ខេត្តព្រះសីហនុ ៖ សេចក្តីរាយការណ៍បឋមឱ្យដឹងថា កាលពីវេលាម៉ោ០៧ និង៣០នាទីយប់ថ្ងៃទី១៦ កក្កដា មានករណីផ្ទុះអាវុធ (បាញ់គំរាម) បណ្តាលឱ្យរងរបួសជនជាតិចិនចំនួន៤នាក់ កើតឡើងនៅភោជនីយដ្ឋាន«ស៊ីហ៊ូ»…
ខេត្តព្រះសីហនុ ៖ សេចក្តីរាយការណ៍បឋមឱ្យដឹងថា កាលពីវេលាម៉ោ០៧ និង៣០នាទីយប់ថ្ងៃទី១៦ កក្កដា មានករណីផ្ទុះអាវុធ (បាញ់គំរាម) បណ្តាលឱ្យរងរបួសជនជាតិចិនចំនួន៤នាក់ កើតឡើងនៅភោជនីយដ្ឋាន«ស៊ីហ៊ូ» ស្ថិតនៅក្រុម០៩ ភូមិ០១ សង្កាត់០៣ ក្រុងព្រះសីហនុ ខេត្តព្រះសីហនុ ។
សេចក្តីរាយការណ៍បន្តថា ករណីផ្ទុះអាវុធបាញ់ក្រោមតុនេះ ត្រូវគេដឹងថា គឺបង្កឡើងដោយជនសង្ស័យ២នាក់ ពាក់មួកសុវត្ថិភាពពណ៌ខ្មៅ និងពាក់អាវខ្មៅធំដៃវែងទាំង២នាក់ ដោយពួកគេជិះម៉ូតូម៉ាកស្គូពី ពណ៌ក្រហម (ស្លាកលេខប្រើស្កុតបិទពីលើ) ហើយបានចុះពីលើម៉ូតូដើរសំដៅទៅជនរងគ្រោះ ដែលកំពុងអង្គុយផឹកស៊ី ហើយក៏ផ្ទុះអាវុធ បណ្តាលឱ្យត្រូវរបួសចំនួន៤នាក់ (ត្រូវជើងចំនួន៣នាក់ និងភ្លៅចំនួន១នាក់ ) ។ ជនសង្ស័យក្រោយធ្វើសកម្មភាពរួចបានជិះគេចខ្លួនបាត់អស់។
ប្រភពបន្តថា ជនរងគ្រោះទាំង៤នាក់ ១-ឈ្មោះ ZHANG KUN ភេទប្រុស អាយុ៣៩ឆ្នាំ ត្រូវចំភ្លៅខាងស្តាំ ២-ឈ្មោះ YANG HUAIHUN ភេទប្រុស អាយុ៤១ឆ្នាំ ត្រូវចំក្បាលជង្គង់ខាងស្តាំ ៣-ឈ្មោះ YANG JUN GING ភេទប្រុស អាយុ២៧ឆ្នាំ ត្រូវចំចុងភ្លៅស្តាំ និងដើមកំភួនជើងខាងឆ្វេង និង៤-ឈ្មោះ LIU WEIMIN ភេទប្រុស អាយុ៣៣ឆ្នាំ ត្រូវចំភ្លៅខាងស្តាំ ។ ជនរងគ្រោះទាំង៤នាក់ ស្នាក់នៅវិមានខ្សាច់.ស ចូលមកទេសចរណ៍ តាំងពីថ្ងៃទី១៤ កក្កដា នេះប៉ុណ្ណោះ ។
ស្ថិតនៅកន្លែងកើតហេតុ សមត្ថកិច្ចបានដកហូតវត្ថុតាងមានសំបកគ្រាប់ចំនួន៩ និងគ្រាប់មិនទាន់បាញ់ចំនួន១គ្រាប់ ។ បើតាមការសន្និដ្ឋានជំហានដំបូងថា ជាករណីគំនុំបាញ់គំរាម គ្មានបំណងសម្លាប់ជនរងគ្រោះ ទេហើយជនសង្ស័យអាចជាជនជាតិចិនដូចគ្នា ។ ករណីខាងនេះ កម្លាំងជំនាញកំពុងសហការជាមួយកម្លាំងអធិការនគរបាលក្រុង-ប៉ុស្តិ៍រដ្ឋបាល ស្រាវជ្រាវយ៉ាងយកចិត្តទុកដាក់បំផុត ដើម្បីស្វែងរកចាប់ខ្លួនជនសង្ស័យ មកផ្តន្ទាទោសតាមផ្លូវច្បាប់ ។
ចែករំលែកព័តមាននេះ