រាជធានីភ្នំពេញ ៖ ក្នុងរយៈពេល៥ឆ្នាំ ចាប់ពីចុងឆ្នាំ២០១៣ រហូតដល់បច្ចុប្បន្ននេះ រាជរដ្ឋាភិបាលកម្ពុជាទទួលបានជោគជ័យយ៉ាងធំធេងលើការងារអភិវឌ្ឍន៍វិស័យទេសចរណ៍ ដោយបង្កើតការងារដល់ពលរដ្ឋខ្មែរជាច្រើនលាននាក់ និងនាំមកនូវចំណូលប្រមាណ១៥.០០០លានដុល្លារបញ្ចូលក្នុងសេដ្ឋកិច្ចជាតិ ។ ក្រោមការដឹកនាំដ៏ត្រឹមត្រូវ…
រាជធានីភ្នំពេញ ៖ ក្នុងរយៈពេល៥ឆ្នាំ ចាប់ពីចុងឆ្នាំ២០១៣ រហូតដល់បច្ចុប្បន្ននេះ រាជរដ្ឋាភិបាលកម្ពុជាទទួលបានជោគជ័យយ៉ាងធំធេងលើការងារអភិវឌ្ឍន៍វិស័យទេសចរណ៍ ដោយបង្កើតការងារដល់ពលរដ្ឋខ្មែរជាច្រើនលាននាក់ និងនាំមកនូវចំណូលប្រមាណ១៥.០០០លានដុល្លារបញ្ចូលក្នុងសេដ្ឋកិច្ចជាតិ ។
ក្រោមការដឹកនាំដ៏ត្រឹមត្រូវ និងឈ្លាសវៃប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ប្រទេសកម្ពុជាបច្ចុប្បន្នមានសុខសន្តិភាព ស្ថិរភាពនយោបាយ សន្តិសុខសណ្តាប់ធ្នាប់ពេញលេញ និងមានការអភិវឌ្ឍរីកចម្រើនលើគ្រប់វិស័យ ក្នុងនោះវិស័យទេសចរណ៍រីកចម្រើនគួរជាទីមោទនៈ ។
ទេសចរណ៍កម្ពុជា ត្រូវបានចាត់ទុកជាវិស័យអាទិភាពមួយដើរតួជាមាសបៃតង ដែលរួមចំណែកយ៉ាងច្រើនដល់ការអភិវឌ្ឍសេដ្ឋកិច្ច-សង្គម ជាពិសេស ការពារបរិស្ថាន ពោលគឺចូលរួមដល់ការកសាងសេដ្ឋកិច្ចបៃតងនៅកម្ពុជា ដែលជាផ្នែកគាំទ្រដល់ការសម្រេចនូវគោលដៅអភិវឌ្ឍន៍ប្រកបដោយចីរភាពឆ្នាំ២០៣០ របស់អង្គការសហប្រជាជាតិ ។
យោងតាមរបាយការណ៍សង្ខេប ស្តីពីសមិទ្ធផលសំខាន់ៗរបស់រាជរដ្ឋាភិបាលកម្ពុជា ឆ្នាំ២០១៣-២០១៧ ចេញផ្សាយកាលពីខែមេសា ឆ្នាំ២០១៨កន្លងមកបានឲ្យដឹងថា នៅឆ្នាំ២០១៣ ចំណូលបានពីវិស័យទេសចរណ៍ មានចំនួន២.៥៤៧លានដុល្លារអាមេរិក, ឆ្នាំ២០១៤ ចំនួន២.៧៣៦លានដុល្លារអាមេរិក, ឆ្នាំ២០១៥ ចំនួន៣.០១២លានដុល្លារអាមេរិក, ឆ្នាំ២០១៦ ចំនួន៣.២១២លានដុល្លារអាមេរិក និងឆ្នាំ២០១៧ ចំនួន៣.៦៣៨លានដុល្លារអាមេរិក។ ដូចនេះ ក្នុងរយៈពេល៥ឆ្នាំមកនេះ វិស័យទេសចរណ៍រកចំណូលបានចំនួន១៥.១៤៥លានដុល្លារអាមេរិក ។
