រាជធានីភ្នំពេញ ៖ ក្រោយពីសហភាពអឺរ៉ុបចេញសេចក្ដីថ្លែងការណ៍មួយកាលពីថ្ងៃទី១២ កក្កដា កន្លងទៅ ដែលបង្ហាញចេតនាចង់ដកការអនុគ្រោះពន្ធ « អ្វីៗទាំងអស់ លើកលែងតែអាវុធ»ឬហៅថាEBA ចេញពីប្រទេសកម្ពុជា បានធ្វើឲ្យសង្គមស៊ីវិល វិស័យឯកជន និងអ្នកពាក់ព័ន្ធមួយចំនួន បង្ហាញនូវក្ដីបារម្ភថា ប្រសិនបើមានការដកមែននោះ ពិតជាមានផលប៉ះពាល់មកលើពលរដ្ឋកម្ពុជា ពិសេសកម្មករនិយោជិត ក្នុងវិស័យកាត់ដេរ ខណៈការនាំចេញទៅអឺរ៉ុបភាគច្រើនជាផលិតផលសម្លៀកបំពាក់ និងវាយនភ័ណ្ឌ ។
លោក សោម អូន ប្រធានក្រុមប្រឹក្សាសហជីពជាតិកម្ពុជា បានមានប្រសាសន៍តាមទូរស័ព្ទកាលពីថ្ងៃទី១៦ កក្កដា ថា ការនាំចេញពីកម្ពុជាទៅកាន់សហភាពអឺរ៉ុប ភាគច្រើនជាផលិតផលក្នុងវិស័យកាត់ដេរ ហើយវិស័យនេះដែរ ក៏ជាវិស័យឈានមុខមួយសម្រាប់ទ្រទ្រង់កំណើនសេដ្ឋកិច្ចកម្ពុជា ។ លោកទទួលស្គាល់ថា ៖« ការដកការអនុគ្រោះពន្ធចេញពីកម្ពុជា នឹងធ្វើឲ្យប៉ះពាល់ដល់ជីវភាពប្រជាពលរដ្ឋ ដូចនេះហើយទើបសហជីពជាតិកម្ពុជា ដែលតំណាងឲ្យកម្មករជាតិ៤០ម៉ឺននាក់ បានដាក់លិខិតទៅកាន់សហភាពអឺរ៉ុប ឲ្យពិចារណា មុននឹងដកចេញពីកម្ពុជា ខណៈប្រជាពលរដ្ឋកម្ពុជារាប់ម៉ឺននាក់កំពុងពឹងផ្អែកលើវិស័យកាត់ដេរ » ។ លោកថា ៖« យើងបានដាក់លិខិតទៅកាន់សហភាពអឺរ៉ុបរួចហើយ និងបានជម្រាបដល់សហភាពអឺរ៉ុបពីស្ថានភាពការងារ និងសិទ្ធិមនុស្សនៅកម្ពុជា ដោយបានបង្ហាញថា បច្ចុប្បន្ន រាជរដ្ឋាភិបាលបានផ្ដល់លក្ខខណ្ឌល្អៗជាច្រើនដល់កម្មករដូចដែលបានឃើញស្រាប់ហើយ ដូចជា ប្រាក់ខែគោលបានកើនឡើងជាបន្តបន្ទាប់ រហូតដល់១៧០ដុល្លារអាមេរិកក្នុង១ខែនៅឆ្នាំ២០១៨នេះ ហើយវានឹងបន្តឡើងទៀតនៅឆ្នាំបន្តបន្ទាប់ ។ ម្យ៉ាងទៀត របាយការណ៍របស់អង្គការពលកម្មពិភពលោក(ILO) ក៏បានភ្ជាប់ជាមួយ និងផ្ញើទៅកាន់សហភាពអឺរ៉ុបរួចហើយដែរ ។
