រាជធានីភ្នំពេញ ៖ ដោយមើលឃើញពីភាពរីកចម្រើននៃវិស័យទេសចរណ៍បានចូលរួមជំរុញកំណើនសេដ្ឋកិច្ច ក្រសួងទេសចរណ៍ បានសហការជាមួយគ្រឹះស្ថានមីក្រូហិរញ្ញវត្ថុ និងធនាគារ ដើម្បីផ្ដល់កម្ចីដល់យុវជន សិស្ស និស្សិត បុគ្គលិកក្រុមហ៊ុន អ្នកជំនាញទេសចរណ៍ និងសាធារណជន ដែលមានបំណងចង់សិក្សាជំនាញទាក់ទងនឹងវិស័យទេសចរណ៍នៅកម្ពុជា។ នេះបើយោងតាមសេចក្ដីប្រកាសព័ត៌មានរបស់ក្រសួងទេសចរណ៍ ចេញផ្សាយកាលពីថ្ងៃទី១១ កក្កដា ។
ក្រសួងទេសចរណ៍បានបញ្ជាក់ថា គម្រោងកម្ចីនេះ គឺដោយសារមើលឃើញផលប្រយោជន៍នៃវិស័យទេសចរណ៍ ក្នុងការចូលរួមជំរុញការអភិវឌ្ឍសេដ្ឋកិច្ច សង្គម បង្កើនប្រាក់ចំណូល និងបង្កើតឱកាសការងារដោយផ្ទាល់ និងដោយប្រយោលយ៉ាងច្រើនដល់ប្រជាពលរដ្ឋ ។ ក្រសួងបានបន្ថែមថា វិស័យទេសចរណ៍ ជាវិស័យដែលត្រូវការធនធានមនុស្សមានជំនាញវិជ្ជាជីវៈច្បាស់លាស់ ដើម្បីធានានូវការផ្តល់សេវាមួយប្រកបដោយគុណភាព ។ ផ្តើមពីនោះ ក្រោមកិច្ចសហការដ៏ល្អរវាងក្រសួងទេសចរណ៍ និងផ្នែកឯកជន ជាពិសេសសាលាបណ្តុះបណ្តាលវិជ្ជាជីវៈទេសចរណ៍, សមាគមក្នុងឧស្សាហកម្មទេសចរណ៍ និងគ្រឹះស្ថានធនាគារ និងហិរញ្ញវត្ថុ រហូតមកដល់ពេលនេះ មានគ្រឹះស្ថានធនាគារ និងហិរញ្ញវត្ថុជាច្រើនបានរៀបចំរួចជាស្រេចនៅក្នុងការផ្តល់កម្ចីសិក្សាសម្រាប់សិស្ស និស្សិត ក្នុងវិស័យទេសចរណ៍ ជាមួយលក្ខខណ្ឌដែលមានលក្ខណៈងាយស្រួលដល់អ្នកស្នើសុំកម្ចី និងអាចខ្ចីបានរហូតដល់៦ទៅ៧ឆ្នាំ ជាមួយនឹងអត្រាការប្រាក់ទាប ដោយមិនតម្រូវឲ្យមានទ្រព្យបញ្ចាំនោះឡើយ ។
ចំណែកការទូទាត់សងមានច្រើនជម្រើសដូចជា ៖ ១-នៅក្នុងអំឡុងពេលសិក្សា អ្នកខ្ចីអាចបង់សងតែការប្រាក់ប្រមាណ៤ដុល្លារអាមេរិកក្នុង១ខែ សម្រាប់ទំហំទឹកប្រាក់កម្ចីចំនួន៥០០ដុល្លារអាមេរិក ។
២-នៅក្នុងអំឡុងពេលសិក្សា អ្នកខ្ចីអាចបង់ទឹកប្រាក់ដើម និងការប្រាក់ប្រមាណ៤៦ដុល្លារអាមេរិកក្នុង១ខែ ក្នុងរយៈពេល១ឆ្នាំ សម្រាប់ទំហំទឹកប្រាក់កម្ចីចំនួន៥០០ដុល្លារអាមេរិក ។ ៣-បន្ទាប់ពីបញ្ចប់ការសិក្សា ពេលរកការងារធ្វើបានហើយ ទើបអ្នកខ្ចីបង់សងក៏បាន ទាំងប្រាក់ដើម និងការប្រាក់ប្រមាណ៤៦ដុល្លារអាមេរិកក្នុង១ខែ ក្នុងរយៈពេល១ឆ្នាំ សម្រាប់ទំហំទឹកប្រាក់កម្ចីចំនួន៥០០ដុល្លារអាមេរិក ។
