រាជធានីភ្នំពេញ ៖ ផ្ទះឈើលើថ្មក្រោមមួយខ្នងត្រូវបានអគ្គីភ័យលេបត្របាក់អស់ទាំងស្រុងបង្កឲ្យមានការភ្ញាក់ផ្អើលកាលពីវេលាម៉ោង៧និង៣០នាទីយប់ ថ្ងៃទី៨ ខែកក្កដា ឆ្នាំ២០១៨ នៅចំណុចផ្ទះអត់លេខ ផ្លូវបេតុង ភូមិក្រាំងអង្ក្រងទី១សង្កាត់ក្រាំងធ្នង់ ខណ្ឌសែនសុខ។…
រាជធានីភ្នំពេញ ៖ ផ្ទះឈើលើថ្មក្រោមមួយខ្នងត្រូវបានអគ្គីភ័យលេបត្របាក់អស់ទាំងស្រុងបង្កឲ្យមានការភ្ញាក់ផ្អើលកាលពីវេលាម៉ោង៧និង៣០នាទីយប់ ថ្ងៃទី៨ ខែកក្កដា ឆ្នាំ២០១៨ នៅចំណុចផ្ទះអត់លេខ ផ្លូវបេតុង ភូមិក្រាំងអង្ក្រងទី១សង្កាត់ក្រាំងធ្នង់ ខណ្ឌសែនសុខ។
បើតាមសម្តីប្រជាពលរដ្ឋដែលនៅក្បែរកន្លែងកើតហេតុបានរៀបរាប់ប្រាប់ឲ្យដឹងថា នៅមុខពេលកើតហេតុ ផ្ទះខាងលើបានចាក់សោទ្វារ ព្រោះម្ចាស់ផ្ទះបានចេញទៅធ្វើការមិនទាន់ត្រឡប់មកវិញនោះទេ តែមានធុំក្លិនឈ្ងៀម និងមានផ្សែងហុយយ៉ាងខ្មួលខ្មាញ់ចេញមកពីផ្ទះកើតហេតុខាងលើ បន្ទាប់មកក៏ស្រាប់តែឃើញមានអណ្ដាតភ្លើងបានលេចមកឆាបឆេះផ្ទះកើតហេតុយ៉ាងសន្ធោសន្ធៅ ។
ប្រជាពលរដ្ឋបានបន្តទៀតថា ភ្លាមៗនោះប្រជាពលរដ្ឋក៏បានស្រែកឆោឡោបង្កឲ្យមានការភ្ញាក់ផ្អើលនាំគ្នាដងទឹក និងទាញទុយោបាញ់ពន្លត់ តែមិនអាចគ្រប់គ្រងស្ថានការណ៍ភ្លើង បាន ទើបរាយការណ៍ទៅសមត្ថកិច្ចមូលដ្ឋាន និងរថយន្តពន្លត់អគ្គីភ័យរបស់ស្នងការដ្ឋាននគរបាលរាជធានីឲ្យចុះមកជួយអន្តរាគមន៍ចំនួនបីគ្រឿងបានមកដល់ តែជាអកុសលពេលដែលរថយន្តពន្លត់អគ្គិភ័យចុះមកដល់ ផ្ទះកើតហេតុខាងលើត្រូវបានអគ្គីភ័យឆាបឆេះអស់ទាំងស្រុងបាត់ទៅហើយ។ ចំណែកឯរថយន្តពន្លត់អគ្គីភ័យបានត្រឹមតែបាញ់ពន្លត់រងើកភ្លើងដែលនៅសេសសល់តែប៉ុណ្ណោះ។
បើតាមសមត្ថកិច្ចបានឲ្យដឹងដែរថា ផ្ទះកើតហេតុខាងលើមានម្ចាស់ឈ្មោះ ស៊ុន សុខខន ភេទប្រុស អាយុ៤៨ឆ្នាំ មុខរបរសន្តិសុខ ស្នាក់នៅផ្ទះកើតហេតុខាងលើ មានទំហំ៤ម៉ែត្រគុណនឹង១០ម៉ែត្រ ជាប្រភេទផ្ទះឈើលើថ្មក្រោម បណ្តាលឱ្យរងការខូចខាតឆេះអស់ទាំងស្រុង។ តាមការសន្និដ្ឋានជំហានដំបូង សមត្ថកិច្ចបានបង្ហើបប្រាប់ថា បង្កឡើងដោយឆ្លងចរន្តអគ្គិសនី៕
ចែករំលែកព័តមាននេះ