រាជធានីភ្នំពេញ ៖ ច្រកព្រំដែនបាវិត មិនត្រឹមតែជាច្រកសម្រាប់នាំទំនិញចេញ-ចូលនោះទេ ក៏ប៉ុន្តែក៏ជាច្រកសំខាន់មួយសម្រាប់ទាក់ទាញភ្ញៀវទេសចរចូលមកទស្សនានៅក្នុងប្រទេសកម្ពុជា តាមតំបន់ទេសចរណ៍ល្បីៗនានាផងដែរ ។ តាមរបាយការណ៍របស់សមត្ថកិច្ចអន្តោប្រវេសន៍ប្រចាំច្រកព្រំដែនបាវិត ខេត្តស្វាយរៀង បានបង្ហាញថា…
រាជធានីភ្នំពេញ ៖ ច្រកព្រំដែនបាវិត មិនត្រឹមតែជាច្រកសម្រាប់នាំទំនិញចេញ-ចូលនោះទេ ក៏ប៉ុន្តែក៏ជាច្រកសំខាន់មួយសម្រាប់ទាក់ទាញភ្ញៀវទេសចរចូលមកទស្សនានៅក្នុងប្រទេសកម្ពុជា តាមតំបន់ទេសចរណ៍ល្បីៗនានាផងដែរ ។ តាមរបាយការណ៍របស់សមត្ថកិច្ចអន្តោប្រវេសន៍ប្រចាំច្រកព្រំដែនបាវិត ខេត្តស្វាយរៀង បានបង្ហាញថា ក្នុងរយៈពេល៥ខែដំបូងក្នុងឆ្នាំ២០១៨នេះ ចំនួនភ្ញៀវចេញ-ចូលតាមច្រកនេះមានចំនួនរហូតដល់៦៨៦.៤៦៩នាក់ ។
ក្នុងចំណោមនោះ ភ្ញៀវចូលមានចំនួន៣៣៩.០៦៧នាក់ ដោយជនបរទេសចូលសរុបមានចំនួន ២៥១.១៣៩នាក់ ។ សម្រាប់រយៈពេល៥ខែដំបូងនេះដែរ ភ្ញៀវចេញសរុបមានចំនួន ៣៤៧.៤០២នាក់ ក្នុងនោះភ្ញៀវទេសចរបរទេសចេញសរុបមានចំនួន២៦២.១៨៩នាក់ ។
បើតាមលោក យ៉ន សុភាជ ប្រធានអង្គភាពនគរបាលទេសចរណ៍ប្រចាំច្រកបាវិត បានឲ្យដឹងថា បរិមាណភ្ញៀវចេញ-ចូលតាមច្រកបាវិត គឺទៅតាមរដូវកាល ។ ជាក់ស្ដែង រដូវវស្សាមិនសូវមានភ្ញៀវចេញ-ចូលច្រើនទេ តែបើរដូវប្រាំងមានភ្ញៀវចេញ-ចូលច្រើន ។ លោកថា ៖«ចាប់ពីខែវិច្ឆិកា ដល់ខែឧសភា ភ្ញៀវចេញ-ចូលតាមច្រកបាវិត មានចំនួនច្រើនក្នុងមួយថ្ងៃៗ ក្នុងនោះប្រមាណជាង១ពាន់ទៅ២ពាន់នាក់ក្នុង១ថ្ងៃ តែសម្រាប់នៅរដូវភ្លៀងធ្លាក់ចាប់ពីខែមិថុនា ដល់ខែតុលា រាងខ្សត់បន្ដិច តែមិនខ្សត់ខ្លាំងនោះទេ គឺអាចទទួលបានចំនួនប្រមាណ១ពាន់នាក់ដែរក្នុង១ថ្ងៃ » ។ លោកបន្តថា កាលពីមុន ភ្ញៀវបរទេសដែលចូលមកកម្ពុជាតាមច្រកបាវិត ភាគច្រើនជាជនជាតិវៀតណាម មានទាំងពាណិជ្ជករ និងទេសចរ តែនៅក្នុងរយៈពេលប៉ុន្មានខែចុងក្រោយនេះ ភ្ញៀវបរទេសដែលចូលមកតាមច្រកបាវិត ភាគច្រើនជាជនជាតិចិន ហើយភ្ញៀវវៀតណាមបានធ្លាក់ទៅចំណាត់ថ្នាក់លេខ២