របាយការណ៍ដដែលបញ្ជាក់ថា រយៈពេល៥ឆ្នាំនេះ រាជរដ្ឋាភិបាល ដែលមានក្រសួងទេសចរណ៍ជាសេនាធិការ បានខិតខំប្រឹងប្រែងជំរុញការអភិរក្ស និងអភិវឌ្ឍន៍រមណីយដ្ឋានទេសចរណ៍នៅគ្រប់រាជធានី-ខេត្តទូទាំងប្រទេស។ បច្ចុប្បន្ន កម្ពុជាមានរមណីយដ្ឋានទេសចរណ៍ចុះបញ្ជីផ្លូវការប្រមាណជាង៣០០កន្លែង រួមមាន រមណីយដ្ឋានទេសចរណ៍វប្បធម៌ប្រវត្តិសាស្ត្រ១១៤កន្លែង, រមណីយដ្ឋានវប្បធម៌ប្រវត្តិសាស្ត្រធម្មជាតិ២១កន្លែង, រមណីយដ្ឋានកែច្នៃ៣៣កន្លែង, រមណីយដ្ឋានទេសចរណ៍វប្បធម៌ធម្មជាតិ២៧កន្លែង និងរមណីយដ្ឋានទេសចរណ៍ធម្មជាតិ១៩៦កន្លែង ។
អនុវត្តតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ដែលបានថ្លែងក្នុងឱកាសអបអរសាទរការដាក់បញ្ចូលឆ្នេរសមុទ្រកម្ពុជា ជាសមាជិកក្លិបឆ្នេរសមុទ្រស្អាតជាងគេបំផុតលើសកលលោក កាលពីថ្ងៃទី១១ ខែកក្កដា ឆ្នាំ២០១១ ដែលតម្រូវឲ្យក្រសួងទេសចរណ៍សហការជាមួយក្រសួង-ស្ថាប័នពាក់ព័ន្ធ និងអាជ្ញាធរមូលដ្ឋានខេត្ត តំបន់ឆ្នេរទាំង៤ ដាក់ចេញនូវចលនាប្រឡងប្រណាំងឆ្នេរស្អាត ដើម្បីជំរុញឲ្យមានការចូលរួមគាំទ្រដល់ចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» និងយុទ្ធនាការឃោសនាផ្សព្វផ្សាយទេសចរណ៍ «កម្ពុជា៖ ព្រះរាជាណាចក្រអច្ឆរិយ» ។
ក្នុងន័យនេះ ដើម្បីបង្កើនភាពប្រកួតប្រជែង ការអភិវឌ្ឍ និងគ្រប់គ្រងឆ្នេរសមុទ្រកម្ពុជាប្រកបដោយនិរន្តរភាព និងស្មារតីទទួលខុសត្រូវ ស័ក្តិសមជា «តារារះនាទិសនិរតី» ក្រសួងទេសចរណ៍ និងគណៈកម្មាធិការជាតិវាយតម្លៃទីក្រុងស្អាត សហការជាមួយគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា បានដាក់ចេញនូវចលនាប្រឡងប្រណាំងឆ្នេរស្អាតលើកទី១ ឆ្នាំ២០១៨ ក្នុងនោះឆ្នេរសាធារណៈ ឆ្នេរឯកជន ឆ្នេរកែច្នៃ និងកោះ នៅតាមខេត្តតំបន់ឆ្នេរសមុទ្រកម្ពុជាទាំងអស់ត្រូវចូលរួមកាតព្វកិច្ចក្នុងចលនាប្រឡងប្រណាំងឆ្នេរស្អាត ។