លោក ព្រាប កុល នាយកប្រតិបត្តិរូបនេះបានថ្លែងនៅថ្ងៃដដែលថា ៖« ការប៉ះពាល់នឹងកើតមានឡើងច្រើនសម្រាប់ប្រជាពលរដ្ឋកម្ពុជាចំពោះការដកEBAនេះ ។ ជាក់ស្ដែង កម្មករ-កម្មការិនីរោងចក្រអាចប្រឈមនឹងការអត់ការងារធ្វើក្នុងវិស័យកាត់ដេរ ពីព្រោះតែថៅកែរោងចក្រ នឹងដកការវិនិយោគចេញពីកម្ពុជា ដោយសារការផលិតនៅកម្ពុជាមិនចំណេញ » ។ លោកថា ៖« បច្ចុប្បន្ននេះ ការនាំចេញផលិតផលក្នុងវិស័យកាត់ដេរទៅកាន់អឺរ៉ុប មានបរិមាណច្រើនណាស់ដោយមិនគិតពន្ធ ហើយបើសិនជាអឺរ៉ុបដកការអនុគ្រោះពន្ធEBAចេញពីកម្ពុជានោះ ភាគីជំនួញទាំងពីរគឺអឺរ៉ុប និងកម្ពុជា នឹងត្រូវចំណាយបន្ថែម៦០០លានដុល្លារទៅ៧០០លានដុល្លារអាមេរិកក្នុង១ឆ្នាំ » ។
លោកឧកញ៉ា វ៉ាន់ សូអៀង ប្រធានសមាគមរោងចក្រកាត់ដេរកម្ពុជា បានមានប្រសាសន៍ថា ទំនិញដែលនាំចេញពីកម្ពុជាទៅកាន់សហភាពអឺរ៉ុប មិនមែនភាគីកម្ពុជាជាអ្នកចំណាយទេ តែវាជាកាតព្វកិច្ចរបស់អ្នកនាំចូល ពោលគឺជាកាតព្វកិច្ចរបស់ឈ្មួញអឺរ៉ុបជាអ្នកបង់តែម្ដង ។ ដូច្នេះ លោកជឿថា ៖« អឺរ៉ុបអាចនឹងមិនដកEBAនេះចេញពីកម្ពុជាទេ »។ បន្ថែមលើនេះ លោកឧកញ៉ាបន្តថា ៖«កន្លងមក ក៏ដូចជាបច្ចុប្បន្ន សមាគមរោងចក្រកាត់ដេរ និងក្រសួងស្ថាប័នពាក់ព័ន្ធរបស់រាជរដ្ឋាភិបាលកម្ពុជា បានបញ្ចុះបញ្ចូលឲ្យសហគមន៍អាស៊ី-អឺរ៉ុប ដែលមានប្រទេស៥ សុទ្ធសឹងតែមានទីផ្សារធំ លើកលែងពន្ធនាំចូលពីកម្ពុជា នូវផលិតផលអាវរងាដែលមានតម្លៃខ្ពស់ ។បើសិនជាមានការលើកលែងមែននោះ អត្ថប្រយោជន៍ជាច្រើនសម្រាប់កម្ពុជា នឹងទទួលបានច្រើនបន្ថែមទៀត » ។ ជាការកត់សម្គាល់ផងដែរ ការព្រមានដកកម្ពុជាចេញពីការអនុគ្រោះពន្ធ «អ្វីៗទាំងអស់ លើកលែងតែអាវុធ (EBA)» នាពេលនេះ មិនមែនជាការព្រមានលើកទី១នោះទេ ហើយ
ប្រសិនបើពិតមានការដកមែននោះ កម្ពុជាក៏មានលទ្ធភាពរស់ដោយខ្លួនឯងបានដែរ ។
លោក សោម អូន ប្រធានក្រុមប្រឹក្សាសហជីពជាតិកម្ពុជា លើកឡើងថា ប្រសិនបើអឺរ៉ុបដកមែននោះ កម្ពុជាក៏មានលទ្ធភាពរស់ដោយខ្លួនឯងដែរ ពីព្រោះដូចដែលបានឃើញស្រាប់ហើយ កម្ពុជាកំពុងតែរីកចម្រើនលើវិស័យផ្សេងៗ ដែលអាចឲ្យកម្ពុជាប្រើប្រាស់អស់លទ្ធភាព ។ ណាមួយ ការដកEBAចេញពីកម្ពុជា មិនមែនមានន័យថា អឺរ៉ុបឈប់ឲ្យនាំចូលផលិតផលពីកម្ពុជានោះទេ ប៉ុន្តែក្នុងន័យនេះ គឺគេនឹងយកពន្ធនាំចូលចំពោះផលិតផលដែលនាំចូលពីកម្ពុជា ។ ទន្ទឹមនឹងនេះ អ្នកវិនិយោគលើវិស័យកាត់ដេរភាគច្រើនមកពីចិន ដូចនេះ បើសិនជាមានការដកការអនុគ្រោះពន្ធចេញពីកម្ពុជាមែននោះ លោកគិតថា វិនិយោគិនចិន និងវិនិយោគិនដទៃទៀត ដែលកំពុងវិនិយោគនៅក្នុងប្រទេសកម្ពុជា នឹងអាចងាកទៅរកការផលិតនូវផលិតផលណាដែលមានតម្លៃបន្ថែមខ្ពស់ ខណៈបច្ចុប្បន្ន កម្ពុជាក៏បានងាកទៅបណ្ដើរៗហើយផងដែរ ។
