រាជធានីភ្នំពេញ ៖ ជនជាតិបរទេសប្រុសម្នាក់កំពុងតែដើរចុចទូរស័ព្ទដៃឆែកផែនទីត្រូវបានជនសង្ស័យ២នាក់ឆក់ទូរស័ព្ទដៃម៉ាកiPhone6S បានសម្រេច ហើយរត់គេចខ្លួនបាត់ស្រមោល ហេតុការណ៍នេះបានកើតឡើងកាលពីវេលាម៉ោង៨និង១៥នាទីយប់ ថ្ងៃទី១៩ ខែកក្កដា ឆ្នាំ២០១៨ តាមបណ្តោយផ្លូវ៥៣កែងផ្លូវ១៣៦ នៅចំណុចផ្សារថ្មី ស្ថិតក្នុងសង្កាត់ផ្សារថ្មី៣ ខណ្ឌដូនពេញ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញជនជាតិបរទេសម្នាក់ អាយុប្រមាណ៣០ឆ្នាំ កំពុងតែដើរតាមបណ្តោយ៦៧ ក្នុងទិសដៅពីជើងទៅត្បូង ដើរបណ្តើរកំពុងតែចុចទូរស័ព្ទដៃ ដើម្បីឆែកផែនទីរកផ្លូវទៅសណ្ឋាគារ ខណៈពេលដើរមកដល់ចំណុចផ្លូវ៦៧ កែងផ្លូវ១៣៦ សង្កាត់ផ្សារថ្មី១ ខណ្ឌដូនពេញក៏ស្រាប់តែលេចមុខជនសង្ស័យ២នាក់ ជិះម៉ូតូមួយគ្រឿង ម៉ាកហុងដាឌ្រីម ពណ៌ខ្មៅ សេរី២០១៨ មិនចាំស្លាកលេខជិះ មកពីក្រោយជនរងគ្រោះកំពុងតែដើរបានជិះទៅជិត ហើយធ្វើសកម្មភាពឆក់ទូរស័ព្ទដៃម៉ាកiPhone 6S បានសម្រេច ហើយរត់គេចខ្លួនបាត់ស្រមោល ភ្លាមៗនោះដែលសមត្ថកិច្ចយាមនៅគោលដៅក្បែរកន្លែងកើតហេតុ ប្រទះឃើញក៏ជួយដេញតាម ប៉ុន្តែដេញតាមមិនទាន់ ។
នៅក្នុងទូរស័ព្ទដៃរបស់ជនរងគ្រោះនោះ នៅខាងក្រោយទូរស័ព្ទមានលុយចំនួន៣០០ដុល្លារផងដែរ ។
ក្រោយពេលកើតហេតុជនរងគ្រោះបានទៅដាក់ពាក្យបណ្តឹង នៅប៉ុស្តិ៍រដ្ឋនគរបាលផ្សារថ្មី១ ដើម្បីឲ្យសមត្ថកិច្ចស្រាវជ្រាវតាមរកជនសង្ស័យមកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