ខេត្តក្រចេះ ៖ នគរបាលស្រុកសំបូរបានឱ្យដឹងថា សមត្ថកិច្ចកំពុងស្រាវជ្រាវរកម្ចាស់អន្ទាក់ដាក់សត្វព្រៃដើម្បីចាត់វិធានការតាមផ្លូវច្បាប់ បន្ទាប់ពីបានដាក់អន្ទាក់រាយចាប់សត្វព្រៃ ដោយប្រើចរន្តភ្លើង និងបង្កឱ្យមានអ្នកភូមិរងគ្រោះថ្នាក់ ។
បុរស២នាក់ ក្នុងនោះមានម្នាក់ជាព្រានបរបាញ់សត្វ និងម្នាក់ទៀតទំនងជាម្ចាស់អន្ទាក់ សត្វ បានរងរបួសរាងកាយដោយសារចរន្តអគ្គិសនីឆក់ ខណៈបានរាយអន្ទាក់នៅក្នុងព្រៃ ដើម្បីចាប់សត្វព្រៃ ពិសេសឈ្លូសនិងជ្រូកព្រៃនៅក្នុងព្រៃមួយកន្លែងក្រោយភូមិសំបូរ ឃុំសំបូរ ស្រុកសំបូរ កាលពីថ្ងៃទី២ ខែកក្កដា ។
ឧប្បត្តិហេតុគ្រោះថ្នាក់ដោយសារចរន្តភ្លើងបង្កៃអន្ទាក់សត្វឆក់នេះ បណ្តាលឲ្យព្រានបរបាញ់សត្វម្នាក់ឈ្មោះ ទិត្យ ធារឹទ្ធ អាយុ៣០ឆ្នាំ រងរបួសដាច់ម្រាមដៃខាងឆ្វេងនិងខាងស្តាំ របួសចង្កេះនិងជើងធ្ងន់ ខណៈជនរងគ្រោះដើរបរបាញ់សត្វក្នុងព្រៃហើយជាន់អន្ទាក់សត្វព្រៃបង្កៃចរន្តអគ្គិសនី ដែលគេរាយសម្រាប់ចាប់សត្វ ។
ក្រៅពីជនរងគ្រោះម្នាក់នេះ ក៏ម្នាក់ទៀតឈ្មោះ ជុំ ទូច អាយុ៥៩ឆ្នាំ រស់នៅឃុំសំបូរបានរងរបួសដូចគ្នាដែរ ។ ជនរងគ្រោះរូបនេះត្រូវគេសង្ស័យថាអាចជាម្ចាស់អន្ទាក់សត្វ តែភ្លាត់ស្នៀតក៏ឆក់ខ្លួនឯង ។ គេសង្ស័យថា ទំនងនៅពេលដែលអន្ទាក់ដាក់សត្វឆក់មនុស្ស ហើយម្ចាស់អន្ទាក់រូបនេះនឹកស្មានថាជាប់សត្វព្រៃ ក៏ស្ទុះទៅមើលដោយមិនបានផ្តាច់ចរន្តអគ្គិសនីពីអន្ទាក់ក៏ត្រូវឆក់ខ្លួនឯង ។
ទោះជាយ៉ាងណា ជនដែលសង្ស័យថាជាម្ចាស់អន្ទាក់សត្វនេះ ក្រោយពីភ្លាត់ស្នៀតឆក់ខ្លួនឯង ក៏ត្រូវបានក្រុមគ្រួសារនាំទៅសង្គ្រោះនៅមន្ទីរពេទ្យ ហើយក៏បានគេចខ្លួន ។អធិការរងនគរបាលស្រុកសំបូរ លោក នួន សារិន បានឱ្យដឹងថា ចំពោះវត្ថុតាងមានអាគុយ និងខ្សែភ្លើង ត្រូវបានចាប់រឹបអូសយកមករក្សាទុក ខណៈនគរបាលកំពុងតែស្រាវជ្រាវរកម្ចាស់ដើម្បីមានវិធានការ ។
អ្នកភូមិដែលធ្លាប់ឃើញការដាក់អន្ទាក់នេះនិយាយថា ការដាក់អន្ទាក់ចាប់សត្វព្រៃសព្វថ្ងៃនេះគឺខុសពីមុន ដោយសារសព្វថ្ងៃក្រុមព្រានចាប់សត្វព្រៃបានរាយអន្ទាក់ដោយប្រើចរន្តអគ្គិសនីរាយពេញព្រៃទំហំរាប់រយម៉ែត្រ ។ កន្លងមក ការដាក់អន្ទាក់ចាប់សត្វព្រៃបែបនេះ មិនត្រឹមតែជាប់បានសត្វព្រៃទេ សូម្បីតែគោក្របីរបស់អ្នកភូមិខ្លះ ក៏ត្រូវដាច់ជើងនិងងាប់ភ្លាមៗដែរ នៅពេលដើរចូលអន្ទាក់របស់ព្រានព្រៃទាំងនោះ ៕
ចែករំលែកព័តមាននេះ