ជាមួយគ្នានេះ ក្រសួងទេសចរណ៍ក៏បានដាក់ចេញនូវស្តង់ដាផលិតផលទេសចរណ៍សំខាន់ៗមួយចំនួនដូចជា ស្តង់ដា MICEកម្ពុជា និងអាស៊ាន ទេសចរណ៍ស្តង់ដាកម្សាន្តក្នុងព្រៃស្តង់ដាសហគមន៍ទេសចរណ៍កម្ពុជា។ ក្រសួងទេសចរណ៍បានសហការជាមួយមជ្ឈមណ្ឌលឯកសារកម្ពុជារៀបចំអភិរក្សតំបន់ប្រវត្តិសាស្ត្រអន្លង់វែង ព្រមទាំងបានជំរុញឲ្យដំណើរការយុទ្ធនាការ «ទេសចរម្នាក់ ដើមឈើ១ដើម» និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ទូទាំងប្រទេស ដែលបច្ចុប្បន្ន យើងមានសហគមន៍ទេសចរណ៍ និងអេកូទេសចរណ៍៥៦កន្លែង ដែលត្រូវបានរាជរដ្ឋាភិបាលអភិវឌ្ឍន៍ និងកំពុងទទួលស្វាគមន៍ភ្ញៀវទេសចរជាតិ និងអន្តរជាតិ ។
ម្យ៉ាងទៀត ដើម្បីទាក់ទាញភ្ញៀវទេសចរ ក្រសួងទេសចរណ៍បានរៀបចំឲ្យមានប្រតិបត្តិការទេសចរណ៍ធំៗជាច្រើនរួមមាន ៖
១-ពិធីបុណ្យអង្គរសង្គ្រានចូលឆ្នាំប្រពៃណីជាតិ នៅរមណីយដ្ឋានអង្គរ, ពិធីបុណ្យសមុទ្រចំនួន៦លើក នៅតាមបណ្តាខេត្តជាប់មាត់សមុទ្រទាំង៤ គឺ ខេត្តកែប កំពត ព្រះសីហនុ និងខេត្តកោះកុងចាប់តាំងពីឆ្នាំ២០១១ ។
២-ពិធីបុណ្យទន្លេចំនួន៤លើក ចាប់ពីឆ្នាំ២០១៥ ដែលលើកទី១ ប្រារព្ធឡើងនៅខេត្តក្រចេះ, លើកទី២ ខេត្តកំពង់ចាម, លើកទី៣ ខេត្តស្ទឹងត្រែង និងលើកទី៤ ខេត្តកណ្តាល។
៣-ពិធីបុណ្យស្រូវលើកទី១ ឆ្នាំ២០១៦ នៅខេត្តបន្ទាយមានជ័យ ព្រមទាំងព្រឹត្តិការណ៍ទេសចរណ៍ជាច្រើនទៀតដែលបានទាក់ទាញភ្ញៀវទេសចរជាតិ និងអន្តរជាតិរាប់សិបម៉ឺននាក់ចូលទស្សនា ។
គិតត្រឹមឆ្នាំ២០១៧ កម្ពុជាមានសណ្ឋាគារសរុបចំនួន៧៨១ ស្មើជាង៤ម៉ឺន៥ពាន់បន្ទប់, ផ្ទះសំណាក់ជាង២.២០០ ស្មើជាង៣ម៉ឺន៣ពាន់បន្ទប់, ភោជនីយដ្ឋានជាង២.២០០កន្លែង, ម៉ាស្សាជាង៣០០កន្លែង, សេវាកម្សាន្តទេសចរណ៍៨កន្លែង, ទីភ្នាក់ងារទេសចរណ៍ជាង៦០០កន្លែង, ក្រុមហ៊ុនដឹកជញ្ជូនភ្ញៀវទេសចរ៣៨ និងមគ្គុទ្ទេសក៍ទេសចរជាង៥.២០០នាក់ រួមមាន មគ្គុទ្ទេសក៍ទេសចរភាសាចិន អង់គ្លេស បារាំង អាល្លឺម៉ង់ អ៊ីតាលី ជប៉ុន កូរ៉េ ម៉ាឡេស៊ី រុស្ស៊ី អេស្ប៉ាញ ថៃ និងវៀតណាម ។
