ខេត្តត្បូងឃ្មុំ ៖ ស្ពានព្រែកតាខ្វាន់ ស្ថិតនៅភូមិទួលគរ ឃុំទន្លេបិទ ស្រុកត្បូងឃ្មុំ នារដូវទឹកទន្លេឡើងជន់លិចហូរកាត់ផ្លូវ បានក្លាយទៅជាកន្លែងលំហែកាយរបស់ក្រុមយុវជនយុវនារីនាំគ្នាមកលេងយ៉ាងសប្បាយ ។ ជាមួយនេះ អាជ្ញាធរក៏បានដាស់តឿនអ្នកដែលទៅលេង ត្រូវបង្កើនការប្រុងប្រយ័ត្នចៀសវាងកុំឱ្យរងគ្រោះលង់ទឹក ព្រោះថាទឹកហូរកួចត្របាញ់គួរឱ្យខ្លាច ។
យុវតីម្នាក់ឈ្មោះ ហួន កញ្ញា អាយុ១៨ឆ្នាំរៀននៅវិទ្យាល័យដីដុះ ក្រុងកំពង់ចាម និយាយ ថា នៅម៉ោងទំនេរពីការសិក្សានៅសាលារៀន រូបនាងនិងមិត្តភក្តិជា ច្រើននាក់ទៀតមានគ្នាប្រមាណ១០នាក់ បានជិះម៉ូតូចំនួន៥គ្រឿងមកលេងនៅព្រែកតាខ្វាន់ ក្នុងឃុំទន្លេបិទ ស្រុកត្បូងឃ្មុំ ដោយសារមានទឹកទន្លេមេគង្គឡើងមកលិចហូរកាត់ផ្លូវ ។ នៅពេលមកដល់នាង បានដើរកាត់ពីលើស្ពានបេតុងដែលមានទឹកហូរលិចលើស្មងជើង ។ ទិដ្ឋភាពដែលមើលទៅឃើញតែផ្ទៃទឹក ធ្វើឲ្យនាងមានអារម្មណ៍ជ្រះថ្លា ហើយអ្វីដែលមានភាពតានតឹងក្នុងចិត្តហាក់បីដូចជាបានរសាយអស់ដែរ ។
ពួកនាងនាំគ្នាមកកាន់ទីនេះមិនមែនមកងូតទឹកលេងទេ គឺគ្រាន់តែដើរមកមើលនិងថតយករូបភាពទុកជាអនុស្សាវរីយ៍ ព្រមទាំងបង្ហោះតាមហ្វេសប៊ុកចែកចាយទៅដល់មិត្តភក្តិផ្សេងៗទៀតឱ្យបានឃើញ ។ នេះជាលើកទី២ហើយ ដែលពួកនាងនាំគ្នាមកលេងបន្ទាប់ពីឆ្នាំកន្លងទៅ ។ លោក ភិន ឈុន មេឃុំទន្លេបិទ មានប្រសាសន៍ថា កាលពីប៉ុន្មានថ្ងៃមុនមានសិស្សសាលានាំគ្នាមកលេងនៅចំណុចស្ពានព្រែកតាខ្វាន់ ដែលមានទឹកទន្លេមេគង្គហូរកាត់លើផ្លូវបេតុង និងមើលទៅទំនងជាមិនចេះហែលទឹកទៀត ។
ខណៈរូបលោកដើរពិនិត្យមើលស្ថានភាពទឹកទន្លេ ដើម្បីរាយការណ៍ទៅលោកអភិបាលស្រុក ហើយបានឃើញក៏ហៅមកសួរនាំ និងឱ្យនាំគ្នាត្រឡប់ទៅផ្ទះវិញ ចៀសវាងលង់ទឹកទន្លេ ព្រោះថាទឹកហូរកួចត្របាញ់ខ្លាំង ។ ប្រសិនណាបើធ្វេសប្រហែសធ្លាក់ចូលទឹកនោះ នឹងហូរនាំយកមនុស្សទៅផ្នែកខាងក្រោមនិងមិនអាចហែលទឹកឡើងមកផ្នែកខាងលើវិញបានទេ ព្រោះអីទឹកហូរខ្លាំង ។លោកមេឃុំទន្លេបិទបញ្ជាក់ថា កាលពីឆ្នាំ២០១៧កន្លងទៅ មានមនុស្សម្នាក់បានលង់ទឹកស្លាប់នៅត្រង់ស្ពានព្រែកតាខ្វាន់នេះ ៕
ចែករំលែកព័តមាននេះ