រាជធានីភ្នំពេញ ៖ ក្រសួងការបរទេសនៅថ្ងៃទី២៨ ខែមិថុនា បានឲ្យដឹងថា លោកនង សាកល ឯកអគ្គរាជទូតតំណាងអចិន្ត្រៃយ៍កម្ពុជាប្រចាំអាស៊ានក្នុងនាមកម្ពុជាជាប្រទេសសម្របសម្រួលទំនាក់ទំនងអាស៊ាន-សាធារណរដ្ឋកូរ៉េបានដឹកនាំគណប្រតិភូឯកអគ្គរាជរដ្ឋទូតដែលជាគណៈកម្មាធិការតំណាងអចិន្ត្រៃយ៍របស់ប្រទេសអាស៊ានចូលជួបសម្តែងការគួរសម និងពិភាក្សាការងារជាមួយលោកជំទាវ Kang Kyung-wha រដ្ឋមន្ត្រីការបរទេសសាធារណៈរដ្ឋកូរ៉េនៅថ្ងៃទី២៥ ខែមិថុនា ក្នុងឱកាសបំពេញទស្សនកិច្ចការងារនៅសាធារណៈរដ្ឋកូរ៉េពីថ្ងៃទី២៣ ដល់២៩ ខែមិថុនា ឆ្នាំ២០១៨ តាមការអញ្ជើញរបស់ក្រសួងការបរទេសសាធារណរដ្ឋកូរ៉េ ។
ក្នុងឱកាសនោះលោកជំទាវរដ្ឋមន្ត្រីបានវាយតម្លៃខ្ពស់ និងកោតសរសើរចំពោះការរីកចម្រើនយ៉ាងខ្លាំងក្លានៃទំនាក់ទំនងរវាងអាស៊ាន និងសាធារណរដ្ឋកូរ៉េ ក្រោមក្រមខណ្ឌដៃគូយុទ្ធសាស្ត្រអាស៊ាន-សាធារណរដ្ឋកូរ៉េ និងបានថ្លែងអំណរគុណរាជរដ្ឋាភិបាលកម្ពុជា និងលោកកឧត្តមទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិក្នុងនាមជាប្រទេសសម្របសម្រួលដែលបានខិតខំប្រឹងប្រែងពង្រឹងទំនាក់ទំនងដៃគូរវាងអាស៊ាន-សាធារណរដ្ឋកូរ៉េ ប្រកបដោយផ្លែផ្កា ។
លោកជំទាវរដ្ឋមន្ត្រីក៏បានបង្ហាញពីគោលនយោបាយភាគខាងត្បូងថ្មី (New Southern Policy) របស់រដ្ឋាភិបាលសាធារណរដ្ឋកូរ៉េបច្ចុប្បន្ន និងបានស្នើអាស៊ានបន្តគាំទ្រដល់ដំណើរការសន្តិភាព និងការរំលាយអាវុធប្រល័យលោកនៅឧបទ្វីបកូរ៉េ ។ លើសពីនោះលោកជំទាវរដ្ឋមន្ត្រីបានគូសបញ្ជាក់ពីបំណងរបស់កូរ៉េឲ្យមានកិច្ចប្រជុំកំពូលពិសេសអាស៊ាន-សាធារណរដ្ឋកូរ៉េ ក្នុងឆ្នាំ២០១៩ ដើម្បីប្រារព្ធខួបទី៣០ឆ្នាំនៃការបង្កើតទំនាក់ទំនងដៃគូសន្ទនារវាងអាស៊ាន-សាធារណរដ្ឋកូរ៉េ និងបានលើកឡើងពីគោលបំណងរបស់សាធារណរដ្ឋកូរ៉េ ក្នុងការធ្វើឲ្យកាន់តែស៊ីជម្រៅថែមទៀត នូវទំនាក់ទំនងជាមួយអាស៊ាន ហើយបានចាត់ទុកអាស៊ានជាដៃគូប្រកបដោយសក្តា-នុពលទាំងវិស័យនយោបាយ សេដ្ឋកិច្ច និងវប្បធម៌ ។ លោក នង សាកល បានគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា និងរបស់លោកទេសរដ្ឋមន្ត្រី ប្រាក់ សុខុន ចំពោះការលើកស្ទួយទំនាក់ទំនងកម្ពុជា-សាធារណរដ្ឋកូរ៉េ និងអាស៊ាន-សាធារណរដ្ឋកូរ៉េ ។
ឯកឧត្តមក៏បានអរគុណ និងវាយតម្លៃខ្ពស់ចំពោះការគាំទ្ររបស់សាធារណរដ្ឋកូរ៉េដល់បុព្វហេតុការកសាងអាស៊ាន ការកាត់បន្ថយគម្លាតក្នុងតំបន់អាស៊ាន ការសម្រេចបាននូវសមាហរណកម្មអាស៊ាន និងកម្មវិធីការតភ្ជាប់អាស៊ាន តាមរយៈការចូលរួមយ៉ាងសកម្មជាមួយកម្មវិធីជាច្រើនរបស់អាស៊ាន និងការផ្តល់ទុនថវិកា និងការចែករំលែកបទពិសោធន៍ ។ លោក នង សាកលក៏បានបង្ហាញក្តីសង្ឃឹមថា គោលនយោបាយ New Southern Policy នឹងគាំទ្រដល់ការកសាងសហគមន៍អាស៊ាន និងការអនុវត្តផែនការលំអិតទាំងបីរបស់អាស៊ាន (ASEAN Blueprints) ហើយបានសំដែងការពេញចិត្តចំពោះព័ត៌មាននៃលទ្ធភាពពង្រីកវិសាលភាពការងាររបស់ស្ថានបេសកកម្មកូរ៉េប្រចាំអាស៊ានទ្វេរដង និងផែនការបង្កើនកញ្ចប់ថវិកាសម្រាប់កិច្ចសហប្រតិបត្តិការអាស៊ាន-សាធារណរដ្ឋកូរ៉េទ្វេរដងផងដែរ ។នៅក្នុងជំនួប លោក នង សាកល តាងនាមឯកអគ្គរាជ/រដ្ឋទូតអាស៊ានបានប្រគល់វត្ថុអនុស្សាវរីយ៍ជូនលោកជំទាវ Kang Kyung-wha រដ្ឋមន្ត្រីការបរទេសសាធារណរដ្ឋកូរ៉េ ៕
ចែករំលែកព័តមាននេះ