ដូច្នេះ យុវជន សិស្ស និស្សិត បុគ្គលិកក្រុមហ៊ុន អ្នកជំនាញទេសចរណ៍ និងសាធារណជន ទាំងអស់ អាចធ្វើការទំនាក់ទំនងដោយផ្ទាល់ជាមួយគ្រឹះស្ថានធនាគារ និងហិរញ្ញវត្ថុ ដែលមានផ្តល់កម្ចីសិក្សាក្នុងវិស័យទេសចរណ៍ទាំងអស់នោះរួមមាន ៖១-ធនាគារអេស៊ីលីដា ភីអិលស៊ី ២-ធនាគារកាណាឌីយ៉ា កអ ។ ៣-ហ្វូតាបា មីក្រូហិរញ្ញវត្ថុ ភីអិលស៊ី ។ ៤-ហត្ថាកសិករ លីមីតធីត ។ ៥-គ្រឹះស្ថានមីក្រូហិរញ្ញវត្ថុក្រេឌីត ៦-គ្រឹះស្ថានមីក្រូហិរញ្ញវត្ថុ សេ អឹម ការ CMK ។ ក្រៅពីនោះ ក្រសួងទេសចរណ៍ក៏បានប្រកាសឲ្យដឹងដែរថា យោងតាមព័ត៌មានរបស់ គ្រឹះស្ថាន ធនាគារ និងហិរញ្ញវត្ថុ ដែលផ្តល់កម្ចីសម្រាប់សិស្ស និស្សិត ក្នុងវិស័យទេសចរណ៍នេះ ក៏មានការរៀបចំគោលនយោបាយផ្តល់កម្ចីសិក្សាសម្រាប់មុខជំនាញផ្សេងៗទៀតផងដែរ ។
លោកស្រី សូ ផន នារី អនុប្រធានធនាគារអេស៊ីលីដា ភីអិលស៊ី បានគាំទ្រគម្រោងផ្តល់ប្រាក់កម្ចីនេះ ហើយធនាគារអេស៊ីលីដា ក៏បានអនុវត្តនូវគម្រោងកម្ចីសិក្សានេះបានចំនួន៣៣ឥណទាន ស្មើនឹងប្រមាណ៣ម៉ឺនដុល្លាររួចមកហើយ ។
លោកស្រីថ្លែងថា ៖« ការផ្តល់កម្ចីសិក្សានេះ នឹងផ្តល់ឱកាសថ្មីមួយទៀតដល់និស្សិតក្រីក្រគ្មានលទ្ធភាពបង់ថ្លៃសិក្សា ដោយគ្រាន់តែមានអាណាព្យាបាលធានាសម្រាប់និស្សិតមិនទាន់មានការងារធ្វើ ។ សម្រាប់អ្នកមានការងារធ្វើ ហើយចង់បន្តការសិក្សា គ្រាន់តែមានគណនីបើកប្រាក់ខែនៅធនាគារអេស៊ីដា ជាការស្រេច » ។ គម្រោងកម្ចីខាងលើនេះ ក៏ទទួលបាននូវការអបអរសាទរពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាផងដែរ ដែលការចូលរួមរបស់គ្រឹះស្ថាន និងហិរញ្ញវត្ថុឯកជនទាំងអស់ក្នុងការរៀបចំឲ្យមានគម្រោងកម្ចីសម្រាប់សិស្ស និស្សិតនេះ ។
លោក ប៉ាក សុខុម រដ្ឋលេខាធិការក្រសួងទេសចរណ៍ បានថ្លែងថា បច្ចុប្បន្ន វិស័យនេះបានបង្កើតការងារផ្ទាល់ប្រមាណ៦២ម៉ឺននាក់ ស្មើនឹង១២,៣%នៃការងារសរុប ហើយនៅក្នុងឆ្នាំ២០២០ នឹងបង្កើតការងារផ្ទាល់បានប្រមាណជិត១លាននាក់, ឆ្នាំ២០២៥ ជិត១,២លាននាក់ និងឆ្នាំ២០៣០ បានចំនួន២លាននាក់ ដោយមិនគិតពីការងារដោយប្រយោលរាប់សិបម៉ឺននាក់ទៀត ៕
ចែករំលែកព័តមាននេះ