វិញ ។
លោកបន្ថែមថា ភ្ញៀវបរទេសដែលចូលមក តាមច្រកនេះ តាមការពិនិត្យឃើញថា ពួកគាត់ស្នាក់នៅកម្ពុជាយ៉ាងហោចណាស់៣ថ្ងៃ ទើបត្រឡប់ទៅវិញ ហើយពេលខ្លះ ក៏ចេញទៅវិញតាមច្រកបាវិត និងមានមួយចំនួនចេញពីកម្ពុជាតាមច្រកផ្សេងទៀត ដូចជា ព្រំដែនកម្ពុជា-ថៃ និងច្រកអាកាសយានដ្ឋានអន្តរជាតិទាំង៣របស់កម្ពុជា ជាដើម ។ លោកថា ៖« ចំនួនភ្ញៀវបរទេសដែលចូលមកកាន់កម្ពុជាតាមច្រកនេះ យើងមិនទាន់គិតដល់ភ្ញៀវដែលចូលមក១ថ្ងៃ ដើម្បីមករកស៊ីតាមច្រកព្រំដែនយើង ឬក៏ភ្ញៀវដែលចូលមកលេងនៅកាស៊ីណូនានា និងត្រឡប់វិលល្ងាចទៅប្រទេសវៀតណាមវិញទេ ។ ចំនួនភ្ញៀវដែលបានកត់ក្នុងបញ្ជី គឺទាល់តែភ្ញៀវនោះចូលមក ហើយស្នាក់នៅក្នុងប្រទេសកម្ពុជា » ។
លោកបញ្ជាក់ថា តាមការណែនាំរបស់ក្រសួងទេសចរណ៍ ក្រុមការងារប្រចាំនៅច្រកព្រំដែនបាវិត តែងតែណែនាំដល់ភ្ញៀវទេសចរបរទេសពីតំបន់រមណីយដ្ឋានល្បីៗនានានៅក្នុងប្រទេសកម្ពុជា ។ ជាក់ស្ដែងកាលពីប៉ុន្មានខែមុនក្រុមការងារបានណែនាំដល់ភ្ញៀវទេសចរ ពីតំបន់ប្រាសាទសំបូរព្រៃគុក ដែលទើបដាក់បញ្ចូលជាបេតិកភណ្ឌពិភពលោក និងតំបន់ល្បីៗផ្សេងទៀត ដើម្បីឲ្យពួកគេបានទស្សនា និងសម្រាកលំហែ ។
សូមបញ្ជាក់ផងដែរថា ក្នុងរយៈពេល៥ខែនេះ ជនជាតិខ្មែរដែលចេញទៅប្រទេសវៀតណាមតាមច្រកបាវិត មានចំនួន៨៧.២១៣នាក់ ហើយជនជាតិខ្មែរចូលមកវិញមានចំនួន ៨៨.៥២៨នាក់ ។ លោក យ៉ន សុភាជ បានឲ្យដឹងផងដែរថា ភ្ញៀវខ្មែរដែលចេញទៅប្រទេសវៀតណាម ភាគច្រើនមិនមែនជាភ្ញៀវទេសចរ ឬពាណិជ្ជករនោះទេ ភាគច្រើនជាអ្នកដែលទៅពិនិត្យ និងព្យាបាលជំងឺនៅប្រទេសវៀតណាម ៕
ចែករំលែកព័តមាននេះ