ប្រតិបត្តិការត្រៀមជួយសង្គ្រោះនេះ ជារឿងស្មុគស្មាញដោយសារភ្លៀងចាប់ផ្តើមធ្លាក់មកវិញ កាលពីថ្ងៃសុក្រ ស្របពេលដែលមានគ្រោះថ្នាក់ស្លាប់បាត់បង់ជីវិតអ្នកមុជទឹកថៃម្នាក់ ដែលមាននាទីហែលទឹកយកដបខ្យល់អុកស៊ីហ្សែន ទៅដាក់ក្នុងរូងភ្នំ ។ គ្រោះថ្នាក់នោះ បានធ្វើឱ្យក្រុមអ្នកជួយសង្គ្រោះខ្លះបាក់ទឹកចិត្ត ។
មរណភាពរបស់អតីតទាហានម៉ារីនថៃម្នាក់ នៅក្នុងប្រតិបត្តិការជួយសង្គ្រោះនេះ បានតម្រូវឱ្យអាជ្ញាធរថៃពិនិត្យឡើងវិញ ពីយុទ្ធសាស្ត្រជួយសង្គ្រោះរំដោះក្មេងប្រុសថៃ ដែលកំពុងជាប់ក្នុងរូងភ្នំ ដោយសារទឹកជំនន់ជ្រៅក្នុងល្អាង ។
លោក Saman Kunan ជាអតីតទាហានថៃម្នាក់បានស្លាប់ ដោយសារខ្វះអុកស៊ីហ្សែន នៅពេលហែលចេញមកពីក្នុងរូងភ្នំវិញ ។ អតីតមន្ដ្រីនៃកងទ័ពជើងទឹកថៃរូបនេះ បានស្ម័គ្រចិត្តយកបំពង់អុកស៊ីហ្សែនទៅដាក់ពង្រាយនៅចំណុចសំខាន់ៗមួយចំនួននៅក្នុងរូងភ្នំ ប៉ុន្តែនៅពេលមុជទឹកត្រឡប់មកវិញ គាត់ខ្វះអុកស៊ីហ្សែនសម្រាប់ខ្លួនឯង រហូតសន្លប់បាត់ស្មារតី ហើយក្រោយមក បានស្លាប់បាត់បង់ជីវិតនៅម៉ោង១រំលងអធ្រាត្រថ្ងៃសុក្រទី៦ កក្កដា ។
ប្រធានមណ្ឌលដោះស្រាយវិបត្តិបន្ទាន់របស់ថៃ និងជាមេបញ្ជាការទ័ពជើងទឹកបាននិយាយជាជម្រើសដែលមានកាន់តែតិច សម្រាប់ជួយរំដោះយកមនុស្សចេញពីក្នុងរូងភ្នំ ។ លោក អាប៉ាកនយូកងកែវ មេបញ្ជាការកងកុម្មង់ដូរជើងទឹកថៃបាននិយាយប្រាប់អ្នកកាសែតថា «ដំបូងឡើយ យើងធ្លាប់គិតថា ក្មេងៗអាចស្នាក់នៅបន្តក្នុងរូងភ្នំ យូរតទៅទៀត… ប៉ុន្តែពេលនេះអ្វីៗបានផ្លាស់ប្តូរ ។ យើងមានពេលមួយជាកំណត់ប៉ុណ្ណោះ មិនអាចឱ្យពួកគេស្នាក់នៅបន្តរហូតដល់រាប់ខែនោះទេ» ។
ប្រធានមណ្ឌលដោះស្រាយវិបត្តិថៃទទួលស្គាល់ដែរថា ខ្យល់អុកស៊ីហ្សែននៅល្អាងដែលក្មេងកំពុងរង់ចាំចេញពីក្នុងរូងបានធ្លាក់ចុះពី២១មកនៅត្រឹម១៥ភាគរយ ។ គ្រូពេទ្យកំពុងមានវត្តមានជាប់ជាមួយកុមារដើម្បីតាមដានសុខភាពនិងបានបង្ហាត់ឱ្យពួកគេ រៀនដកដង្ហើមជាមួយម៉ាសក្នុងទឹកក្នុងករណីត្រៀមការបើកប្រតិបត្តិការរំដោះពួកគេចេញពីក្នុងរូងភ្នំ ។
ចែករំលែកព័តមាននេះ