ដោយឡែក មន្ត្រីជាន់ខ្ពស់រាជរដ្ឋាភិបាលកម្ពុជា បានថ្លែងកាលពីចុងខែមីនាថា EBAរបស់អឺរ៉ុបមកលើកម្ពុជា មិនយូរមិនឆាប់ គេនឹងដកចេញហើយ គេនឹងមិនទុករហូតនោះទេ ។ លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ៖« បើតាមខ្ញុំព្យាករ EBA នេះ នឹងត្រូវគេដកនៅឆ្នាំ២០២៣ យ៉ាងយូរ ព្រោះគេនឹងមិនទុករហូតទេ ។ ម្យ៉ាងទៀត កម្ពុជាយើងក៏ជិតរួចផុតពីប្រទេសអភិវឌ្ឍន៍តិចតួចដែរ ដូចនេះ បើសិនជារួចផុតពីប្រទេសអភិវឌ្ឍន៍តិចតួច គេនឹងដកចេញទៅឲ្យប្រទេសណាដែលមានការអភិវឌ្ឍតិចជាងកម្ពុជា » ។ លោកបញ្ជាក់ថា កម្ពុជាបានងាកទៅបណ្ដើរៗហើយ គឺទៅរកការផលិតនូវផលិតផលណាដែលមានតម្លៃបន្ថែមខ្ពស់ ហើយវិស័យផ្សេងៗទៀត ក៏ឃើញថា មានកំណើនខ្ពស់ដែរ ហើយបើតាមការព្យាករ កម្ពុជានឹងក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ហើយនៅឆ្នាំ២០៥០ កម្ពុជានឹងក្លាយជាប្រទេសចំណូលខ្ពស់ ឬហៅថាប្រទេសអភិវឌ្ឍន៍ ។
គួរបញ្ជាក់ថា សហភាពអឺរ៉ុបបានចេញសេចក្តីថ្លែងការណ៍ដកប្រទេសកម្ពុជាចេញពីគ្រោងការណ៍ពាណិជ្ជកម្ម រួចកាតព្វកិច្ចពន្ធរបស់សហភាពអឺរ៉ុបគឺ «អ្វីៗទាំងអស់ លើកលែងតែអាវុធ» នេះ បានធ្វើឡើងក្រោយដំណើរទស្សនកិច្ចរបស់គណៈប្រតិភូនៃគណៈកម្មការអឺរ៉ុប និងសេវាកម្មវិធានការខាងក្រៅអឺរ៉ុបនៅកម្ពុជា កាលពីថ្ងៃទី៥ ដល់១១ ខែកក្កដា ឆ្នាំ២០១៨ ដើម្បីវាយតម្លៃអំពីស្ថានភាពនៃការវិវត្តគួរឲ្យព្រួយបារម្ភថ្មីៗ ស្ដីពីសិទ្ធិមនុស្ស និងការងារនៅកម្ពុជា » ។ សេចក្ដីថ្លែងការណ៍នេះបានសង្កត់ធ្ងន់ថា ៖« ការដកប្រទេសកម្ពុជាចេញពីគ្រោងការណ៍ពាណិជ្ជកម្ម រួចកាតព្វកិច្ចពន្ធរបស់សហភាពអឺរ៉ុបគឺជាវិធានការនៃជម្រើសចុងក្រោយ ប្រសិនជាកិច្ចខិតខំផ្សេងទៀតទាំងអស់របស់ខ្លួនបរាជ័យ ដើម្បីដោះស្រាយការព្រួយបារម្ភទាំងនេះ » ៕
ចែករំលែកព័តមាននេះ