ខេត្តមណ្ឌលគិរី ៖ លោកស្នងការនគរបាលខេត្ត កាលពីយប់ថ្ងៃទី២៦ មិថុនា បានដឹកនាំកងកម្លាំងចុះបង្ក្រាបការជួញដូរគ្រឿងញៀននៅលំនៅឋានមួយកន្លែង ក្នុងភូមិពូលុ ឃុំប៊ូស្រា ស្រុកពេជ្រាដា ។…
ខេត្តមណ្ឌលគិរី ៖ លោកស្នងការនគរបាលខេត្ត កាលពីយប់ថ្ងៃទី២៦ មិថុនា បានដឹកនាំកងកម្លាំងចុះបង្ក្រាបការជួញដូរគ្រឿងញៀននៅលំនៅឋានមួយកន្លែង ក្នុងភូមិពូលុ ឃុំប៊ូស្រា ស្រុកពេជ្រាដា ។ អ្វីដែលគួរឲ្យកត់សម្គាល់ គឺនៅក្នុងប្រតិបត្តិការនេះ មានការតដៃពីសំណាក់ជនសង្ស័យ ដែលបណ្តាលឱ្យលោកអធិ ការនគរបាលស្រុកពេជ្រាដារងរបួសដៃស្តាំ ចំណែកជនសង្ស័យម្នាក់ ក៏ត្រូវសមត្ថកិច្ចបាញ់បាក់ភ្លៅម្ខាង
ដែរ ។
លោកឧត្តមសេនីយ៍ត្រី សូ សុវណ្ណ ស្នងការរងនគរបាលខេត្តបានឲ្យដឹងថា នៅវេលាម៉ោង០៩ និង៣០នាទីយប់ ថ្ងៃទី២៦ ខែមិថុនា មានករណីជួញដូរញៀននៅចំណុចខាងលើ ។ ក្រោយពីទទួលបានព័ត៌មាននេះ កម្លាំងសមត្ថកិច្ចបានចុះទៅជាបន្ទាន់ ដើម្បីចាត់វិធានការចូលទៅព័ទ្ធផ្ទះសង្ស័យនោះ ។ លោកឧត្តមសេនីយ៍បន្តថា ខណៈនោះជនល្មើសមានគ្នា៦នាក់ បានស្ទុះហក់បុកទ្វារច្រានសមត្ថកិច្ច និងបានកញ្ឆក់កាំភ្លើងពីដៃសមត្ថកិច្ចរួចបាញ់តដៃ ។
ចំណែកសមត្ថកិច្ចក៏បានបាញ់ការពារខ្លួន បណ្តាលឲ្យត្រូវជនសង្ស័យម្នាក់ចំភ្លៅ និងឃាត់ខ្លួនបានចំនួន២នាក់ផ្សេងទៀត ឯជនសង្ស័យ៣នាក់ទៀតរត់គេចខ្លួនបាត់ ។ ក្នុងប្រតិបត្តិការនេះដែរ លោកវរសេនីយ៍ត្រី តាត់ យ៉េន អធិការនគរបាលស្រុកពេជ្រាដា ត្រូវជនសង្ស័យបាញ់របួសដៃស្តាំ និងបានបញ្ជូនទៅសង្គ្រោះនៅមន្ទីរពេទ្យ ។ ទោះជាយ៉ាងណា ជនសង្ស័យស្រីប្រុសចំនួន៣នាក់ដែលឃាត់ខ្លួន សមត្ថកិច្ចនៅមិនទាន់បញ្ចេញអត្តសញ្ញាណឲ្យដឹងនៅឡើយទេ គិតត្រឹមវេលាម៉ោង១រសៀលថ្ងៃទី២៧ ខែមិថុនា ។
ជាមួយនឹងការចាប់ឃាត់ខ្លួននេះ សមត្ថកិច្ចរឹបអូសបានវត្ថុតាងគ្រឿងញៀនជាច្រើនកញ្ចប់ រួមនឹងម្សៅរំសេវ ព្រមទាំងកាំភ្លើងកែច្នៃជាច្រើនដើមផងដែរ ។ ចំពោះគ្រឿងញៀន សមត្ថកិច្ចនៅមិនទាន់បានថ្លឹងទេ ព្រោះកំពុងស្ថិតនៅក្នុងនីតីវិធី ៕
ចែករំលែកព័តមាននេះ