រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងក្នុងសំណុំរឿងរបស់អ្នកកាសែត និងថតភាពយន្តអូស្ត្រាលីដែលបានធ្វើលិខិតសុំទោសសម្តេច តេជោ ហ៊ុនសែន នាយករដ្ឋមន្ត្រី…
រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងក្នុងសំណុំរឿងរបស់អ្នកកាសែត និងថតភាពយន្តអូស្ត្រាលីដែលបានធ្វើលិខិតសុំទោសសម្តេច តេជោ ហ៊ុនសែន នាយករដ្ឋមន្ត្រី ដើម្បីរួចទោសនោះនឹងមានជនអគតិលើកឡើងច្រើន ប្រសិន បើបានលើកលែងទោសមែន ។
ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីលោក James Richetson អ្នកសារព័ត៌មាន និងជាអ្នកផលិតខ្សែភាពយន្តអូស្ត្រាលីបានសរសេរលិខិតមួយច្បាប់សុំទោសសម្តេចតេជោ ហ៊ុនសែន ដើម្បីឲ្យគាត់មានសេរីភាពវិញ កាលពីពេលថ្មីៗកន្លងមកនេះ ។
លោក សុខ ឥសានបានឲ្យដឹងតាមសារអេឡេចត្រូនិតតេឡេក្រាមនៅថ្ងៃទី១២ កក្កដា ឆ្នាំ២០១៨ថា ក្នុងនាមជាអ្នកកាសែត និងជាអ្នកថតភាពយន្តមិនមែនជាជនអវិជ្ជាទេ គឺសុទ្ធតែជាអ្នកចេះច្បាប់ ចេះដឹងពីទំនៀមទម្លាប់របស់ប្រទេសដែលខ្លួនទៅធ្វើការ ហើយភាគច្រើនចេះ ភាសារបស់ប្រជាជនប្រទេសនោះទៀតផង ។ ដូច្នេះការប្រព្រឹត្តខុសច្បាប់បោះឆ្នោត និងក្រមសីលធ៌មរបស់ គជប មិនមែនជាអំពើអចេតនា ឬមិនដឹងខុសត្រូវទេអាចចាត់ទុកជាចេតនាលំអៀងខាងនយោបាយទៅរកគណបក្សណាមួយដែលច្បាប់ហាមឃាត់ និងក៏ដូចជាក្រមសីលធ៌ម និងវិជ្ជាជីវសារព័ត៌មានដែរ ។
លោកបន្តថា ៖« ឥឡូវដល់ថ្ងៃតុលាការបើកសវនាការហើយទើបធ្វើការសុំទោសដោយគ្រាន់ តែសរសេរខ្លឹមសារលំៗ មិនច្បាស់លាស់ ។ ការសុំទោសដើម្បីបានរួចទោសនេះមានចំណុចមួយចំនួនគួរកត់សម្គាល់ ៖ បើមានការយោគយល់គេនឹងចោទថា ជារឿងនយោបាយមិនមែនជារឿងផ្លូវច្បាប់ទេ ។ ថា សមត្ថកិច្ចចាប់អ្នកអត់ខុសច្បាប់ចាប់ដោយសារការចង់ធ្វើទុក្ខបុកម្នេញអ្នសារព័ត៌មានឯករាជ្យដូចគេធ្លាប់ចោទរួចមកហើយ» ។លោកសុខឥសានក៏បានផ្តល់យ៉ាងដូច្នេះថា ដំណោះស្រាយ គឺមានតែទាំងអស់គ្នាគោរពសមត្ថកិច្ចតុលាការទុកឲ្យតុលាការវិនិច្ឆ័យតាមអង្គហេតុ និងអង្គសេចក្តីស្របតាមពិរុទ្ធភាពនៃអំពើល្មើសដោយព្រហើនចំពោះច្បាប់កម្ពុជា ។ គួរទុកឲ្យជនជាប់ចោទរកមេធាវីពូកែទៅតតាំងរឿងក្តីនេះនៅតុលាការទៅវាស្របតាមគោលការណ៍ប្រជាធិបតេយ្យ និងនីតិរដ្ឋដែលកំពុងត្រូវបានយកចិត្តទុកដាក់ពង្រឹងនៅកម្ពុជា ។
យោងតាមគេហទំព័រក្នុងស្រុកមួយបានឲ្យដឹងថាលោក Jemes Richetson បានសរសេរលិខិត ផ្ញើជូនសម្តេចតេជោ ហ៊ុនសែនដោយមានខ្លឹមសារថា លោកសូមអភ័យទោសចំពោះកំហុសឆ្គង របស់លោក ហើយបើសិនជាមានអ្វីដែលលោកអាចធ្វើបាន ដើម្បីលុបលាងកំហុសសូមឲ្យ លោកដឹង លោកនឹងធ្វើសម្រាប់លោកនាយករដ្ឋមន្ត្រី និងប្រទេសកម្ពុជា ។ លោកសូមអរគុណ ទុកជាមុនចំពោះការអនុគ្រោះដល់លោកជាជនបរទេសដែលមិនមានការយល់ដឹងច្បាស់លាស់ អំពីកម្ពុជាដូចជា លោក ។ លោក ជែម រីកឃិតសិនត្រូវបានអាជ្ញាធរចាប់ឃុំខ្លួនបណ្តោះអាសន្នអស់រយៈពេលជាងមួយឆ្នាំ មកហើយ ។ តុលាការបានចោទប្រកាន់ពីបទប្រមូលផ្ដុំព័ត៌មានជាអាទិ៍ដែលអាចធ្វើឲ្យអន្តរាយ ការការពារជាតិតាមមាត្រា៤៤៦ ដែលចែងថា អំពើទទួល ឬប្រមូលផ្ដុំ ដើម្បីផ្ដល់ទៅឲ្យរដ្ឋ បរទេស ឬភ្នាក់ងារបរទេសនូវព័ត៌មានវិធី វត្ថុ ឯកសារ ទិន្នន័យ ព័ត៌មានវិទ្យា ឬសាលាកបត្រ ដែលអាចធ្វើឲ្យអន្តរាយការការពារជាតិត្រូវផ្ដន្ទាទោសដាក់ពន្ធនាគារពី៥ឆ្នាំទៅ១០ឆ្នាំ ។
សូមជម្រាបថា លោកជេមស៍ រីកឃិតសិនត្រូវបានសមត្ថកិច្ចចាប់ខ្លួនកាលពីថ្ងៃទី០៣ ខែមិថុនា ឆ្នាំ២០១៧ ដោយសារតែលោកបានបង្ហោះយន្តហោះដ្រូនថតក្បួនឃោសនារបស់គណបក្សសង្គ្រោះជាតិនៅថ្ងៃចុងក្រោយនៃការឃោសនាបោះឆ្នោតឃុំសង្កាត់ កាលពីថ្ងៃទី០២ ខែមិថុនា ឆ្នាំ ២០១៧ ក្នុងរាជធានីភ្នំពេញ ៕
ចែករំលែកព័តមាននេះ