យទៅបោះឆ្នោតតាមគ្រប់រូបភាព «ចលនាម្រាមដៃស្អាត ដេកផ្ទះឈ្នះស្អាត ចលនា ប្រជាពលរដ្ឋធ្វើទេសចរណ៍នៅថ្ងៃបោះឆ្នោត ចលនាប្រជាពលរដ្ឋទៅទទួលសម រង្ស៊ី…..» មានចរិតជាការញុះញង់ ដោយមានភ្ជាប់សារនយោបាយចោទប្រកាន់ថា ការបោះឆ្នោត ថ្ងៃ២៩ កក្កដា ២០១៨នេះ ក្លែងក្លាយ និងជាឆាកល្ខោន ដែលសកម្មភាពនេះមានការៀបចំជាខ្សែរយៈ មានអង្គការចាត់តាំងមានរចនាសម្ពន្ធត្រឹមត្រូវ បានបំពុលបរិយាកាសសង្គមឲ្យមជ្ឈដ្ឋានជាតិ អន្តរជាតិមានការភាន់ច្រឡំបាត់ទំនុកចិត្តលើការបោះឆ្នោត លើភាពស្របច្បាប់នៃស្ថាប័ន គ.ជ.ប ដែលនាំឲ្យកើតមានការតវ៉ាប្រឆាំងនឹងរដ្ឋអំណាច ធ្វើឲ្យសង្គមមានអសន្តិសុខ ប៉ះពាល់ដល់ សណ្ដាប់ធ្នាប់សាធារណៈនាំឲ្យជាតិកើតកលយុគ ដែលចាំបាច់ក្រសួងមហាផ្ទៃត្រូវតែ ចាត់វិធានការជាបន្ទាន់ដើម្បីការពារសេចក្តីសុខសាន្តរបស់ប្រជាពលរដ្ឋ ការពារផលប្រយោជ ន៍ជាតិ៕
ចែករំលែកព័តមាននេះ