ប្រទេសកូរ៉េខាងត្បូង ៖ ក្រុមអ្នករុករកកំណប់ទ្រព្យមានមូលដ្ឋាននៅក្រុងសេអ៊ូល បានអះអាងថា បានរកឃើញខ្មោចនាវាពិឃាតមួយរបស់រុស្ស៊ីដែលលិច តាំងពីឆ្នាំ១៩០៥ មក ដោយការវាយប្រហាររបស់ជប៉ុន។ យោងតាមពួកអ្នករុករកទាំងនោះថា នាវានេះដឹកមាសដល់២០០តោន…
ប្រទេសកូរ៉េខាងត្បូង ៖ ក្រុមអ្នករុករកកំណប់ទ្រព្យមានមូលដ្ឋាននៅក្រុងសេអ៊ូល បានអះអាងថា បានរកឃើញខ្មោចនាវាពិឃាតមួយរបស់រុស្ស៊ីដែលលិច តាំងពីឆ្នាំ១៩០៥ មក ដោយការវាយប្រហាររបស់ជប៉ុន។ យោងតាមពួកអ្នករុករកទាំងនោះថា នាវានេះដឹកមាសដល់២០០តោន ប៉ុន្តែរឿងនោះនាំឲ្យមានការបារម្ភពីការបំផ្លោងពាក្យចចាមអារ៉ាមខាងហិរញ្ញវត្ថុ។
បើតាមព័ត៌មានបានឱ្យដឹងថា ក្រុមហ៊ុនកូរ៉េខាងត្បូង SHINIL GROUP បានរកឃើញកាលពីថ្ងៃទី១៥ កក្កដា ខ្មោចនាវាពិឃាតឈ្មោះ DMITRI DONSKOI ក្នុងបាតសមុទ្រជម្រៅជាង៤៣០ម៉ែត្រ។ នោះជាខ្មោចនាវាពិឃាតនៃកងម៉ារីនរុស្ស៊ី ដែលកងនាវាចម្បាំងជប៉ុនបាញ់លិចកាលពីឆ្នាំ១៩០៥។ នាវាចំណុះ៥៨០០តោននេះ ដឹកកាក់ប្រាក់ និងដុំមាសមានតម្លៃប្រមាណជា១៣០ពាន់លានដុល្លារ។ នោះជាពាក្យចចាមអារ៉ាមចាស់នានា ដែលសហគ្រាសកូរ៉េខាងត្បូងនោះធ្លាប់ឮ។
ពួកអ្នករុករកមានសញ្ជាតិអង់គ្លេស កាណាដា និងកូរ៉េខាងត្បូង ប្រហែលជាពុំមែនអ្នកដំបូងគេដែលរកឃើញខ្មោចនាវានោះឡើយ ព្រោះល្បីពីរឿងកំណប់មហាសាល ហើយមានពាក្យចចាមអារ៉ាមនានា។
នៅកន្លែងមួយចម្ងាយមិនដល់២គីឡូម៉ែត្រផង ពីកោះ កូរ៉េខាងត្បូង ULLEUNGDO ក្រុមអ្នករុករក ដែលមាននាវាមុជទឹកធុនតូច២គ្រឿងជាជំនួយ អាចចុះរហូតដល់ខ្មោចនាវានេះ ដោយស្គាល់ឈ្មោះវា ព្រោះតែអក្សរនៅមើលឃើញច្បាស់ ទោះមានស្រទាប់ដី និងរុក្ខជាតិសមុទ្រ នៅជាប់ផ្នែកយ៉ាងធំនៃសំបកនាវា និងបណ្ដាកាណុងរបស់វាក្ដី។ នាវានោះរងការខូចខាតធ្ងន់ធ្ងរ ដោយការវាយប្រហារ តែប៉ុងនាវា ព្រមទាំងផ្នែកចង្ហៀងរបស់វានៅស្អាត។ នាវានោះត្រូវរងការវាយប្រហារពេលមានសង្គ្រាមរុស្ស៊ី-ជប៉ុនឆ្នាំ១៩០៥៕
ចែករំលែកព័តមាននេះ