ដោយឡែក ក្នុងរយៈពេល៤ខែដើមឆ្នាំ២០១៨នេះ កម្ពុជាទទួលបានភ្ញៀវអន្តរជាតិជាង២លាននាក់ កើនឡើងជិត១៤% ធៀបនឹងរយៈពេលដូចគ្នាកាលពីឆ្នាំ២០១៧ ។
ទោះបីជាវិស័យទេសចរណ៍កម្ពុជារីកម្រើនយ៉ាងខ្លាំងគួរឲ្យកត់សម្គាល់ក្តី ក៏រាជរដ្ឋាភិបាលនៅតែបន្តខិតខំអភិវឌ្ឍន៍តំបន់ទេសចរណ៍ថ្មីៗ, បង្កើនការផ្សព្វផ្សាយគោលដៅទេសចរណ៍ព្រះរាជាណាចក្រអច្ឆរិយៈទៅកាន់ទីផ្សារទេសចរណ៍អន្តរជាតិ និងពង្រឹងធនធានមនុស្សលើជំនាញទេសចរណ៍ឲ្យកាន់តែច្រើន ដើម្បីឆ្លើយតបនឹងកំណើនភ្ញៀវទេសចរជារៀងរាល់ឆ្នាំ ។
តាមការព្យាករ កម្ពុជានឹងទទួលបានភ្ញៀវទេសចរអន្តរជាតិប្រមាណ៦លាន២សែននាក់ នៅដំណាច់ឆ្នាំ២០១៨នេះ និងប្រមាណ៧លាននាក់នៅឆ្នាំ២០២០ ហើយអាចនាំមកនូវចំណូលប្រមាណ៥ពាន់លានដុល្លារអាមេរិក និងបង្កើតឱកាសការងារប្រមាណ១លាននាក់ផងដែរ ។
ការរីកចម្រើននៃវិស័យទេសចរណ៍ រាជរដ្ឋាភិបាលកម្ពុជាបានអភិវឌ្ឍន៍ផ្លូវថ្នល់ ស្ពាន ទឹក និងភ្លើង ពីទីក្រុងរហូតដល់ជនបទ ជាពិសេស កត្តាសន្តិភាពបានផ្តល់ទំនុកចិត្តឲ្យភ្ញៀវទេសចរអន្តរជាតិមកលេងកម្ពុជាកើនឡើងជាបន្តបន្ទាប់ ។
វិស័យទេសចរណ៍ ក្នុងរយៈពេល៥ឆ្នាំចុងក្រោយនេះ ពិតជាបានរួមចំណែកយ៉ាងសំខាន់ក្នុងការចូលរួមបង្កើតការងារជូនពលរដ្ឋខ្មែរ ដោយផ្ទាល់ និងប្រយោលរាប់លាននាក់ក្នុង១ឆ្នាំៗ ដែលធ្វើឲ្យពលរដ្ឋមានជីវភាពធូរធារ។ មិនតែប៉ុណ្ណោះ វិស័យទេសចរណ៍ ក៏ជាប្រភពចំណូលជាតិដ៏សំខាន់មួយដែរសម្រាប់យកទៅអភិវឌ្ឍន៍កម្ពុជាឲ្យរីកចម្រើន ។
តាមរយៈវិស័យទេសចរណ៍នេះ បានធ្វើឲ្យពិភពលោកស្គាល់ថា កម្ពុជា ជាប្រទេសមួយដែលសម្បូរទៅដោយប្រាង្គប្រាសាទ រមណីយដ្ឋានធម្មជាតិ និងប្រពៃណីទំនៀមទម្លាប់ វប្បធម៌ដ៏ល្អឯក សមដូចគេប្រសិទ្ធនាមថា កម្ពុជា ជាព្រះរាជាណាចក្រអច្ឆរិយ គ្មានប្រទេសណាមានដូចកម្ពុជាឡើយ ៕
ចែករំលែកព័តមាននេះ