រាជធានីភ្នំពេញ ៖ បុរសពីរនាក់ត្រូវបានកម្លាំងល្បាតប៉ុស្តិ៍នគរបាលភ្នំពេញថ្មីប្រទះឃើញសង្ស័យឆក់កាបូបមានការសង្ស័យក៏ជិះប្រដេញរហូតមានការផ្ទុះអាវុធ បណ្តាលឲ្យជនសង្ស័យម្នាក់ត្រូវរបួសដៃ ទើបអាចធ្វើការឃាត់ខ្លួនបានទាំងពីរនាក់ ដែលបង្កឲ្យមានការភ្ញាក់ផ្អើលឡើងកាលពីវេលាម៉ោង១០យប់ ថ្ងៃទី១៧ ខែកក្កដា ឆ្នាំ២០១៨ ត្រង់ចំណុចខាងត្បូងវត្តឃ្មួញ ប្រមាណ៥០ម៉ែត្រ តាមបណ្តោយហាណូយ ស្ថិតក្នុងសង្កាត់ឃ្មួញ ខណ្ឌសែនសុខ ។
ជនសង្ស័យទី១- ដែលជនអ្នកបើកម៉ូតូមានឈ្មោះ ហេង ដាវ៊ីត ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅសង្កាត់ភ្នំពេញថ្មី ខណ្ឌសែនសុខ ។ ទី២- ដែលជាអ្នកអង្គុយក្រោយមានឈ្មោះ សេន ឡេង ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅសង្កាត់ចោមចៅទី១ ខណ្ឌពោធិ៍សែនជ័យ។
បើតាមសម្តីពីសមត្ថកិច្ចប៉ុស្តិ៍នគរបាលរភ្នំពេញថ្មីបានរាប់រៀបប្រាប់ឲ្យដឹងថា នៅមុនពេលកើតហេតុមានគេរាយការណ៍តាមវិទ្យុទាក់ទងថា មានជនសង្ស័យពីរនាក់ជិះម៉ូតូហុងដាឌ្រីមមួយគ្រឿងបានធ្វើការសកម្មភាពឆក់កាបូបនៅខាងមុខផ្សារហេង លី តាមបណ្តោយផ្លូវ២៧១ ស្ថិតក្នុងសង្កាត់ទឹកល្អក់ទី៣ ខណ្ឌទួលគោកបានសម្រេច ហើយក្រុមជនសង្ស័យបានជិះម៉ូតូរត់គេចខ្លួនឆ្ពោះឡើងទៅផ្លូវ៥៩៨ ។ បន្ទាប់ពីបានដំណឹងពីវិទ្យុទាក់ទងរួចមក កម្លាំងសមត្ថកិច្ចក៏បានជិះល្បាតក្នុងមូលដ្ឋានក្រែងមានក្រុមជនសង្ស័យនោះជិះម៉ូតូគេចខ្លួនចូលមកក្នុងភូមិសាស្ត្ររបស់គាត់ ។ ខណៈពេលដែលជិះល្បាតមកដល់ចំណុចផ្លូវ៥៩៨កែងនឹងផ្លូវ១៩៨៦ ដែលជាភូមិសាស្ត្ររបស់ពួកគាត់ ស្រាប់តែប្រទះឃើញជនសង្ស័យទាំងពីរនាក់ខាងលើជិះម៉ូតូមួយគ្រឿងម៉ាកហុងដាឌ្រីម ស៊េរី០១៧ ពណ៌ខ្មៅ ពាក់ស្លាកលេខ ស្វាយរៀង1J-8936 ធ្វើដំណើរតាមបណ្តោយផ្លូវ១៩៨៦ ក្នុងទិសដៅពីកើតទៅលិច ។ ដោយអត្តសញ្ញាណជនសង្ស័យទាំងពីរអ្នកខាងលើរួមទាំងម៉ូតូ គឺស្រដៀង និងអត្តសញ្ញាណរបស់ក្រុមចោរឆក់កាបូបដែលគេរាយការណ៍ប្រាប់តាមវិទ្យុទាក់ទងខាងលើ ។
ប្រភពដដែលបន្តថា ភ្លាមៗមានការសង្ស័យទៅលើទាំងពីរនាក់នោះកម្លាំងសមត្ថកិច្ចបម្រុង និងធ្វើការស្ទាក់ឃាត់ ដើម្បីឆែកឆេរ និងសួរនាំ តែខណៈពេលដែលជនសង្ស័យឃើញកម្លាំងសមត្ថកិច្ចក៏ ស្រាប់តែបន្ថែមល្បឿនជិះរត់គេចខ្លួន ហើយសមត្ថកិច្ចក៏ធ្វើការជិះប្រដេញតាមពីក្រោយ ។ បន្ទាប់មកពេលដែលកំពុងធ្វើការជិះប្រដេញតាមផ្លូវជនសង្ស័យទាំងពីរនាក់ខាងលើនោះក៏បានធាក់ទៅលើម៉ូតូសមត្ថកិច្ចបណ្តាលឲ្យផ្ទុះអាវុធបាញ់មួយគ្រាប់ចំជនសង្ស័យទី២ ដែលអង្គុយពីក្រោយរងរបួសចំដៃខាងស្តាំ ។ ភ្លាមៗនោះដែលជនសង្ស័យមិនបានឈប់ម៉ូតូនោះទេ គឺនៅតែបន្តដំណើរទៅមុខទៀតរហូតមកដល់ចំណុចកើតហេតុជនសង្ស័យទាំងពីរនាក់ក៏បានផ្តួលម៉ូតូ ហើយសមត្ថកិច្ចក៏ធ្វើការចាប់ឃាត់ខ្លួនជនសង្ស័យទី១ដែលជាអ្នកបើកម៉ូតូបានភ្លាមៗ ។ ដោយឡែកជនសង្ស័យអង្គុយខាងក្រោយរងរបួសដៃខាងស្តាំបានងើបរត់ទៅលោតចូលប្រឡាយទឹកស្អុយដែលមានដើមកំផ្លោកដុះពេញនៅក្បែរនោះលេចបាត់ស្រមោល បន្សល់ទុកតែដានឈាមរបស់ជនសង្ស័យស្រក់ជាប់ និងដើមកំផ្លោក ។ ភ្លាមៗនោះកម្លាំងសមត្ថកិច្ច ធ្វើការនាំគ្នារុករកជនសង្ស័យដែលលោតទឹកប្រឡាយខាងលើអស់រយៈពេលមួយម៉ោងទើបជនសង្ស័យខាងលើព្រមងើបចេញពីទឹក រួចក៏ត្រូវសមត្ថកិច្ចធ្វើការឃាត់ខ្លួនតែម្តង ។
ចំពោះករណីខាងលើនោះនៅមិនទាន់មានការបញ្ជាក់ពីសមត្ថកិច្ចខណ្ឌសែនសុខប្រាប់ឲ្យដឹងថា ជនសង្ស័យទាំងពីរអ្នកខាងលើមានជាប់ពាក់ព័ន្ធ និងករណីអ្វីពិតប្រាកដនោះទេ ។ ក្រោយពេលកើតហេតុជនសង្ស័យទាំងពីរនាក់ខាងលើរួមទាំងវត្ថុតាងត្រូវបានសមត្ថកិច្ចនាំខ្លួនយកទៅសាកសួរ និងឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ៕
ចែករំលែកព័តមាននេះ