សាធារណរដ្ឋកូរ៉េ ៖ នៅថ្ងៃទី១៥ ខែកក្កដា ឆ្នាំ២០១៨ខាងមុខនេះ ពលរដ្ឋខ្មែរនៅកូរ៉េ នឹងទទួលបានសេវា បន្តសុពភាពលិខិតឆ្លងដែន ដោយឥតគិតថ្លៃ និងការប្រឹក្សាផ្នែកច្បាប់ការងារ។ នេះបើតាមការបញ្ជាក់ របស់ស្ថានទូតកម្ពុជា ប្រចាំសាធារណរដ្ឋកូរ៉េ នៅព្រឹកថ្ងៃទី២ ខែកក្កដា ឆ្នាំ២០១៨នេះ។ សេចក្តីជូនដំណឹងបានឲ្យដឹងថា ស្ថានឯកអគ្គរាជទូតកម្ពុជា ប្រចាំសាធារណរដ្ឋកូរ៉េ មានកិត្តិយស សូមជម្រាបជូនដំណឹងដល់ប្រជាពលរដ្ឋខ្មែរទាំងអស់ ដែលកំពុងសិក្សា ធ្វើការ និងរស់នៅ សាធារណរដ្ឋកូរ៉េ ឲ្យបានជ្រាបថា៖
ក្នុងគោលបំណងចូលរួមកាត់បន្ថយការចំណាយ និងពេលវេលារបស់បងប្អូន ព្រមទាំងដើម្បីអនុវត្តយន្ដការ បង្ខិតសេវាឱ្យជិតដល់ប្រជាពលរដ្ឋខ្មែរ ស្ថានឯកអគ្គរាជទូតកម្ពុជា បានសហការជាមួយអង្គភាពអភិវឌ្ឍន៍ធនធានមនុស្សកូរ៉េ ប្រចាំទីក្រុងថេហ្គូ នឹងចុះផ្ដល់ សេវាបន្ដសុពលភាព លិខិតឆ្លងដែនដោយឥតគិតថ្លៃ ប្រឹក្សាយោបល់ផ្នែកច្បាប់ការងារ និងផ្សព្វ ផ្សាយកម្មវិធីវិលត្រឡប់វិញ ក្រោយចប់អាណត្តិការងារ នៅថ្ងៃអាទិត្យទី១៥ ខែកក្កដា ឆ្នាំ២០១៨ នៅអង្គភាពអភិវឌ្ឍន៍ ធនធានមនុស្សកូរ៉េ ប្រចាំទីក្រុងថេហ្គូ ដែលមានអាសយដ្ឋាន 대구시 달서구 성서공단로 213 (갈산동971-6) ចាប់ពីម៉ោង០១ ដល់ម៉ោង០៤រសៀល”។
អាស្រ័យដូចបានជម្រាបជូនខាងលើ សូមបងប្អូនប្រជាពលរដ្ឋខ្មែរទាំងអស់អញ្ជើញ ទៅទទួលសេវា ឥតបង់ថ្លៃនេះឱ្យបានច្រើនកុះករ និងសូមចូលរួមផ្សព្វផ្សាយព័ត៌មានបន្ដ។ សម្រាប់ព័ត៌មានបន្ថែម សូមទំនាក់ទំនង លោកស្រី ហេង វួចលាង 053-580-2362 និងលោក ជា លីសែ 010-4447-7168៕
ចែករំលែកព័តមាននេះ